(ត្បូងឃ្មុំ)៖ លោក ឡុង ធាម ប្រធានក្រុមប្រឹក្សាខេត្តត្បូងឃ្មុំ និងលោកស្រី, លោក ប៉ែន កុសល្យ អភិបាលខេត្តត្បូងឃ្មុំ និងលោកស្រី ហេង សំអាន, ព្រះគ្រូសង្ឃរតនមុនី គីម ឌីណា ព្រះគ្រូចៅអធិការ វត្តតេជះសុវណ្ណភូមិ, ឧត្តមសេនីយ៍ទោ ចិន នី ស្នងការនគរបាលខេត្តត្បូងឃ្មុំ, លោក ហាក់ ហុន ប្រធានមន្ទីរធម្មការ និងសាសនាខេត្តត្បូងឃ្មុំ, លោក សេង សុខឃឿន អភិបាលស្រុកត្បូងឃ្មុំ និងពុទ្ធបរិស័ទចំណុះជើងវត្ត ផ្តួចផ្តើមប្រារព្ធពិធីបុណ្យផ្កាប្រាក់សាមគ្គី ដើម្បីបន្តជួយសាងសង់ព្រះវិហារ សម្ពោធឆ្លងកុដិថ្ម សិតព្រះបដិមាសាវ័កស្ពាន់ចំនួន ៤អង្គ និងរាប់បាត២៥០អង្គ នៅវត្តតេជៈសុវណ្ណភូមិ។
ពិធីនេះនឹងធ្វើឡើងនៅថ្ងៃទី៧ ខែកុម្ភៈ ឆ្នាំ២០២៥ ខាងមុខនេះ នៅក្នុងបរិវេណវត្តតេជៈសុវណ្ណភូមិស្ថិតនៅឃុំស្រឡប់ ស្រុកត្បូងឃ្មុំខេត្តត្បូងឃ្មុំ។
ក្នុងឱកាសនោះដែរ លោក ប៉ែន កុសល្យនឹងអញ្ជើញចូលរួមក្នុងកម្មវិធីបុណ្យឆ្លងកុដិថ្ម១ខ្នង មានទំហំ១២ គុណ២៤ម៉ែត្រ កម្ពស់២ជាន់ កសាងដោយសម្តេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត និងសមិទ្ធផលនានា។
អាស្រ័យហេតុដូចបានប្រគេននិងជម្រាបជូនខាងលើ សូមនិមន្ត គោរពអញ្ជើញសម្តេច ទ្រង់ ឯកឧត្តម អ្នកឧកញ៉ា លោកជំទាវ លោក លោកស្រី អ្នកនាងកញ្ញាព្រមទាំងសប្បុរសជនជិតឆ្ងាយចូលរួមក្នុង កម្មវិធីបុណ្យនេះឱ្យបានអធិកអធម និងចាប់មគ្គផលតាមសទ្ធាជ្រះថ្លារៀងៗខ្លួន។
កម្មវិធីបុណ្យថៃ្ងព្រហស្បតិ៍ ៩កើត ខែមាឃ ឆ្នាំរោងឆស័ក ពុទ្ធសករាជ ២៥៦៨ ត្រូវនឹងថ្ងៃទី៦ ខែកុម្ភៈ ឆ្នាំ២០២៥ ម៉ោង០១:០០ រសៀល ប្រារព្ធពិធីក្រុងពាលី និមន្តព្រះសង្ឃ សមាទានសីល ចម្រើនព្រះបរិត្តម៉ោង២:០០ រសៀល បដិសណ្ឋារកិច្ចភ្ញៀវកិត្តិយសនិងពិសាភោជនាហារ។
ថ្ងៃសុក្រ ១០កើត ខែមាឃ ឆ្នាំរោងឆស័ក ពុទ្ធសករាជ ២៥៦៨ ត្រូវនឹងថ្ងៃទី៧ ខែកុម្ភៈ ឆ្នាំ២០២៥ ម៉ោង៧:៣០នាទីព្រឹកគណៈអធិបតីអញ្ជើញមកដល់ដើម្បីកាត់ខ្សែរបូជានិមិត្តរូបនៃការសម្ពោធសមិទ្ធផលនានា។
ម៉ោង៩:៣០ នាទី ព្រឹក គណៈអធិបតីអញ្ជើញសិតព្រះបដិមាសាវ័កធ្វើអំពីស្ពាន់ចំនួន៤អង្គ។
ម៉ោង១០:៣០ នាទីព្រឹក អញ្ជើញពុទ្ធបរិស័ទរាប់បាត្រប្រគេនចង្ហាន់ព្រះសង្ឃចំនួន២៥០អង្គ។
ម៉ោង០២.៣០នាទីរសៀល និមន្តព្រះធម្មវនវាសី បណ្ឌិត ចន្ទ មុន្នី ប្រទានធម៌ទេសនា និងសិតព្រះអង្គស្ពាន់ សម្រាប់ដាក់តម្កល់លើព្រះវិហារ។
ទី១៖ ពុទ្ធបរិស័ទមានសទ្ធាជ្រះថ្លាទទួលព្រះសង្ឃចំនួន១អង្គ ក្នុងនោះមានទេយ្យទានគ្រឿងបរិក្ខាមួយសម្រាប់ ចង្ហាន់មួយតុ និងបច្ច័យបួនព្រះសង្ឃ សរុប៤០ម៉ឺនរៀល គណៈកម្មការជាអ្នករៀបចំជូន។
ទី២៖ ពុទ្ធបរិស័ទមានសទ្ធាជ្រះថ្លាចូលរួមកសាងព្រះបដិមាស្ពាន់ក្នុង១គីឡូមានតម្លៃ៥ម៉ឺនរៀល ពត៌មានបន្ថែមសូមទំនាក់ទំនងមកទូរសព្ទគណៈកម្មការរៀបចំបុណ្យ ០៧១ ៥៥៥ ៥៦៦៤ /០៨៨ ៥៩៥ ៥៥៩៕
