(ភ្នំពេញ)៖ កម្ពុជា-ចិន ទើបតែបានបិទបញ្ចប់ឆ្នាំនៃការផ្លាស់ប្ដូរប្រជាជននិងប្រជាជន ប្រកបដោយភាពជោគជ័យនាថ្ងៃទី០២ ខែមីនា កន្លងទៅ ហើយជំនួសមកវិញនូវឆ្នាំ២០២៥ ដែលជា «ឆ្នាំទេសចរណ៍កម្ពុជា-ចិន»។ បើតាមការប្រសាសន៍របស់ សម្ដេចបវរធិបតី ហ៊ុន ម៉ាណែត បើទោះជា «ឆ្នាំនៃការផ្លាស់ប្តូរប្រជាជននិងប្រជាជនកម្ពុជា-ចិន» ត្រូវបានបិទបញ្ចប់ក៏ពិតមែន ប៉ុន្តែភាគីកម្ពុជា-ចិន នៅតែបន្តជំរុញការផ្សព្វផ្សាយវប្បធម៌ ប្រពៃណី និងសក្តានុពលទេសចរណ៍ជាមួយគ្នា ហើយនឹងបន្តចូលរួមដល់ការពង្រឹងចំណងមិត្តភាព និងកិច្ចសហប្រតិបត្តិការល្អលើវិស័យទេសចរណ៍ និងពាណិជ្ជកម្មរវាងប្រទេសទាំងពីរ។

ជាមួយគ្នានេះផងដែរ នៅពេលឆាប់ៗខាងមុខនេះ កម្ពុជានឹងមានទស្សនកិច្ច របស់ លោកប្រធានាធិបតីចិន ស៊ី ជីងភីង។ យើងក៏ចាប់អារម្មណ៍ដែរថាតើ លោកនឹងនាំយកនូវកម្រិតនៃទំនាក់ទំនងនៃប្រទេសទាំង២ កម្ពុជា-ចិន ឈានឡើងដល់កម្រិតណាទៅ ហើយទទួលបានផ្លែផ្កាអ្វីខ្លះ បន្ទាប់ពីកម្ពុជា-ចិន បានដំឡើងកម្រិតទំនាក់ទំនាក់ទំនងឈានដល់ កិច្ចសហប្រតិបត្តិការឆកោណត្បូងពេជ្រហើយនោះ?

ដើម្បីឆ្លើយតបនឹងប្រធានបទនេះ យើងមានវាគ្មិនកិត្តិយស២រូប ដែលនឹងអញ្ជើញចូលរួមបកស្រាយលើប្រធានបទនេះនោះគឺ៖

- លោកបណ្ឌិត ឆេង គឹមឡុង៖ ប្រធានវិទ្យាស្ថានចក្ខុវិស័យអាស៊ី (AVI)
- លោកបណ្ឌិត យង់ ពៅ៖ អ្នកជំនាញវិទ្យាសាស្រ្តនយោបាយ

ដូច្នេះសូមរង់ចាំកិច្ចពិភាក្សាទាំងស្រុង នៅម៉ោង៦ល្ងាចនេះ ដែលនឹងផ្សាយតាមកញ្ចក់ទូរទស្សន៍ និងបណ្តាញនានារបស់ Fresh News៕