(ភ្នំពេញ)៖ សម្ដេចតេជោ ហ៊ុន សែន ប្រមុខរដ្ឋស្ដីទីនៃកម្ពុជា បានរំលឹកឱ្យដឹង នៅពេលមានរបាយការណ៍ព័ត៌មានចារកម្មថា អ៊ី ឈាន ឃុបឃិតជាមួយតាម៉ុក នៅពេលនោះគឺ សម្ដេចពិជ័យសេនា ទៀ បាញ់ ជាអ្នកការពារប្តូរផ្តាច់ ចំពោះសុវត្ថិភាពរបស់លោក អ៊ី ឈាន។
នៅពេលនោះ សម្ដេចតេជោ បានផ្ដល់ការជឿជាក់លើសម្ដេចពិជ័យសេនា ទៀ បាញ់ ហើយជាលទ្ធផលបានបង្ហាញឱ្យឃើញថា អ៊ី ឈាន ជាអ្នកដេញវាយតាម៉ុក។ សម្តេចតេជោ ហ៊ុន សែន បានថ្លែងថា សម្ដេចមិនប្រាកដទេថា នយោបាយឈ្នះឈ្នះ អាចជោគជ័យឬអត់? ប្រសិនជាគ្មានសម្ដេចពិជ័យសេនា ទៀ បាញ់។
សម្ដេចតេជោ ហ៊ុន សែន បានថ្លែងបែបនេះថា៖ «បើនិយាយពីនយោបាយឈ្នះឈ្នះ ខ្ញុំអាចនិយាបានថា ប្រសិនបើគ្មានសម្ដេចពិជ័យសេនា ទៀ បាញ់ទេ ខ្ញុំមិនប្រាកដថាតើវាជោគជ័យឬអត់? រឿងនេះវាសំខាន់ណាស់។ ព្រោះពេលនោះ គ្រាន់តែប្រភពចារកម្ម ផ្ដល់ព័ត៌មានមកធ្វើឱ្យយើងគ្រោះថ្នាក់ បាត់ទៅហើយ ប៉ុន្តែភាពនឹងនរបស់សម្ដេចពិជ័យ គឺទៅលើការវិភាគសភាពការណ៍។ ខ្ញុំលើកឧទាហរណ៍ ចារកម្មផ្ដល់ព័ត៌មានមក ផ្នែកចារកម្មយើងហ្នឹងតែម្ដង ផ្ដល់ព័ត៌មានថា អ៊ី ឈាន កំពុងជួបតាម៉ុក នៅសណ្ឋាគារនេះ បន្ទប់ប៉ុណ្ណេះ អីប៉ុណ្ណេះ។ វាងាប់ អ៊ី ឈាន បាត់ទៅហើយ! ហើយបើងាប់អាឈាន ទៅនរណាដឹកនាំប៉ៃលិន? ហើយបើប៉ៃលិន បះបោរផ្ដាច់ខ្លួនទៅជាមួយតាម៉ុក វិញ ដូចព័ត៌មាននោះ តើវាគ្រោះថ្នាក់ប៉ុណ្ណា? គ្រោះថ្នាក់ប៉ុណ្ណា? មិនមាន អ៊ី ឈាន នៅវិមានសន្តិភាពនេះទេ។ មិនអញ្ចឹង?»។
សម្ដេចប្រមុខរដ្ឋស្ដីទី បានមានប្រសាសន៍បន្តថា៖ «អញ្ចឹង អ៊ី ឈាន ត្រូវបានការពារដោយប្ដូរផ្ដាច់ដោយ សម្ដេចពិជ័យសេនា ហើយខ្ញុំគឺជឿសម្ដេចពិជ័យ។ ព្រោះព័ត៌មានចាក់ និយាយរួម ចាក់សម្លាប់ អ៊ី ឈាន, សុខ ភាព ល្មមទេ ប៉ុន្តែ អ៊ី ឈាន ទើបធ្ងន់។ អាហ្នឹងគឺ និយាយគ្នាឱ្យច្បាស់ ប្រសិនបើពេលនោះ យើងញោះទៅដោយការជឿទៅលើព័ត៌មានចារកម្ម ដែលទាក់ទងជាមួយនឹងការឃុបឃិតរបស់ អ៊ី ឈាន ជាមួយនឹង តាម៉ុក ប៉ៃលិនមិនចាំបាច់ខ្មែរក្រហមវាយយកទៅវិញទេ គឺគ្រាន់តែបងប្អូនប៉ៃលិន មិនធ្វើសមាហរណកម្ម ឬក៏ងាកទៅរកខ្មែរក្រហមវិញ ក៏គ្រប់គ្រាន់ដើម្បីបំផ្លាញចោលនូវការខិតខំប្រឹងប្រែងរបស់យើងដែរ។ នោះហើយជាបញ្ហា ទាក់ទងជាមួយនឹងបញ្ហាការវិភាគនិងវាយតម្លៃសភាពការណ៍ យើងបានយល់ព្រមថា អ៊ី ឈាន, សុខ ភាព ជាពិសេស អ៊ី ឈាន ហ្នឹងហើយដែរជាអ្នកដេញវាយ តាម៉ុក, រឿងអី អ៊ី ឈាន ទៅចរចារជាមួយ តាម៉ុក ទៅកើត? វាមិនអាចទៅរួចទេ! ជាបន្តបន្ទាប់គឺយើង បានធ្វើកិច្ចការដ៏ល្អជាមួយគ្នា»។
ជុំវិញបញ្ហានេះ សម្ដេចបានផ្ញើសារ ទៅកាន់អ្នកដែលមានបំណងចង់បំបែកបំបាក់គណបក្សប្រជាជនកម្ពុជា សូមកុំបំបែកឱ្យសោះ ព្រោះថាអ្នកដែលចង់បំបែកគណបក្សប្រជាជនកម្ពុជា តែងតែបែកខ្លួនឯងទាំងអស់ ច្រើនបក្សហើយដែលចង់បំបែកគណបក្សប្រជាជនកម្ពុជា គឺតែងតែបែកបក្សខ្លួនឯងវិញទាំងអស់។ ហើយសម្ដេចបានបញ្ជាក់ថា សម្ដេចនៅតែបន្តធ្វើ និងការពារគណបក្សប្រជាជនកម្ពុជា។ អស់រយៈពេលជាង៥៥ឆ្នាំហើយ គ្មាននរណាម្នាក់អាចបំបែក គណបក្សប្រជាជនកម្ពុជា ឬសម្ព័ន្ធភាពរបស់គណបក្សប្រជាជនកម្ពុជា ដែលកើតចេញពី ៥ភូមិភាគក្នុងប្រទេសកម្ពុជានេះម្ដងណាឡើយ៕
