(សៀមរាប)៖ បណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា នារសៀលថ្ងៃទី៩ ខែធ្នូ ឆ្នាំ២០២៤ បានអញ្ជើញជាអធិបតី ក្នុងពិធីប្រកាសដាក់ឱ្យអនុវត្តជាផ្លូវការ គម្រោងកំណែទម្រង់ការអប់រំបច្ចេកទេស សម្ព័ន្ធមេត្រីភាព កម្ពុជា-សហភាពអឺរ៉ុប និងមានការចូលរួមពីលោក Igor Driesmans ឯកអគ្គរដ្ឋទូតសហភាពអឺរ៉ុបប្រចាំនៅកម្ពុជា ថ្នាក់ដឹកនាំក្រសួង លោក Bryan Fornari ប្រធាននៃកិច្ចសហប្រតិបត្តិការ EU Delegation , ប្រតិភូតំណាងប្រទេសសមាជិក EU គណៈគ្រប់គ្រង លោកគ្រូ អ្នកគ្រូ មាតាបិតា អ្នកអាណាព្យាបាល និងក្មួយៗសិស្សានុសិស្ស សរុបប្រមាណ ៥០០នាក់។
ក្នុងឱកាសនេះ ឯកអគ្គរដ្ឋទូតសហភាពអឺរ៉ុបប្រចាំកម្ពុជា បានបង្ហាញនូវសេចក្តីរីករាយដែលបានចូលរួមពិធីប្រកាសនេះ និងបានថ្លែងអំណរគុណដល់ប្រទេសកម្ពុជា ចំពោះកិច្ចសហប្រតិបត្តិការលើគម្រោងនេះសម្ព័ន្ធមេត្រីភាព Twinning នេះ ដែលត្រូវបានអនុវត្តឡើងក្នុងគោលបំណង កែលម្អកំណែទម្រង់ការអប់រំបច្ចេកទេសនៅប្រទេសកម្ពុជា តាមរយៈការសហការជាមួយអ្នកជំនាញអឺរ៉ុប និងអ្នកជំនាញក្នុងប្រទេស ដោយផ្តោតលើការរួមបញ្ចូលការរៀននៅក្នុងថ្នាក់ជាមួយនឹងបទពិសោធន៍ជាក់ស្តែង ជាពិសេសក្នុងវិស័យបច្ចេកវិទ្យាថ្មីៗ និងការរីកចម្រើនក្នុងបច្ចេកវិទ្យាឌីជីថល ដើម្បីធានាបាននូវឱកាសការងារល្អៗសម្រាប់សិស្សានុសិស្សក្នុងប្រទេសកម្ពុជា។ គម្រោងសម្ព័ន្ធមេត្រីភាព Twinning នេះគឺជាជំហានឆ្ពោះទៅមុខយ៉ាងសំខាន់មួយ ដែលបង្ហាញអំពីការប្តេជ្ញាចិត្តរបស់សហភាពអឺរ៉ុប ក្នុងការគាំទ្រកំណែទម្រង់វិស័យអប់រំនៅកម្ពុជា។
គម្រោងនេះក៏ផ្តោតសំខាន់ទៅលើតម្រូវការរបស់វិស័យឯកជន ជាពិសេសតម្រូវការរបស់ក្រុមហ៊ុនមកពីអឺរ៉ុប ដែលអាចឱ្យក្រុមហ៊ុនទាំងនោះធ្វើការវិនិយោគបន្ថែមទៀតនៅក្នុងប្រទេសកម្ពុជា។
បណ្ឌិតសភាចារ្យ ឧបនាយករដ្ឋមន្ត្រី បានកោតសរសើរ និងថ្លែងអំណរគុណយ៉ាងជ្រាលជ្រៅដល់សហភាពអឺរ៉ុប ដែលបានជួយឧបត្ថម្ភ និងគាំទ្រមកលើវិស័យអប់រំជាច្រើនឆ្នាំនាពេលកន្លងមកនេះ ជាពិសេសចំពោះការសហការជាមួយប្រទេសកម្ពុជា លើគម្រោងសម្ព័ន្ធមេត្រីភាព កម្ពុជា-សហភាពអឺរ៉ុបនាពេលនេះផ្ទាល់ ដោយប្រទេសកម្ពុជា គឺជាប្រទេសដំបូងគេបំផុតនៅទ្វីបអាស៊ី ដែលទទួលបានអត្ថប្រយោជន៍ពីគម្រោងសម្ព័ន្ធមេត្រីភាព Twinning នេះ ក្នុងនោះមន្ត្រីរាជការកម្ពុជានឹងធ្វើទស្សនកិច្ចសិក្សានៅទ្វីបអឺរ៉ុប ដើម្បីសិក្សាពីបទពិសោធន៍ និងឧត្តមានុវត្តន៍ ពាក់ព័ន្ធនឹងការសិក្សាជំនាញដែលផ្សារភ្ជាប់នឹងការងារ ការធ្វើទំនើបកម្ម កម្មវិធីសិក្សា និងការបណ្តុះបណ្តាលគ្រូសម្រាប់ការអប់រំបច្ចេកទេស។
ទន្ទឹមនឹងនេះ បណ្ឌិតសភាចារ្យ ឧបនាយករដ្ឋមន្ត្រី ក៏បានថ្លែងអំណរគុណដល់ គណៈគ្រប់គ្រង នាយក នាយិការ លោកគ្រូ អ្នកគ្រូនៃវិទ្យាល័យចំណេះទូទៅ និងបច្ចេកទេសពួក ដែលបានរៀបចំសាលារៀនបានស្អាតល្អ និងកាន់តែមានសោភណភាពខ្ពស់ ជាពិសេសបានក្លាយទៅជាសាលារៀនគំរូផងដែរ ដែលទដែលទាំងអស់បានបញ្ចាក់ពីការខិតខំប្រឹងប្រែងរបស់គណៈគ្រប់គ្រង លោកគ្រូ អ្នកគ្រូ ជាពិសេសសិស្សានុសិស្ស និងមាតាបិតា អ្នកអាណាព្យាបាលដែលមិនត្រឹមតែធ្វើឱ្យសាលារៀនរក្សាបាននូវបរិស្ថានស្អាតប៉ុណ្ណោះទេ ប៉ុន្តែលទ្ធផលសិក្សារបស់សិស្ស ជាពិសេសសិស្សដែលទទួលបាននិទ្ទេស(A,B,C) ក៏មានការកើនឡើងជាប្រចាំគួរឱ្យកត់សម្គាល់ផងដែរ។
បណ្ឌិតសភាចារ្យ ឧបនាយករដ្ឋមន្ត្រី ក៏បានលើកឡើងពីកំណែទម្រង់វិស័យអប់រំនាពេលកន្លងមក ជាពិសេសចំពោះការបង្កើនប្រាក់បៀវត្សរ៍គ្រូបង្រៀន ហើយក្រសួងអប់រំ យុវជន និងកីឡា នឹងបន្តខិតខំធ្វើកំណែទម្រង់អប់រំបន្តទៀត ដើម្បីលើកកម្ពស់កិត្តិយសរបស់លោកគ្រូ អ្នកគ្រូ ក៏ដូចជាលើកកម្ពស់គុណភាពវិស័យអប់រំ ដើម្បីផ្តល់ឱ្យយុវជនកម្ពុជានូវសមត្ថភាពពិតប្រាកដក៏ដូចជាបំណិនផងដែរ។
គូសបញ្ជាក់ដែរ ក្រសួងអប់រំ យុវជន និងកីឡា នឹងបន្តកែលម្អកម្មវិធីសិក្សាក្នុងប្រទេសកម្ពុជាបន្ថែមទៀត ដើម្បីឱ្យកម្មវិធីសិក្សាដំណើរការបានរលូនល្អ សៀវភៅបង្រៀនគ្រូ និងការបណ្តុះបណ្តាលគ្រូបង្រៀន មានភាពល្អប្រសើរទាំងគ្រូចំណេះដឹងទូទៅ និងគ្រូអប់រំបច្ចេកទេស ក៏ដូចជាលើកកម្ពស់ការប្រើប្រាស់ភាសាបរទេស ដោយបានបញ្ចាក់ថាភាសាបរទេស គឺមានសារៈសំខាន់សម្រាប់ការចាប់យកជំនាញ ឆ្លើយតបនឹងទីផ្សារការងារជាក់ស្តែង ក៏ដូចជាបានលើកទឹកចិត្តដល់សិស្សានុសិស្សទាំងអស់ ត្រូវចេះស្វែងរកនិងដោះស្រាយបញ្ហាដោយខ្លួនឯង ចេះធ្វើការងារជាក្រុម មានបំណិនសតវត្សទី២១ មានសហគ្រិនភាព និងបានព្យាយាមបណ្តុះបណ្តាលគ្រូបង្រៀនឱ្យប្រើប្រាស់ការបង្រៀនជា(Project Based Learning) ដើម្បីពង្រឹងគុណភាពអប់រំ ក្នុងគោលដៅធ្វើឱ្យលទ្ធផលសិក្សារបស់សិស្សកាន់តែល្អប្រសើរឡើង។
សារជាថ្មីម្តងទៀត តាងនាមក្រសួងអប់រំ យុវជន និងកីឡា បណ្ឌិតសភាចារ្យ ឧបនាយករដ្ឋមន្ត្រី បានថ្លែងអំណរគុណដល់ក្រុមការងារពាក់ព័ន្ធទាំងអស់ ដែលបានសម្រេចនូវគម្រោងនេះ និងបានបញ្ចាក់ឱ្យដឹងថា តាមរយៈកិច្ចសហការនេះ នឹងអនុញ្ញាតឱ្យកម្ពុជាអាចសម្រិតសម្រាំងប្រព័ន្ធអប់រំ ឱ្យស្របតាមស្តង់ដាការអប់រំបច្ចេកទេស ដូចទៅនិងប្រទេសហ្វាំងឡង់ បារាំង និងអាល្លឺម៉ង់ ជាដើម ដែលប្រទេសទាំងនេះមានបទពិសោធន៍ស៊ីជម្រៅ លើវិស័យភាពជាដៃគូរវាងរដ្ឋ និងឯកជន។ កិច្ចសហការនេះក៏នឹងជួយបណ្តុះបណ្តាល សមត្ថភាពរបស់សិស្សានុសិស្សយើងឱ្យកាន់តែប្រសើរឡើង ដើម្បីអាចឆ្លើយតប និងអាចបំពេញតម្រូវការសម្រាប់ការវិនិយោគបរទេសនៅប្រទេសកម្ពុជា៕
