(កំពង់ឆ្នាំង)៖ មន្ទីរសុខាភិបាលខេត្តកំពង់ឆ្នាំង កាលពីព្រឹកថ្ងៃទី៤ ខែមេសា ឆ្នាំ២០២៥ បានប្រារព្ធពិធីបិទអង្គសន្និបាតបន្ទាប់ពីអង្គសន្និបាតរយៈពេល២ថ្ងៃ ក្រោមអធិបតីភាពលោក ង៉ូវ កាង រដ្ឋលេខាធិការក្រសួងសុខាភិបាល និងមានការអញ្ជើញចូលរួមពីលោក ប្រាក់ វ៉ុន ប្រធានមន្ទីរសុខាភិបាលខេត្តកំពង់ឆ្នាំង, លោក ទុំ សម្បត្តិ ប្រធានមន្ទីរពេទ្យបង្អែកខេត្តកំពង់ឆ្នាំង ថ្នាក់ដឹកនាំមន្ទីរសុខាភិបាលគ្រប់លំដាប់ថ្នាក់ ការិយាល័យសុខាភិបាល ស្រុកប្រតិបត្តិ, មណ្ឌលសុខភាព, ប៉ុស្តិ៍សុខភាព, ប្រធានមន្ទីរជំនាញពាក់ព័ន្ធតំណាងអង្គ ការដៃគូរអភិវឌ្ឍន៍សរុបប្រមាណ១៣៥នាក់។

ក្នុងពិធីខាលើនេះ ក៏មានបទបង្ហាញស្ដីពីកម្មវិធីប្រយុទ្ធ និងជំងឺមិនឆ្លង, កម្មវិធីសុខភាពបន្តពូជ, សុខភាពមាតា, ទារក, កុមារ និងអាហាររូបត្ថម្ភ កម្មវិធីប្រយុទ្ធនិងជំងឺឆ្លង, និយ័តកម្មសុខាភិបាល និងបទបង្ហាញមេរៀនបទពិសោធន៍ ការផ្ដល់សេវាសាធារណៈគំរូរបស់មន្ទីរខេត្តកំពង់ឆ្នាំង។

លោក ប្រាក់ វ៉ុន បានលើកឡើងឲ្យដឹងថា ក្រោមម្លប់ នៃសន្តិភាព និងដោយមានការគាំទ្រយ៉ាងសកម្មពីលោកសាស្ត្រាចារ្យរដ្ឋមន្ត្រី ថ្នាក់ដឹកនាំក្រសួងសុខាភិបាល និងដោយមានការណែនាំផ្ទាល់ពីលោកអភិបាលខេត្តកំពង់ឆ្នាំង នៅឆ្នាំ២០២៤ មន្ទីរសុខាភិបាលខេត្តសម្រេចបាននូវសមិទ្ធផលធំៗជាច្រើន ស្របតាមផែនការប្រតិបត្តិប្រចាំឆ្នាំ និងគោលដៅយុទ្ធសាស្ត្ររបស់ក្រសួងសុខាភិបាល។

ជាក់ស្ដែង គឺធានាបាននូវការផ្ដល់សេវាជូនប្រជាជនទាន់ពេល និងអនុវត្តបានត្រឹមត្រូវទៅតាមគោលការណ៍ណែនាំនានារបស់ក្រសួងសុខាភិបាល មន្ទីរសុខាភិបាលគ្រប់លំដាប់ថ្នាក់បានចូលរួមផ្ដល់សេវាយ៉ាងស្រស្រាក់ស្រស្រាំសំដៅ លើកកម្ពស់ស្ថានភាពសុខភាពជូនប្រជាជនឲ្យកាន់ តែល្អប្រសើរប្រកបដោយឥរិយាបថល្អ។

លោកប្រធានមន្ទីរសុខាភិបាល បានបន្តឲ្យដឹងទៀតថា ដោយឡែកហេដ្ឋារចនាសម្ព័ន្ធនៅក្នុងមន្ទីរពេទ្យ គឺបានរៀបចំកែលម្អឲ្យមានបន្ទប់សង្គ្រោះបន្ទាន់ចំនួន២បន្ទប់ និងសាងសង់ជួសជុលពង្រីកអគារជំងឺកុមារ១ខ្នង និងការបំពាក់ គ្រែសម្រាកនៅមន្ទីរពេទ្យបង្អែកកំពង់ត្រឡាច កែលម្អអគារពិគ្រោះជំងឺដំបូង, អគារវះកាត់រៀបចំឲ្យមានបន្ទប់វះកាត់ចំនួន៤បន្ទប់ និងហេដ្ឋារចនាសម្ព័ន្ធផ្សេងទៀត ដូចជា ប្រព័ន្ធលូបង្ហូរ ទឹកភ្លៀង និងទឹកកខ្វក់ រៀបចំបន្ទប់ទឹកបន្ទប់បោកគក់ បន្ទប់សម្លាប់មេរោគលើសម្ភារប្រើប្រាស់នៅមន្ទីរពេទ្យខេត្ត។ល។។

ដោយឡែកឱសថបរិក្ខារ និងបរិក្ខាពេទ្យ មន្ទីរពេទ្យខេត្តបានបំពាក់សម្ភារវះកាត់ដូចជាម៉ាស៊ីនដាក់ថ្នាំសណ្ដំ, គ្រែវះកាត់, អំពូលភ្លើងហ្វាវះកាត់ និងសម្ភារសង្គ្រោះបន្ទាន់ ម៉ាស៊ីនលាងឈាម២គ្រឿងបានទទួលឱសថព្យាបាល ទឹកនោមផ្អែម លើសសម្ពាធឈាមមានក្នុងស្តុកជាប្រចាំ។ បំពាក់ឧបករណ៍កម្ដៅទារក ឧបករណ៍តាមដានការកន្ត្រាក់ស្បូននៅបន្ទប់សំរាលកូនក្នុងមន្ទីរពេទ្យបង្អែកកំពង់ត្រឡាច។

ចំពោះធនធានមនុស្ស និងការគ្រប់គ្រង៖ មន្ត្រីសុខាភិបាលសរុបចំនួន៨២៧នាក់ បានវាយតម្លៃដំឡើងថ្នាក់តាមវេនប្រចាំឆ្នាំចំនួន៤៩២នាក់ និង២៧៨នាក់សម្រាប់ឆ្នាំ២០២៥។ ការបណ្ដុះបណ្ដាលជំនាញវេជ្ជសាស្ត្របន្ថែមដល់ គ្រូពេទ្យ គិលានុបដ្ឋាក ដោយបានបញ្ជូនក្រុមគ្រូពេទ្យទៅកម្មសិក្សា និងអនុវត្តនៅមន្ទីរ ពេទ្យជាតិនានា ដូចជាផ្នែកសង្គ្រោះបន្ទាន់, ផ្នែកវះ កាត់ បានចំនួន២២នាក់។

លោក ង៉ូវ កាង បានផ្ដាំផ្ញើសួរសុខទុក្ខពីសំណាក់លោកសាស្ត្រាចារ្យរដ្ឋមន្ត្រីក្រសួងសុខាភិបាល មកដល់ថ្នាក់ដឹកនាំ និងបុគ្គលិកនៃមន្ទីរសុខាភិបាលខេត្តកំពង់ឆ្នាំងទាំងអស់ ក្នុងក្តីនឹករលឹក និងប្រកបដោយមនោសញ្ចេតនាស្រឡាញ់ រាប់អានយ៉ាងជ្រាលជ្រៅជាទីបំផុត។

លោករដ្ឋលេខាធិការ បានកោតសរសើរ និងវាយតម្លៃខ្ពស់ដល់ថ្នាក់ដឹកនាំ និងបុគ្គលិកនៃមន្ទីរសុខាភិបាលខេត្តកំពង់ឆ្នាំងទាំងអស់ ដែលបានយកចិត្តទុកដាក់បំពេញតួនាទីភារកិច្ចរបស់ខ្លួនក្នុងការជួយសង្គ្រោះអាយុជីវិតប្រជា ពលរដ្ឋប្រកបដោយភាពទទួលខុសត្រូវខ្ពស់។ ការខិតខំប្រឹងប្រែងយកអស់ពីកម្លាំងកាយចិត្តរបស់ថ្នាក់ដឹកនាំ និងបុគ្គលិកសុខាភិបាលកន្លងមក លោកបានចូលរួមអបអរសារទរមន្ទីរសុខាភិបាលខេត្តកំពង់ឆ្នាំង ដែលមានមន្ទីរពេទ្យ ចំនួន២បានទទួលជ័យលាភី ជាមន្ទីរពេទ្យបង្អែកកម្រិត៣បានទទួលចំណាត់ថ្នាក់លេខ៤ កំពង់ត្រឡាចជាមន្ទីរពេទ្យកម្រិតលេខ១ ទទួលបានចំណាត់ថ្នាក់លេខ៥ ក្នុងក្របខណ្ឌទូទាំងរាជធានី-ខេត្ត និងលើកទឹកចិត្តឲ្យគ្រប់មូ លដ្ឋានសុខាភិបាលទាំងអស់ បន្តរក្សានូវគុណតំលៃនិងកេរិ៍ឈ្មោះរបស់យើង អោយកាន់តែល្អជានិរន្ត។

បន្ថែមលើនោះលោកបានផ្តល់នូវអនុសាសន៍ណែនាំលើកិច្ចការដែលបន្តអនុវត្តអោយទទួលជោគជ័យប ន្ថែមទៀតដូចខាងក្រោម៖

*ទី១៖ បន្តពង្រឹងមុខងារ និងសមត្ថភាពមណ្ឌលសុខ ភាពឱ្យកាន់តែរឹងមាំ ក្នុងការផ្តល់សេវាអប់រំសុខភាព សេវាបង្ការជំងឺ និងសេវាព្យាបាលដែលមានគុណភា ពនិងសុវត្ថិភាព ដើម្បីប្រជាជនមូលដ្ឋានទទួលបានសេវាថែទាំសុខភាព ស្របតាមលក្ខខណ្ឌបច្ចេកទេ សព្រមទាំងរក្សាទំនាក់ទំនងជិតស្និទ្ធ ជាមួយប្រជាជ នមូលដ្ឋាន និងជំរុញការចូលរួមរបស់សហគមន៍ក្នុង ការថែរក្សាសុខភាពដែលជាទ្រព្យធនដ៏សំខាន់សម្រា ប់ការលើកកម្ពស់ជីវភាពរស់នៅ និងការអភិវឌ្ឍមូល ដ្ឋាន។

*ទី២៖ បន្តពង្រឹងសមត្ថភាពបច្ចេកទេសនៃមន្ទីរពេទ្យបង្អែកស្រុកឱ្យក្លាយជាបង្អែកដ៏រឹងមាំរបស់មណ្ឌលសុខភាព ដូចនេះមន្ទីរពេទ្យស្រុកត្រូវមានសមត្ថភាពបច្ចេកទេសសមស្របតាមនិយាមស្តង់ដាដើម្បីគ្រប់ គ្រងករណីអ្នកជំងឺ ឬជនរងគ្រោះដែលបានបញ្ជូនម កពីមណ្ឌលសុខភាព ជាពិសេសករណីសង្គ្រោះបន្ទាន់។

*ទី៣៖ បង្កើនការយល់ដឹងរបស់ប្រជាជនយុវជន និងកុមារ ក្នុងការបង្ការហានិភ័យនៃជំងឺ ជាពិសេសជំងឺ មិនឆ្លង និងការប្រតិបត្តិការផ្លាស់ប្តូរឥរិយាបថហានិ ភ័យសុខភាពព្រមទាំងយកចិត្តទុកដាក់ទទួលខុស ត្រូវលើសុខភាព ផ្ទាល់ខ្លួន តាមរយៈការអប់រំសុខភាពក្នុងមូលដ្ឋានសុខាភិបាល ការចុះផ្តល់សេវាសុខភាពតាមសហគមន៍ និងតាមយន្តការផ្សព្វផ្សាយដើម្បីបញ្ជូនសារអប់រំសុខភាពដល់ប្រជាជននិងសាធារណជន។

*ទី៤៖ ពង្រឹងគុណភាពព័ត៌មាន នៃការផ្តល់សេវាទាំងរដ្ឋ និងឯកជន។ ការផ្តល់សេវាថែទាំសុខភាពមានប្រសិទ្ធភាព និងសក្តិសិទ្ធភាពជាធុរកិច្ចស្នូលនៃប្រព័ន្ធសុខាភិបាលដើម្បីសង្គ្រោះអាយុជីវិត និងបង្កើនលទ្ធផលសុខភាពអ្នកជំងឺ ឱ្យកាន់តែប្រសើរឡើង។

*ទី៥៖ ត្រូវបន្តការជំរុញឱ្យមានសេវា ២៤ម៉ោងក្នុងមួយថ្ងៃ និង៧ថ្ងៃ ក្នុងមួយសប្តាហ៍នៅមណ្ឌលសុខភាព និងមន្ទីរពេទ្យបង្អែកគ្រប់កម្រិតទូទាំងខេត្ត និងចូលរួមកែលម្អនូវចំណុចអសកម្មរបស់បុគ្គលិកមួយចំនួន តូចអោយបានប្រសើទាំងអស់គ្នា៕