(បាត់ដំបង)៖ រដ្ឋបាលបាលខេត្តបាត់ដំបង សហការជាមួយ សហភាពសហព័ន្ធយុវជនកម្ពុជា ខេត្តបាត់ដំបង នឹងរៀបចំព្រឹត្តិការណ៍ «សង្ក្រាន្តបាត់ដំបង ២០២៥» ក្នុងគោលបំណងបង្កើតភាពសប្បាយរីករាយ ជូនដល់បងប្អូន ប្រជាពលរដ្ឋក្នុង ឱកាសពិធីបុណ្យចូលឆ្នាំថ្មីប្រពៃណីជាតិខ្មែរនាពេលខាងមុខ។
ដើម្បីផ្សព្វផ្សាយពីវប្បធម៌ប្រពៃណីដ៏ល្អផូរផង់ រដ្ឋបាលខេត្តបាត់ដំបង បានរៀបចំកម្មវិធីសិល្បៈ ការលេងល្បែងប្រជាប្រិយផ្សេងៗ ជាពិសេសចង់បង្ហាញដល់ភ្ញៀវជាតិ និងអន្តរជាតិ ឱ្យស្គាល់ពីទំនៀមទម្លាប់នៃការរស់នៅក៏ដូចជា សក្តានុពលនានារបស់ខេត្តបាត់ដំបង តាមរយៈការរៀបចំដាក់តាំងបង្ហាញនូវផលិតផលតាមបណ្តាក្រុង ស្រុកទាំង១៤ ការតាំងបង្ហាញមុខម្ហូប អ្នកបាត់ដំបង ដូងខ្ទះយក្ស ក្រូចយក្ស ទុរេនយក្ស ណែមយក្ស ព្រមទាំងមានតំបន់ត្រជាក់ចិត្ត តំបន់ពាងទឹក សម្រាប់បងប្អូនប្រជាពលរដ្ឋមកលេងទឹកកំសាន្ត ដោយជៀសវាងការគប់ទឹក ប៉ាតម្សៅ តាមដងផ្លូវ ដែលអាចបណ្តាលឱ្យមានគ្រោះថ្នាក់ជាយថាហេតុ។
នៅពេលរាត្រីមានការបាញ់កាំជ្រួចនៅម៉ោង៧៖០០នាទី រយៈពេលចំនួន ០៣ថ្ងៃ (ថ្ងៃទី១៤-១៥-១៦ ខែមេសា ឆ្នាំ២០២៥) មិនត្រឹមតែប៉ុណ្ណោះក៏មានការប្រគុំតន្ត្រី ការប្រកួតកីឡា ប្រដាល់គុនខ្មែរ ព្រមទាំងមានការរៀបចំតុបតែងលម្អភ្លើងពណ៌ប្រកបដោយសោភ័ណភាព នៅតាមទីតាំងសំខាន់ៗនានាក្នុងក្រុងបាត់ដំបង ដើម្បីត្រៀមស្វាគមន៍បងប្អូនប្រជាពលរដ្ឋមកផ្តិតយករូបភាពដ៏ស្រស់ត្រកាលនេះផងដែរ។
ព្រឹត្តិការណ៍ «សង្ក្រាន្តបាត់ដំបង ២០២៥» នឹងប្រព្រឹត្តទៅនាថ្ងៃទី១៣ ដល់ថ្ងៃទី១៦ ខែមេសា ឆ្នាំ២០២៥ នៅបរិវេណសួនវិមានឯករាជ្យ ស្ថិតក្នុងភូមិកម្មករ សង្កាត់ស្វាយប៉ោ ក្រុងបាត់ដំបង ខេត្តបាត់ដំបង។
រដ្ឋបាលខេត្តបាត់ដំបង សង្ឃឹមយ៉ាងមុតមាំថា សាធារណជន ប្រជាពលរដ្ឋ ភ្ញៀវជាតិ អន្តរជាតិទាំងនៅក្នុងប្រទេសនិងក្រៅប្រទេស នឹងមកចូលរួមទស្សនាកំសាន្តក្នុងព្រឹត្តិការណ៍ «សង្ក្រាន្តបាត់ដំបង២០២៥» ឱ្យបានច្រើនកុះករអធិកអធម ដើម្បីអបអរសាទរពិធីបុណ្យចូលឆ្នាំថ្មី និងលើកស្ទួយវប្បធម៌ទំនៀមទម្លាប់ប្រពៃណីជាតិខ្មែរ៕
