(ព្រះសីហនុ)៖ លោក ឃាង ភារម្យ នាយកទីចាត់ការផែនការ និងវិនិយោគសាលាខេត្តព្រះសីហនុ លោក សល់ឡេះ យូសុះ អភិបាលរងស្រុកព្រៃនប់ លោក នាង ណេង សមាជិកក្រុមប្រឹក្សាស្រុក បានដឹកនាំកិច្ចប្រជុំ និងដាក់ឱ្យដំណើរការដេញថ្លៃសាងសង់គម្រោងមូលនិធិឃុំ-សង្កាត់ចំនួន៤ ក្នុងស្រុកព្រៃនប់ ខេត្តព្រះសីហនុ។
កិច្ចប្រជុំ និងដាក់ឱ្យដំណើរការដេញថ្លៃសាងសង់គម្រោងមូលនិធិឃុំ-សង្កាត់ចំនួន៤ បានធ្វើឡើងនៅព្រឹកថ្ងៃទី៣ ខែមេសា ឆ្នាំ២០២៥ ដោយមានការចូលរួមពីក្រុមការងារបច្ចេកទេសគាំទ្រ ឃុំ សង្កាត់ តំណាងរដ្ឋបាលស្រុក គណៈកម្មការលទ្ធកម្មឃុំទាំង៤ ក្រុមហ៊ុនទទួលការសាងសង់ និងអ្នកសារព័ត៌មានជាច្រើនរូបទៀត នៅសាលប្រជុំសាលាស្រុកព្រៃនប់។
កិច្ចប្រជុំបើកសំណើដេញថ្លៃនេះដែរបានដំណើរការដោយរលូនស្របតាមនីតិវិធី និងប្រកបដោយតម្លាភាព ជាលទ្ធផលទទួលបានដូចជា ទី១៖ ឃុំសាមគ្គី គម្រោងសាងសង់ផ្លូវបេតុងប្រវែង ៤៤០ម៉ែត្រ ទទឹង ៥ម៉ែត្រ កម្រាស់០,១៥ម។ ទី២៖ ឃុំទឹកល្អក់ គម្រោងសាងសង់ផ្លូវបេតុងប្រវែង ៤៤០ម៉ែត្រ, ទទឹង៥ម៉ែត្រ, កម្រាស់០,១៥ម។ ទី៣៖ ឃុំទឹកថ្លា គម្រោងសាងសង់ផ្លូវបេតុងប្រវែង ៤៧០ម៉ែត្រ, ទទឹង៥ម៉ែត្រ, កម្រាស់០,១៥ម។ ទី៤៖ ឃុំវាលរិញ គម្រោងសាងសង់ផ្លូវបេតុងប្រវែង ៥៥០ម៉ែត្រ, ទទឹង ៥ម៉ែត្រ, កម្រាស់ ០,១៥ម៉្រែត។
នាឱកាសនោះលោក ឃាង ភារម្យ បានធ្វើការវាយតម្លៃខ្ពស់ទៅលើលទ្ធផលការចូលរួមដេញថ្លៃ គឺបានផលល្អប្រសើរ រីឯដំណើការទាំងអស់នៃកម្មពិធី គឺស្របទៅតាមនីតិវិធី ក្នុងនោះក្រុមហ៊ុនដែលទទួលបានគម្រោងត្រូវអនុវត្តទៅតាមបទដ្ឋានបច្ចេកទេស ដើម្បីធានាបានគុណភាព និងការប្រើប្រាស់បានយូរអង្វែង។
នាឱកាសនោះដែរលោកលោក ឃាង ភារម្យ ក៏បានផ្ដាំផ្ញើទៅដល់ក្រុមហ៊ុនទទួលការសាងសង់ ត្រូវអនុវត្តគម្រោងដោយអនុលោមទៅតាមបទដ្ឋានបច្ចេកទេស ដើម្បីធានាបានគុណភាព និងការប្រើប្រាស់បានយូរអង្វែង និងសូមឱ្យគណៈកម្មការក៏ដូចជាក្រុមប្រឹក្សាឃុំ ត្រូវពង្រឹងការតាមដានការអនុវត្តគម្រោងរបស់ក្រុមហ៊ុនទទួលការ និងត្រូវមានសៀវភៅការដ្ឋានកត់ត្រាឱ្យបានច្បាស់លាស់ដោយចាប់ផ្ដើមពីដំណើរការបើកការដ្ឋានការអនុវត្តគម្រោងហូតដល់បញ្ចប់ការអនុវត្តគម្រោង។
ក្នុងនោះលោកនាយកទីចាត់ការ ក៏បានស្នើឱ្យក្រុមប្រឹក្សាឃុំ បានធ្វើការបំផុសចលនាប្រជាពលរដ្ឋ ឱ្យចូលរួមការដាំដើមឈើនៅតាមបណ្ដោយផ្លូវ ដើម្បីលើកកម្ពស់ សោភ័ណ្ឌភាព ភាពបៃតងនៅក្នុងមូលដ្ឋានភូមិរបស់ខ្លួន ជាពិសេសចូលរួមថែរក្សាថែទាំសមិទ្ធផលផ្លូវបេតុង ក៏ដូចជាប្រព័ន្ធលូដែលបានដាក់ដេញថ្លៃនាពេលនេះ និងស្ថាបនានៅពេលខាងមុខឱ្យបានគង់វង្ស និងធានាបានការប្រើប្រាស់បានយូរអង្វែងផងដែរ៕
