(ភ្នំពេញ)៖ ប្រធានរណសិរ្យរំដោះជាតិខ្មែរ លោក សម សេរី បានប្រកាសរំលាយរណសិរ្យរំដោះជាតិ និងរំលាយរដ្ឋាភិបាលនិរទេសរបស់ខ្លួនចោល តាមរយៈលិខិតមួយដែលស្នើសុំរការលើកលែងទោស និងវិលត្រឡប់មករួមរស់ជាមួយសង្គមជាតិវិញ។ Fresh Exclusive មានអត្ថបទអត្ថាធិប្បាយស៊ីជម្រៅមួយជុំវិញបញ្ហានេះ៖

ប្រធានរណសិរ្យរំដោះជាតិខ្មែរ លោក សម សេរី ដែលបានបង្កើតរដ្ឋាភិបាលខ្មែរនិរទេស និងដែលកំពុងរស់នៅប្រទេសដាណឺម៉ាក បានប្រកាសរំលាយរណសិរ្យរំដោះជាតិ និងរដ្ឋាភិបាលនិរទេសនេះចោល និងបានស្នើរកការសុំរណ្តោសប្រណីពីប្រមុខដឹកនាំថ្នាក់កំពូលរបស់កម្ពុជា ដើម្បីការចូលរួមរស់នៅក្នុងសង្គមជាតិខ្មែរវិញក្រោមដំបូលរដ្ឋធម្មនុញ្ញរបស់រាជរដ្ឋាភិបាលកម្ពុជា ក្រោមការដឹកនាំដោយគណបក្សប្រជាជនកម្ពុជា។

លោក សម សេរី បានស្នើសុំរកការសណ្តោសប្រណីលើកលែងទោសនេះ តាមរយៈលិខិតមួយចុះថ្ងៃទី៣ ខែមេសា ឆ្នាំ២០២៥ ពីប្រទេសដាណាម៉ាក គោរពជួនដោយផ្ទាល់ទៅកាន់សម្តេចតេជោ ហ៊ុន សែន ប្រមុខរដ្ឋស្តីទីកម្ពុជា និងជួនសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា។ លោក សម សេរី បានបង្កើតរណសិរ្យរំដោះជាតិខ្មែរតាំងពីឆ្នាំ២០១២ ដែលគេស្គាល់ថាជា ចលនាតស៊ូនយោបាយនៅក្រៅប្រទេសប្រឆាំងរាជរដ្ឋាភិបាលក្នុងស្រុក ប៉ុន្តែចលនារបស់លោក ដែលប៉ុនប៉ងផ្តួលរំលំរាជរដ្ឋាភិបាលនេះ ត្រូវបានគេចាត់ទុកថាជាក្រុមភេរវករ។ ក្រុមបះបោររបស់លោកនៅក្រៅប្រទេសនោះ គ្រាន់តែជាក្រុមដែលបង្កើតជាសម្លេងដើម្បីបង្កការរំខានតែប៉ុណ្ណោះ និងរូបលោកវិះតែនឹងត្រូវបានគេចាប់ខ្លួនក្នុងពេលលូចប្រើប្រាស់ទឹកដីថៃ ចង់ចូលមកបង្កក្តីរំខាននៅផ្ទៃក្នុងដែនដីប្រទេសកម្ពុជា។

តុលាការកម្ពុជា នៅក្នុងឆ្នាំ២០១៦ បានកាត់ទោសកំបាំងមុខលោក សម សេរី នោះឱ្យជាប់ពន្ធនាគារ ៩ឆ្នាំ ក្រោមបទចោទអំពើក្បត់ជាតិ។ លោក សម សេរី បានទទួលសិទ្ធិជ្រកកោននៅប្រទេសដាណឺម៉ាក នៅក្នុងឆ្នាំ២០១១ ហើយរស់នៅក្នុងក្រុង Hundested ជាមួយភរិយានិងកូនស្រីរបស់លោក។ នៅខែមេសា ឆ្នាំ២០១៨, សម សេរី ត្រូវបានគេឃុំខ្លួននៅប្រទេសថៃ ពីបទស្នាក់នៅហួសទិដ្ឋាការ។ ទោះយ៉ាងណាក៏ដោយ បន្ទាប់ពីការអន្តរាគមន៍ពីអង្គការសិទ្ធិមនុស្ស និងស្ថានទូតដាណឺម៉ាក លោកក៏ត្រូវបានគេនិរទេសឱ្យវិលត្រឡប់ទៅប្រទេសដាណឺម៉ាកវិញ។

ប៉ុន្តែក្រោយការឃើញជាបន្តបន្ទាប់នូវពន្លឺសន្តិភាពពិតប្រាកដនៃនយោបាយឈ្នះឈ្នះ ដាក់ចេញដោយសម្តេចអគ្គមហាសេនាបតីតេជោ ហ៊ុន សែន លោក សម សេរី នៅទីបំផុតបានសារភាពទោសកំហុសដែលធ្លាប់បានប្រព្រឹត្តនិងសុំរកភាពសណ្តោសប្រណីលើកលែងទោស។ លិខិតរបស់ សម សេរី ថ្ងៃទី៣មេសាដដែល បានជម្រាបសម្តេចតេជោ និងសម្តេចបវរធិបតី ថា៖ «ផ្អែកលើស្មារតីនិងការរួមសាមគ្គីគ្នាការពារនូវ «សន្តិភាព» និងការថែរក្សាការពារនូវផលប្រយោជន៍ដ៏ឧត្តុងឧត្តមនិងសុភមង្គលរបស់កម្ពុជា, ខ្ញុំបាទ សម សេរី សូមប្តេជ្ញារួបរួមសាមគ្គីគ្នា ជាខ្មែរតែមួយ គោរពតាមច្បាប់រដ្ឋធម្មនុញ្ញនៃព្រះរាជាណាចក្រកម្ពុជា ក្នុងការថែរក្សាសន្តិភាព និងប្រជាធិបតេយ្យសេរីពហុបក្ស រួមគ្នាទប់ស្កាត់នូវការរំលោភច្បាប់នានា»។

ការវិលត្រឡប់មកកម្ពុជាវិញរបស់ សម សេរី គឺជាការបង្ហាញថាសន្តិភាពក្រោមនយោបាយឈ្នះឈ្នះ ដែលបានធ្វើឱ្យប្រទេសមានស្ថិរភាព និងសុខសន្តិភាពយ៉ាងពេញលេញរយៈពេល២៦ឆ្នាំរួចមកនេះ គឺពិតជាពន្លឺនៃសុចរិតភាពដ៏ត្រឹមត្រូវពិតប្រាកដ និងពន្លឺនោះហើយ បានធ្វើឱ្យមនុស្សដែលរងនឹងឧបាយកលនយោបាយជ្រុលនិយម កាន់តែភ្ញាក់រលឹក នាំគ្នាដើរចេញពី ភាពស្រមោលងងឹតដែលចង់នាំប្រទេសជាតិមានសុខសន្តិភាព ធ្លាក់ចូលក្នុងវិបត្តិសង្គ្រាមសាជាថ្មី។

សេចក្តីថ្លែងការណ៍របស់ សម សេរី ដែលប្រកាសការរំលាយចោលនូវរណសិរ្សជាតិខ្មែរ និងរដ្ឋាភិបាលនិរទេសរបស់លោក គឺជាគំរូមួយសម្រាប់ដល់មនុស្សមួយចំនួនទៀតដែលបង្ហាញភាពស្ទាក់ស្ទើរ មិនទាន់ហ៊ានដកខ្លួនចេញពីស្រមោលងងិតនៃភាពជ្រុលនិយម ខណៈរាជរដ្ឋាភិបាលកម្ពុជាក្រោមការកាច់ចង្កូតរបស់គណបក្សប្រជាជនកម្ពុជា តែងបង្ហាញនូវការរង់ចាំទទួលស្វាគមន៍ពួកគេគ្រប់វិនាទី, បន្តបើកដៃទទួលអ្នកដែលមានឆន្ទៈដែលចង់វិលត្រឡប់ ដើម្បីឱបក្រសោបសន្តិភាពពិតប្រាកដ និងការរួមគ្នាជាខ្មែរតែមួយក្នុងស្មារតីអភិវឌ្ឍន៍ជាតិ។

*ជោគជ័យយូរអង្វែង នៃនយោបាយឈ្នះឈ្នះ

នយោបាយឈ្នះឈ្នះរបស់កម្ពុជា ដែលជាចក្ខុវិស័យ និងផ្តួចផ្តើមដោយសម្តេចតេជោ ហ៊ុន សែន គឺជាមូលដ្ឋានគ្រឹះនៃស្ថិរភាពនយោបាយរបស់ប្រទេសជាតិ ដែលក្នុងរយៈពេល ២៦ឆ្នាំកន្លងមកនេះ នយោបាយឈ្នះឈ្នះ របស់លោក មិនត្រឹមតែរក្សាលំនឹងនាវាសន្តិភាពរបស់កម្ពុជាក្នុងពេលធ្វើដំណើរឆ្លងកាត់រលកព្យុះជាច្រើនប៉ុណ្ណោះទេ មាគ៌ានៃនយោបាយឈ្នះឈ្នះ បានបញ្ជ្រាបដល់មនុស្សជាច្រើនដែលចាញ់បោកនយោបាយប្រជាភិថុតិក្រុមជ្រុលនិយម ភ្ញាក់រលឹក និងបានផ្តាច់ខ្លួនចេញពីក្រុមធ្វើនយោបាយប្រឆាំងផ្កាប់មុខ និងសុំចូលរួមរស់ជាមួយនឹងគណបក្សប្រជាជនកម្ពុជាជាច្រើនថែមទៀត។

វាដល់ពេលវេលាហើយ សម្រាប់អ្នកដែលធ្លាប់ដើរតាមគន្លងលទ្ធិជ្រុលនិយម ត្រូវភ្ញាក់រលឹកនិងមើលឃើញថា ការដើរតាមស្រមោលនយោបាយក្រុមជ្រុលនិយម គឺមិនមែនជាទង្វើស្នេហាជាតិដូចអ្វីដែលក្រុមជ្រុលនិយមបានឃោសនាបំភ័ន្តស្មារតីពលរដ្ឋនោះឡើយ។ ទង្វើស្នេហាជាតិ គឺជាទង្វើដែលរួមគ្នាការពារប្រទេសដែលមានសុខសន្តិភាព មិនឱ្យធ្លាក់ចូលក្នុងវិបត្តិសង្គ្រាមសាឡើងវិញ។ ចំណែកនយោបាយរបស់ក្រុមជ្រុលនិយម គឺជាទង្វើដែលចង់នាំប្រទេសជាតិ ដែលកំពុងសោយសុខក្នុងសន្តិភាពនាពេលនេះ ឱ្យធ្លាក់ចូលក្នុងមហន្តរាយសង្គ្រាមវិញតែប៉ុណ្ណោះ។ កម្ពុជា «ក្រោមម្លប់នយោបាយឈ្នះឈ្នះ» បានធ្វើឱ្យប្រទេសមានសន្តិភាព២៦ឆ្នាំរួចមកហើយ និងនយោបាយឈ្នះឈ្នះ នឹងធ្វើឱ្យប្រទេសមានសន្តិភាព ជានិរន្តន៍ និងគ្មានអនុភាពអ្វីមកធ្វើឱ្យរងរង្គោះរង្គើបានឡើយ។

ព្រះមហាក្សត្រខ្មែរជាទីគោរពសក្ការៈ សម្តេចព្រះបរមនាថ នរោត្តម សីហមុនី ធ្លាប់បានមានព្រះរាជបន្ទូលកន្លងមកនេះ ដោយសម្តែងការទុកព្រះទ័យថា ព្រះរាជាណាចក្រកម្ពុជា នឹងសម្រេចបាននូវនយោបាយដឹកនាំជាតិដ៏ខ្លាំងក្លាមួយ ក្រោមការកាច់ចង្កូតរបស់រាជរដ្ឋាភិបាលនៃគណបក្សប្រជាជនកម្ពុជា។

ព្រះរាជបន្ទូលសម្តែងការទុកព្រះទ័យរបស់ព្រះអង្គនេះ បានធ្វើឡើងក្រោយទតមើលឃើញថា រយៈពេលជាង២០ឆ្នាំក្រោយការបញ្ចប់សង្គ្រាមការដឹកនាំរបស់រាជរដ្ឋាភិបាលពិតជាមានស្ថិរភាពនយោបាយ និងមានសន្តិភាព និងគ្មានអនុភាពណាមកបង្កភាពរង្គោះរង្គើបានឡើយ៖ «រយៈពេលកន្លងមក មាតុភូមិកម្ពុជា និងប្រជាពលរដ្ឋយើង មានការប្រែប្រួលមុខមាត់ថ្មីគួរឱ្យកោតសរសើរ។ សម្តេចមហាបវរធិបតី ហ៊ុន ម៉ាណែត ជាប្រមុខដឹកនាំរាជរដ្ឋាភិបាលដ៏ឆ្លាតវៃ បានដាក់ចេញនូវយុទ្ធសាស្ត្របញ្ចកោណដំណាក់កាលទី១ និងគោលនយោបាយដ៏ត្រឹមត្រូវ ក្នុងការប្រណិបតន៍តាមមាគ៌ាដ៏ល្អប្រពៃ និងមរតកនយោបាយដ៏ថ្លៃថ្លា របស់សម្តេចអគ្គមហាសេនាបតីតេជោ ហ៊ុន សែន បាននាំមកនូវសុខសន្តិភាព សាមគ្គីភាព ឯកភាពជាតិ កិត្យានុភាពជាតិ ល្បីរន្ទឺលើឆាកអន្តរជាតិ ស្របតាមគោលមាគ៌ាបង្រួបបង្រួមជាតិ ផ្សះផ្សាជាតិ ជាព្រះរាជបណ្តាំបន្ថែមចុងក្រោយ របស់ព្រះករុណាព្រះបរមរតនកោដ្ឋជាទីគោរពសក្ការៈដ៏ ខ្ពស់ខ្ពស់បំផុតនៅក្នុងឆ្នាំ២០១១»។

រាជរដ្ឋាភិបាលអាណត្តិទី៧ ដឹកនាំដោយសម្តេចមហាបវរធិបតី ហ៊ុន ម៉ាណែត គឺពិតជារាជរដ្ឋាភិបាល ដែលមានការប្តេជ្ញាចិត្តដឹកនាំប្រទេសជាតិឆ្ពោះទៅរកត្រើយសុភមង្គលដ៏ពិតប្រាកដ និងជារាជរដ្ឋាភិបាលប្រកបដោយមនុស្សធម៌ ដែលរង់ចាំទទួលយកបងប្អូន ដែលភ្ញាក់រលឹកវិលត្រឡប់មករួមរស់នៅលើទឹកដីនៃមាតុភូមិអង្គរដ៏បវររបស់យើងវិញ។

ការភ្ញាក់រលឹករបស់លោក សម សេរី វិលត្រឡប់មកកាន់សង្គមខ្មែរវិញនាពេលនេះ គឺជាការបង្ហាញដែរថា ទស្សនវិជ្ជានៃនយោបាយឈ្នះឈ្នះ មិនត្រឹមតែជានយោបាយជួយផ្សះផ្សាផ្ទៃ ក្នុងរបស់ជាតិខ្មែរប៉ុណ្ណោះទេ ប៉ុន្តែក៏ជាការជម្រុញប្រទេសឱ្យកាន់តែរីកចម្រើនផងដែរ។ ២៦ឆ្នាំរួចមកនេះ «ក្រោមម្លប់សន្តិភាពនៃនយោបាយឈ្នះឈ្នះ» កម្ពុជាបានបោះជំហានរីកចម្រើនយ៉ាងលឿនគួរឱ្យកត់សម្គាល់។ ដូច្នេះ នៅពេលដែលប្រទេសកម្ពុជាកំពុងបោះជំហានឆ្ពោះទៅមុខនេះ មេរៀនដែលទទួលបានពីការភ្ញាក់រលឹករបស់លោក សម សេរី គួរតែជំរុញអ្នកដទៃ ដើម្បីត្រូវមើលឱ្យឃើញនិងទទួលស្គាល់ថា សន្តិភាពក្រោមនយោបាយឈ្នះឈ្នះ គឺជាមាគ៌ាគំរូនៃសុខដុមនីយកម្មជាតិដ៏ពិតប្រាកដ៕