(ភ្នំពេញ)៖ បន្ទាប់ពីប្រកាសចូលរួមជីវភាពនយោបាយជាមួយគណបក្សប្រជាជនកម្ពុជា នៅពេលនេះ លោក ហៃ វណ្ណា អតីតប្រធានចលនាយុវជនអតីតគណបក្សសង្គ្រោះជាតិនៅក្នុងប្រទេសជប៉ុន បានមកលេងប្រទេសកម្ពុជា ក្រោយបែកជាង១០ឆ្នាំ។
ជាមួយការមកលេងប្រទេសកម្ពុជា នៅព្រឹកថ្ងៃអាទិត្យ ទី៣ ខែវិច្ឆិកា ឆ្នាំ២០២៤នេះ សម្តេចតេជោ ហ៊ុន សែន ប្រធានព្រឹទ្ធសភាកម្ពុជា និងជាប្រធានគណបក្សប្រជាជនកម្ពុជា បានអនុញ្ញាតឱ្យលោក ហៃ វណ្ណា រួមជាមួយប្អូនប្រុសរបស់លោក គឺលោក ហៃ វណ្ណនិត បានចូលជួបសម្តែងការគួរសមនៅឯផ្ទះរបស់សម្តេចនាក្រុងតាខ្មៅ ខេត្តកណ្តាលផងដែរ។
ក្រោយពេលលោក ហៃ វណ្ណា ប្រកាសចូលរួមជីវភាពនយោបាយជាមួយគណបក្សប្រជាជនកម្ពុជា ក្រុមអ្នកនយោបាយប្រឆាំង ឬអ្នកវិភាគមាននិន្នាការប្រឆាំង គេបានពោលថា ការប្រកាសចូលរួមជីវភាពនយោបាយរបស់ ហៃ វណ្ណា គ្រាន់តែជាការដោះដូរនឹងសេរីភាពរបស់ប្អូនប្រុស ហើយក៏មិនមែនជាឆន្ទៈពិតរបស់លោក ហៃ វណ្ណា នោះឡើយ។
ផ្ទុយពីអ្វីដែលក្រុមប្រឆាំងបានលើកឡើង តាមរយៈរូបភាពនៃជំនួបជាមួយសម្តេចតេជោ ហ៊ុន សែន គេបានឃើញកាយវិការ និងសកម្មភាពប្រកបដោយភាពស្និទ្ធស្នាលជាទីបំផុត។ តាមរយៈរូបភាពទាំងនេះ បង្ហាញជាក់ច្បាស់នូវការគោរពស្រឡាញ់របស់ ហៃ វណ្ណា ចំពោះសម្តេចតេជោ ហើយក៏បានបង្ហាញពីមនោសញ្ចេតការសណ្តោសប្រណីដ៏ធំធេងរបស់សម្តេចតេជោ ដែលជាមេដឹកនាំ និងជាអ្នកនយោបាយពោរពេញដោយការអនុគ្រោះ និងការមិនចេះប្រកាន់ទោសអូសដំណើរចំពោះបុគ្គលធ្លាប់ធ្វើសកម្មភាពប្រឆាំងនឹងសម្តេច។
តាមរយៈជំនួបនោះ សម្តេចតេជោ ហ៊ុន សែន ក៏បានសម្រេចជួយឧបត្ថម្ភគាំទ្រដល់ប្អូនប្រុសលោក ហៃ វណ្ណា គឺលោក ហៃ វណ្ណនិត ឱ្យបន្តការសិក្សាថ្នាក់បណ្ឌិតនៅសហរដ្ឋអាមេរិកផងដែរ។
បន្ទាប់ពីជួបសម្តែងការគួរសមជាមួយសម្តេចតេជោហើយនោះ នៅពេលរសៀលថ្ងៃដដែលនេះ លោក ហៃ វណ្ណា និងប្អូនប្រុស ក៏បានចូលរួមក្នុងពិធីសាសនានៃបុណ្យកឋិនទានមហាសាមគ្គីគ្រួសារខ្មែរដង្ហែទៅកាន់វត្តខ្មែរក្រោម ដែលធ្វើឡើងនៅវិមាន៧មករា ទីស្នាក់ការកណ្តាលបក្សប្រជាជនកម្ពុជា។
ក្នុងឱកាសនោះ លោក ហៃ វណ្ណា បានជួបសម្តែងការគួរសមជាមួយសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា និងជាអនុប្រធានគណបក្សប្រជាជនកម្ពុជា ក៏ដូចជាថ្នាក់ដឹកនាំគណបក្សប្រជាជនកម្ពុជាដទៃទៀត ដោយស្នាមញញឹម បង្ហាញពីការប្រាស្រ័យទាក់ទងដោយមិនប្រកាន់ចំពោះរឿងអតីតកាលនោះឡើយ។
លោក ហៃ វណ្ណា ក៏បានផ្តល់សម្ភាសន៍ជាមួយ Fresh News ផងដែរក្នុងឱកាសនោះ។ លោក ហៃ វណ្ណា បានប្រាប់ Fresh News ថា លោករីករាយបានជួបសម្តេចតេជោ ហ៊ុន សែន និងថ្នាក់ដឹកនាំគណបក្សប្រជាជនកម្ពុជា។ លោក វណ្ណា បានរៀបរាប់ថា សម្តេចតេជោ ហ៊ុន សែន ជាអ្នកនយោបាយផ្តល់គំរូដ៏ល្អមួយ គឺការមិនចេះប្រកាន់ ឬយកខ្មែរជាសត្រូវ។ ជាមេដឹកនាំប្រកបដោយក្តីមេត្តា និងសណ្តោសប្រណៃខ្ពស់បំផុត។
លោក ហៃ វណ្ណា ក៏បានអះអាងដែរថា ការចូលរួមជីវភាពនយោបាយជាមួយគណបក្សប្រជាជនកម្ពុជា មិនមែនព្រោះតែសម្ពាធណាមួយនោះឡើយ គឺជាការផ្លាស់ប្តូរដោយពេញចិត្ត ដើម្បីបានឱកាសចូលរួមជួយដល់សង្គមជាតិ ដែលជាបំណងតាំងពីដើមរបស់លោក។
សូមបញ្ជាក់ថា លោក ហៃ វណ្ណា បានទៅដល់ប្រទេសជប៉ុន តាមរយៈអាហារូបករណ៍វិស័យឯកជន។ លោកបានបញ្ចប់ការសិក្សាផ្នែកព័ត៌មានវិទ្យានៅប្រទេសជប៉ុន។ រូបលោក បានចាប់ផ្តើមភពប្រសប់ការធ្វើនយោបាយជាមួយអតីតគណបក្សសង្គ្រោះជាតិនៅឆ្នាំ២០១៥។ នៅខែតុលា ឆ្នាំ២០២៤ លោក ហៃ វណ្ណា បានសម្រេចចាកចេញពីអតីតគណបក្សសង្គ្រោះជាតិ មកចូលរួមជីវភាពនយោបាយជាមួយគណបក្សប្រជាជនកម្ពុជាវិញ។
បច្ចុប្បន្នលោក ហៃ វណ្ណា មានភរិយាជាជនជាតិជប៉ុន ហើយបានរកស៊ីក្នុងវិស័យកសិកម្ម៕
