(ភ្នំពេញ)៖ លោកស្រី យក់ សម្បត្ដិ រដ្ឋលេខាធិការក្រសួងសុខាភិបាល បានស្នើឱ្យមានការបន្តនូវកិច្ចសហការគ្នារវាងគ្រប់ភាគីពាក់ព័ន្ធទាំងអស់ បន្តជួយបង្កើននូវការស្វែងរកអ្នកដែលមានផ្ទុកមេរោគរបេង និងមានជំងឺរបេង ដែលមានប្រមាណ ៣៥%ផ្សេងទៀត ដែលនៅមិនទាន់ទទួលការធ្វើរោគវិនិច្ឆ័យ និងទទួលបានការព្យាបាល។
ការអំពាវនាវបែបនេះរបស់លោកវេជ្ជបណ្ឌិត យក់ សម្បត្តិ ក្នុងឱកាសអញ្ជើញជាអធិបតីបើកពិធីប្រកាសដាក់ឱ្យដំណើរការជាផ្លូវការគម្រោង SHIFT-TB និង SAPPHIRE នៅថ្ងៃទី៤ ខែមេសា ឆ្នាំ២០២៥ ដែលមានការអញ្ជើញចូលរួមពីសំណាក់លោក Jaques Pellet ឯកអគ្គរដ្ឋទូតបារាំងប្រចាំព្រះរាជាណាចក្រកម្ពុជា និងលោក Derek Yip ឯកអគ្គរដ្ឋទូតអូស្រ្តាលីប្រចាំកម្ពុជា។
លោកស្រីបានថ្លែបន្ដថា ក្រោមការដឹកនាំប្រកបដោយឋាមពល និងឈ្លាសវៃរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា កំពុងបោះជំហានដោយជោគជ័យក្នុងការពង្រឹងវិស័យ សុខាភិបាលជាបន្តបន្ទាប់ ដើម្បីធានានូវការផ្តល់សេវាសុខភាពប្រកបដោយគុណភាព និងឆ្លើយតបនឹងតម្រូវការរបស់ពលរដ្ឋ។ ការគាំទ្រអំពីរាជរដ្ឋាភិបាល ជាពិសេសពីសំណាក់ សមេ្តចនាយករដ្ឋមន្ត្រី បានជួយឱ្យកម្ពុជា នៅតែជាប្រទេសមួយជោគជ័យក្នុងការងារប្រយុទ្ធនឹងជំងឺឆ្លង រួមមានការគ្រប់គ្រង និងឆ្លើយតបចំពោះជំងឺអេដស៍ ជំងឺរបេង និងជំងឺគ្រុនចាញ់ និងទទួលបាននូវការកោតសរសើរពីបណ្តាប្រទេសនានាក្នុងពិភពលោក។
លោកស្រីបានគូសបញ្ជាក់ថា កម្ពុជានៅតែជាប្រទេសដែលជោគជ័យ ក្នុងការគ្រប់គ្រងនូវការរីករាលដាលជំងឺរបេង ដោយយើងបានគ្របដណ្តប់លើការព្យាបាល និងមានអត្រាព្យាបាលជាសះស្បើយ លើសពី ៩០% ដែលនេះគឺជាអត្រាខ្ពស់បំផុតនៅលើពិភពលោក ដែលបានជួយអោយកម្ពុជា ចាកចេញពីប្រទេសទាំង៣០ ដែលមានបន្ទុករបេងខ្ពស់ ចាប់ពីឆ្នាំ ២០២១ ដល់ ២០២៥។ ជោគជ័យនេះ គឺកើតឡើងដោយសារថ្នាក់ដឹកនាំ និងមន្ត្រីសុខាភិបាលនៅគ្រប់កម្រិត និងជាពិសេសដោយមានការយកចិត្តទុកដាក់ និងការគាំទ្រផ្នែកនយោបាយ ដោយផ្ទាល់ពី សម្តេចនាយករដ្ឋមន្ត្រី និងការគាំទ្រនានា ដោយផ្ទាល់អំពីក្រសួងសុខាភិបាល បានធ្វើឱ្យកម្ពុជាបន្តកាត់បន្ថយអត្រាឈឺដោយសារជំងឺរបេង (អាំងស៊ីដង់) ប្រហែល ៤២% (ពីចំនួន ៥៧៩ ករណីក្នុងឆ្នាំ២០០០ មកនៅត្រឹមចំនួន ៣៣៥ករណី ក្នុងចំណោមប្រជាពលរដ្ឋមួយសែននាក់ នៅឆ្នាំ២០២៣) និងការកាត់បន្ថយអត្រាស្លាប់ ៥០% (WHO 2024)។
«ជាមួយនឹងជោគជ័យទាំងនេះ ក្នុងនាមក្រសួងសុខាភិបាល និងក្នុងនាមខ្លួនខ្ញុំផ្ទាល់ ខ្ញុំសូមឆ្លៀតឱកាសថ្លែងអំណរគុណ និងសូមស្នើឱ្យមានការបន្តនូវកិច្ចសហការគ្នារវាងគ្រប់ភាគីពាក់ព័ន្ធទាំងអស់ និងសូមបន្តជួយបង្កើននូវការស្វែងរកអ្នកដែលមានផ្ទុកមេរោគរបេង និងមានជំងឺរបេង ដែលមានប្រមាណ៣៥% ផ្សេងទៀត ដែលនៅមិនទាន់ទទួលការធ្វើរោគវិនិច្ឆ័យ និងទទួលបានការព្យាបាល»។ លោកស្រីបន្ដថា ជាមួយនឹង ការដាក់ចេញនូវគោលនយោបាយគាំពារសង្គមសម្រាប់ជនក្រីក្រ និងជនងាយរងគ្រោះរបស់រាជរដ្ឋាភិបាលកម្ពុជា និងការខិតខំប្រឹងប្រែងរបស់មន្រ្តីសុខាភិបាលនៅគ្រប់កម្រិត ការឧបត្ថម្ភគាំទ្រពីអាជ្ញាធរពាក់ព័ន្ធ ដៃគូអភិវឌ្ឍន៍ និងអង្គការមិនមែនរដ្ឋាភិបាលជាតិ និងអន្តរជាតិ លោកស្រីសង្ឃឹមយ៉ាងមុតមាំថា កម្ពុជានឹងសម្រេចបាននូវចក្ខុវិស័យឆ្ពោះទៅរកការបញ្ចប់ជំងឺរបេង នាឆ្នាំ២០៣០។
បន្ថែមលើសនេះទៀត បើទោះជាក្រសួងសុខាភិបាលទទួលបានជោគជ័យជាច្រើន ក្នុងកិច្ចសហប្រតិបត្តិការជាមួយដៃគូអភិវឌ្ឍន៍ អង្គការ សង្គមស៊ីវិល ក៏វិស័យសុខាភិបាល នៅតែជួបបញ្ហាប្រឈមមួយចំនួនផងដែរ លោកស្រីបានស្នើឱ្យពលរដ្ឋរបស់យើង គប្បីស្វែងរកការថែទាំសុខភាពនៅតាមសេវាសុខភាពសាធារណៈរបស់រដ្ឋ ដែលមានវិជ្ជាជីវៈត្រឹមត្រូវ ដើម្បីចៀសវាងបាននូវការចំណាយថវិកាលើសលប់៕
