(ពោធិ៍សាត់)៖ រដ្ឋបាលខេត្តពោធិ៍សាត់ បានរៀបចំព្រឹត្តការណ៍ពិធីប្រណាំងទូក «ង» ខ្នាតអន្តរជាតិ ជាលើកទី៥ ដែលមានរយៈពេល២ថ្ងៃ ពោលគឺថ្ងៃទី០៩-១០ ខែវិច្ឆិកា ឆ្នាំ២០២៤ នៅវេទិកាអុំទូក នៅរ៉បមាត់ស្ទឹងពោធិ៍សាត់ ជាប់ផ្លូវលេខ១០១ ដើម្បីអបអរសាទរ ព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក, ជាក់ស្តែងនាថ្ងៃទី១ នៃពិធីប្រណាំងទូកនេះ គេសង្កេតឃើញមានភ្ញៀវទេសចរមកលេងកម្សាន្ត ទាំងពេលថ្ងៃ និងពេលយប់ មានប្រមាណ១១៥,០០០នាក់។
សម្រាប់ពិធីបើកព្រឹត្តការណ៍ប្រណាំងទូក ត្រូវបានធ្វើឡើង ក្រោមអធិបតីភាព លោក ខូយ រីដា អភិបាលខេត្តពោធិ៍សាត់ និងលោកស្រី អាំង សុជាតា ខូយរីដា, លោក ម៉ក់ រ៉ា ប្រធានក្រុមប្រឹក្សាខេត្ត និងលោក ភួ ពុយ អ្នកតំណាងរាស្ត្រមណ្ឌលបាត់ដំបង និងលោកស្រី ព្រមទាំងបានការចូលរួមពីសំណាក់ លោក លោស្រី ជាក្រុមប្រឹក្សាខេត្ត អភិបាលរងខេត្ត តំណាងអយ្យការអមសាលាដំបូងខេត្ត មេបញ្ជាការកងកម្លាំងប្រដាប់អាវុធទាំង៣ប្រភេទ ប្រធាន អនុប្រធានមន្ទីរអង្គភាពនានាជុំវិញខេត្ត អភិបាលក្រុង ស្រុក សាខាសមាគមនារីខេត្ត ព្រមទាំងយុវជន យុវនារី និងប្រជាពលរដ្ឋយ៉ាងច្រើនកុះករ។
ថ្លែងក្នុងឱកាសបើកដំណើរការព្រឹត្តការណ៍ប្រណាំងទូក លោក ខូយ រីដា អភិបាលខេត្តពោធិ៍សាត់ បានឱ្យដឹងថា ខេត្តពោធិ៍សាត់របស់យើង ពិតមានជាមានកិត្តិយសខ្លាំងណាស់ ដោយរៀបចំនូវ ព្រឹត្តិការណ៍ ពិធីប្រណាំងទូក ជាលើកទី៥ និងដោយមានទូកចូលរួមប្រគួត ចំនួន៣១ទូក ក្នុងនោះគូរពិសេស១៦ទូក និងទូកកិត្តិយស១៥ទូក និងពេលរាត្រីមានការដាក់តាំងពិព័ណ៌ ការប្រគុំតន្ត្រី រាំលេងកម្សាន្ត និងបាញ់កាំជ្រួចនាពេលរាត្រីផងដែរ។
លោកបានលើកឡើងថា ក្រោមការដឹកនាំប្រកបដោយ គតិបណ្ឌិត របស់សម្ដេចបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានដាក់ចេញនូវយុទ្ធសាស្ត្របញ្ចកោណ ដំណាក់កាល ទី១ ដើម្បីកំណើនការងារ សមធម៌ ប្រសិទ្ធភាព និងចីរភាព។ ទន្ទឹមនេះ យុទ្ធសាស្ត្រនេះ បានកំណត់យកអាទិភាពគន្លឹះ៥ គឺ «មនុស្ស, ផ្លូវ, ទឹក, ភ្លើង និងបច្ចេកវិទ្យា» ជាពិសេសបច្ចេកវិទ្យាឌីជីថល។ ជាមួយគ្នានោះ យើងក៏ត្រូវចងចាំជានិច្ច នូវគុណបំណាច់របស់សម្តេច តេជោ ហ៊ុន សែន ដែលបានផ្តល់គុណតម្លៃខ្ពស់បំផុត ចំពោះការថែរក្សា សុខសន្តិភាព ស្ថិរភាពនយោបាយ សម្រាប់ជាមូលដ្ឋាន ក្នុងការជំរុញដំណើរការលទ្ធិប្រជាធិបតេយ្យ សេរីពហុបក្ស និងការលើកស្ទួយ សិទ្ធិសេរីភាពក្នុងសង្គម ស្របតាម រដ្ឋធម្មនុញ្ញ និងច្បាប់ជាធរមាន។
លោកបានជម្រាបជូនថា ពិធីបុណ្យអុំទូក អកអំបុក និងសំពះព្រះខែ គឺជាពិធីបុណ្យ ប្រពៃណីជាតិ ដ៏មានប្រជាប្រិយបំផុត របស់ប្រជាពលរដ្ឋខ្មែរ។ ពិធីបុណ្យអុំទូក ត្រូវបានប្រារព្ធតាំងពីសម័យបូរាណកាល ក្នុងរជ្ជកាលព្រះបាទជ័យវរ្ម័នទី៧ ដើម្បីរំលឹកគំរូវីរភាពដ៏អង់អាចក្លាហាន របស់កងទ័ពជើងទឹកខ្មែរ ដែលបានរំដោះទឹកដីផុត ពីការជិះជាន់របស់ខ្មាំងសត្រូវ។ ព្រឹត្តិការណ៍នេះក៏បាន បញ្ជាក់យ៉ាងច្បាស់ ពីការចូលរួមថែក្សា និងអភិរក្សនូវអ្វីដែលបុព្វបុរសខ្មែររបស់យើង បានបន្សល់ទុកតាំងពីបូរាណកាល និងបានបន្តមរតក មកដល់សព្វថ្ងៃនេះ។
លោកក៏សូមឱ្យបងប្អូនប្រជាពលរដ្ឋ ចូលរួមសប្បាយឱ្យបានច្រើនកុះករ ក្នុងពិធីប្រណាំងទូក បណ្តែតប្រទីប និងសំពះព្រះខែ អកអំបុក នៅខេត្តពោធិ៍សាត់ រយៈពេល២ថ្ងៃនេះ ឱ្យបានច្រើនកុះករ និងសូមចូលរួមថែរក្សាអនាម័យបរិស្ថានឱ្យបានស្អាតជានិច្ច និងសំណូមពរ ដល់កងកម្លាំងទាំងអស់ ថែរក្សាសន្តិសុខសណ្តាប់ធ្នាប់សាធារណៈ ឱ្យបានល្អប្រសើរ៕
