(ភ្នំពេញ)៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានថ្លែងថា បញ្ហាកោះគុត រាជរដ្ឋាភិបាលប្រកាន់ជំហរពីរ គឺទី១) ភាពចាស់ទុំខាងនយោបាយ និងទី២) ការទទួលខុសត្រូវចំពោះជាតិ និងប្រជាជន ចំពោះបូរណភាពទឹកដី និងអធិបតេយ្យជាតិ។
សម្តេចមហាបវរធិបតី ហ៊ុន ម៉ាណែត ថ្លែងបែបនេះ ក្នុងឱកាសអញ្ជើញចែកសញ្ញាបត្រ ជូននិស្សិតសាកលវិទ្យាល័យភូមិន្ទភ្នំពេញ នៅថ្ងៃទី២១ ខែវិច្ឆិកា ឆ្នាំ២០២៤។
សម្តេចមហាបវរធិបតី ហ៊ុន ម៉ាណែត បានបញ្ជាក់យ៉ាងដូច្នេះថា «(បញ្ហាកោះគុត) ហេតុអ្វីរាជរដ្ឋាភិបាលនៅស្ងៀម? ចម្លើយផ្អែកលើមូលដ្ឋាន២ ទី១ គឺភាពចាស់ទុំខាងនយោបាយ និងទី២ ការទទួលខុសត្រូវចំពោះជាតិ និងប្រជាជន ចំពោះបូរណភាពទឹកដី និងអធិបតេយ្យជាតិ»។
សម្តេចមហាបវរធិបតី ហ៊ុន ម៉ាណែត បានពន្យល់ថា៖
* ភាពចាស់ទុំខាងនយោបាយ មាន៣ រួមមាន៖ ទី១ ការប្រកាន់គោលការណ៍មិនយកភ្លើងចូលផ្ទះ, ទី២ ការដោះស្រាយបញ្ហាប្រកបដោយភាពចាស់ទុំ និងទី៣ ប្រកាន់ភាពជាក់ស្តែងនិយម ដែលមុននឹងធ្វើអ្វីមានការស្រាវជ្រាវ។
* ការទទួលខុសត្រូវចំពោះជាតិ និងប្រជាជន ចំពោះបូរណភាពទឹកដី និងអធិបតេយ្យជាតិ រួមមាន៖ ទី១ រឿងព្រំដែន ជារឿងរយៈពេលវែង ដែលរាជរដ្ឋាភិបាល ប្តេជ្ញាការពារបូរណភាពទឹកដី និងអធិបតេយ្យជាតិ និងទី២ ការដោះស្រាយបញ្ហាព្រំដែនដោយមិនប្រើហិង្សា។
សម្តេចមហាបវរធិបតី ហ៊ុន ម៉ាណែត ក៏បានថ្លែងថា ព្រំដែនសមុទ្ររវាងកម្ពុជា និងថៃ មិនទាន់មានការឯកភាពគ្នានោះទេ៕
