(ឧត្តរមានជ័យ)៖ លោក អ៊ុន ចាន់ដា អភិបាលខេត្តកំពង់ចាម នៅព្រឹកថ្ងៃទី៥ ខែមេសា ឆ្នាំ២០២៥ បានដឹកនាំប្រតិភូអញ្ជើញចុះសួរសុខទុក្ខ សំណេះសំណាល និងនាំសម្ភារ ថវិកា ដែលជាអំណោយដ៍ថ្លៃថ្លារបស់សម្តេចមហាបវរ ធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា និងលោកជំទាវបណ្ឌិត ចែកជូននាយទាហាន នាយទាហានរង និងពលទាហាន អង្គភាពកងពលតូចអន្តរាគមន៍លេខ៦ ចំណុះកងពលធំអន្តរាគមន៍លេខ២ ដែលជាអង្គភាពសម្ព័ន្ធ មេត្រីភាព ក្នុងឱកាសពិធីបុណ្យចូលឆ្នាំថ្មីប្រពៃណីជាតិខ្មែរ។
លោក អ៊ុន ចាន់ដា បានថ្លែងថា សម្ព័ន្ធមេត្រីភាពរវាងកងពលតូចអន្តរាគមន៍លេខ៦ ជាមួយរដ្ឋបាលខេត្តកំពង់ចាម គឺយោងទៅតាមការសម្រេចរបស់រាជរដ្ឋាភិបាល ហើយរដ្ឋបាលខេត្តកំពង់ចាម តែងតែចំណាយពេលវាលាក្នុង ការចូលរួម លើកទឹកចិត្ត សួរសុខទុក្ខ និងសំណេះសំណាល ជាមួយនាយទាហាន ពលទាហាន នៃកងពលតូចអន្តរាគមន៍លេខ៦ ដែលជាកងពលសម្ព័ន្ធមេត្រីភាព ដែលបញ្ជាក់ពីការគាំទ្រ ការថ្លែងអំណរគុណកងកម្លាំងយើង ទាំងអស់ ហើយក៏ជាការឱ្យនូវគុណតម្លៃខ្ពស់របស់កងកម្លាំងប្រដាប់អាវុធ ក្នុងការការពារបូរណភាពទឹកដីរបស់យើង។
នៅក្នុងឱកាសនោះ អភិបាលខេត្តកំពង់ចាម បានផ្តាំផ្ញើសាកសួរសុខទុក្ខពីសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា និងលោកជំទាវបណ្ឌិត ពេជ ចន្ទមុន្នី ផ្ញើជូននាយទាហាន នាយទាហានរង និងពលទាហាន ទាំងអស់ នៃកងពលតូចអន្តរាគមន៍លេខ៦ បើទោះបីសម្តេចនាយករដ្ឋមន្ត្រី ខកខានជួបជាមួយបងប្អូនមួយរយៈ យ៉ាងណាក៏ដោយ ប៉ុន្តែការជួបប្រជុំជាប្រចាំបានដាក់ចេញគោលការណ៍បទបញ្ជា ដោយសម្តេចតែងនឹករលឹកកងកម្លាំង របស់យើង ហើយនៅក្នុងឱកាសឆ្នាំថ្មីនេះសម្តេចបានជូនពរ សូមទេវតាឆ្នាំថ្មី ប្រសិទ្ធពរជ័យជូនកងកម្លាំងកងយោធពលខេមរភូមិន្ទយើងទាំងអស់ មានសុខភាពល្អ ទទួលបាននូវសេចក្តីសុខ សេចក្តីចម្រើន។
លោក អ៊ុន ចាន់ដា បានថ្លែងទៀតថា សភាពការណ៍នៅតាមបន្ទាត់ព្រំដែនកម្ពុជា-ថៃ បច្ចុប្បន្ននេះមានសភាពស្ងប់ស្ងាត់ល្អ ប៉ុន្តែរយៈពេល១ខែមុន មានបញ្ហាខ្លះៗដែលបង្កដោយមិត្តភ័ក្រនៅជាប់របងជាមួយយើង បានបង្កើតនូវ បាតុភាពអ្វី ឬសកម្មភាពអ្វីមួយអុជអាលឱ្យមានការប៉ះទង្គិចគ្នា ប៉ុន្តែកម្លាំងកងយោធពលខេមរភូមិន្ទរបស់យើងនៅទីនេះ គឺស្តាប់បទបញ្ជា ស្តាប់គោលការណ៍ពីមេបញ្ជាការ ពីប្រមុខរាជរដ្ឋាភិបាល ទើបយើងរក្សាបាននូវភាព ស្ងៀមស្ងាត់មកដល់ពេលនេះ ប៉ុន្តែបើយើងប្រើកម្លាំងទល់នឹកកម្លាំង គឺចៀសមិនរួចពីការប៉ះទង្គិចគ្នា ហើយនាំមកនៅការខូចខាតទាំងសងខាង ដូច្នេះហើយទើបប្រមុខរាជរដ្ឋាភិបាលបានដាក់បទបញ្ជាយ៉ាងម៉ឺងម៉ាត់ សូមឱ្យកងកម្លាំង យើងរក្សាគោលជំហរ ស្តាប់នូវគោលការណ៍ បទបញ្ជារបស់មេបញ្ជាការ និងការរក្សាស្ថានភាពល្អមកដល់ពេលនេះ កើតឡើងដោយការតាំងចិត្ត គោរពបទបញ្ជាយ៉ាងម៉ឺងម៉ាត់ របស់កងយោធពលខេមរភូមិន្ទរបស់យើងនៅទីនេះ។
លោក អ៊ុន ចាន់ដា បានថ្លែងលើកទឹកចិត្ត និងគាំទ្រចំពោះកងកម្លាំងកងទ័ពកងពលតូចអន្តរាគមន៍លេខ៦ ដែលបានអនុវត្តន៍នៅបទបញ្ជាបានល្អ ពីសំណាក់ប្រមុខរាជរដ្ឋាភិបាល គឺយើងធ្វើម៉េចថែរក្សាខ្សែបន្ទាត់ព្រំដែនរបស់យើង ជាព្រំដែនសន្តិភាព ព្រំដែនមិត្តភាព ព្រំដែនដែលមានកិច្ចសហប្រតិបត្តការ និងការអភិវឌ្ឍន៍ នឹងបានប្រែក្លាយព្រំដែនដែលធ្លាប់តែមានសង្គ្រាម ធ្លាប់តែលឺសម្លេងគ្រប់កាំភ្លើង ធ្លាប់តែធុំក្លិនរំសេវ ទៅជាកន្លែងបង្កើតនូវមុខរបរ អាជីវកម្ម កន្លែងសប្បាយ កន្លែងទេសចរណ៍ កន្លែងដែលមានការទំនាក់ទំនងបង្កើននូវមិត្ត ហើយប្រែក្លាយកន្លែងគ្រាប់រំសេវ ទៅជាការប្រគុំតន្ត្រី លឺសម្លេងភ្លេងពិរោះរណ្តំ។
លោកអភិបាលខេត្តកំពង់ចាម បានថ្លែងបញ្ជាក់ទៀតថា ថ្ងៃនេះវត្តមានរបស់ប្រតិភូខេត្តកំពង់ចាមទាំងអស់ ដែលបានចំណាយពេលវេលាចុះមកជួបសំណេះសំណាលជាមួយកងទ័ពកងពលតូចអន្តរាគមន៍លេខ៦ ក្នុងឱកាសបុណ្យ ចូលឆ្នាំថ្មី គឺជាការផ្តល់នូវសេចក្តីទុកចិត្ត និងការគាំទ្រ និងការឱ្យតម្លៃខ្ពស់ណាស់ លើការលះបង់របស់បងប្អូននៅក្នុងការការពារបូរណៈភាពទឹកដី មិនឱ្យមានការឈ្លានពាន មិនឱ្យមានការរំខានពីសំណាក់បរទេសដែលមានបំណងមិនល្អចំពោះប្រទេសរបស់យើង។
លោកក៏បានស្នើកងកម្លាំងរបស់យើងក្តាប់ឱ្យជាប់នៅសភាពការណ៍ ទាំងសភាពការណ៍នយោបាយ សន្តិសុខ ពិសេសត្រូវមើលគ្រប់គ្រងស្ថានភាពភូមិសាស្ត្រឱ្យបានច្បាស់លាស់។
អំណោយដ៏ថ្លៃថ្លារបស់សម្តេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ដែលនាំមកប្រគល់ជូននាពេលនេះមាន៖ រថយន្តម៉ាកស្តារិចចំនួន ២គ្រឿង ឧបត្ថម្ភកងពលធំអន្តរាកមន៍លេខ២ ថវិកាចំនួន១០លានរៀល កងពលតូចអន្តរាគមន៍លេខ៦ ថវិកាចំនួន៥០លានរៀល ឧបត្ថម្ភនាយទាហាន នាយទាហានរង និងពលទាហានចំនួន ១,៣៥៥នាក់ ក្នុងម្នាក់ៗទទួលបានថវិកា៣ម៉ឺនរៀល, ភេសជ្ជៈប៉ូវកម្លាំងចំនួន២០០កេស, ស្រាប៊ៀ ចំនួន៣០០កេស មីចំនួន២០០កេស, បន្លែមួយចំនួន សាច់ជ្រូកចំនួន២០០គីឡូក្រាម សាច់មាន់ ចំនួន៣១០គីឡូក្រាម សម្ភារបរិក្ខា និងថ្នាំពេទ្យចំនួន២១មុខផងដែរ៕
