(វៀងច័ន្ទ, ឡាវ)៖ នៅវេលារសៀលថ្ងៃសៅរ៍ ទី៥ ខែមេសា ឆ្នាំ២០២៥នេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានដាក់ដឹកនាំគណៈប្រតិភូ អញ្ជើញដាក់កម្រងផ្កា និងគោរពវិញ្ញាណក្ខន្ធសពនាយឧត្តមសេនីយ៍ ខាំតៃ ស៊ីផាន់ដន (Khamtay Siphandone) អតីតប្រធានរដ្ឋឡាវ ដែលជាឪពុកបង្កើតរបស់ ឯកឧត្តមបណ្ឌិត សនសៃ ស៊ីផាន់ដន (Sonexay Siphandone) នាយករដ្ឋមន្ត្រីឡាវ។
ក្នុងឱកាសនោះ ក្នុងនាមរដ្ឋាភិបាល និងប្រជាជនកម្ពុជា សម្តេចមហាបវរធិបតី បានចូលរួមរំលែកនូវមរណទុក្ខយ៉ាងក្រៀមក្រំបំផុតជូនចំពោះ លោកបណ្ឌិត សនសៃ ស៊ីផាន់ដន និងសមាជិកគ្រួសារទាំងអស់ ព្រមទាំងបក្សប្រជាជនបដិវត្តន៍ឡាវ រដ្ឋាភិបាល និងប្រជាជនឡាវ ចំពោះការបាត់បង់រដ្ឋបុរសដ៏ឆ្នើម ដែលបានលះបង់ពេញមួយជីវិត ដើម្បីឯករាជ្យភាព វឌ្ឍនភាព និងសេចក្តីសុខរបស់ប្រជាជនឡាវ។
សម្តេចមហាបវរធិបតី ហ៊ុន ម៉ាណែត បានចាត់ទុកមរណភាទរបស់អតីតប្រធានរដ្ឋឡាវ គឺជាការបាត់បង់មិត្តម្នាក់ ដែលបានរួមចំណែកយ៉ាងធំធេងក្នុងការកសាងទំនាក់ទំនងមិត្តភាព និងសាមគ្គីភាពរវាងប្រជាជាតិកម្ពុជា និងឡាវ ។
សម្តេចប្រមុខរាជរដ្ឋាភិបាលកម្ពុជា បួងសួងសូមឱ្យវិញ្ញាណក្ខន្ធសព នាយឧត្តមសេនីយ៍ ខាំតៃ ស៊ីផាន់ដន បានទៅកាន់សុគតិភពកុំបីឃ្លៀងឃ្លាតឡើយ។
សូមបញ្ជាក់ថា នាយឧត្តមសេនីយ៍ ខាំតៃ ស៊ីផាន់ដន បានទទួលមរណភាព កាលពីថ្ងៃទី២ ខែមេសា ឆ្នាំ ២០២៥ ក្នុងជន្មាយុ ១០២ឆ្នាំ។
ក្នុងអំឡុងពេលកាន់តំណែងជាប្រមុខរដ្ឋឡាវ នាយឧត្តមសេនីយ៍ ខាំតៃ ស៊ីផាន់ដន បានខិតខំប្រឹងប្រែងយ៉ាងខ្លាំងក្លា ក្នុងការពង្រឹងទំនាក់ទំនងទ្វេភាគីរវាងប្រទេសឡាវ និងប្រទេសកម្ពុជា។
មរណភាពរបស់អតីតប្រមុខរដ្ឋឡាវ ត្រូវបានមេដឹកនាំកម្ពុជា រួមមានប្រធានព្រឹទ្ធសភា រដ្ឋសភា នាយករដ្ឋមន្ត្រី និងឥស្សរជនរបស់កម្ពុជាជាច្រើនរូប សម្តែងនូវមរណទុក្ខយ៉ាងក្រៀមក្រំ។ ក្នុងនោះសម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា ក៏ដូចជាសម្តេចពញាចក្រី ហេង សំរិន បានដឹកនាំគណៈប្រតិភូអញ្ជើញទៅគោរពវិញ្ញាណក្ខន្ធដោយផ្ទាល់ផងដែរ៕
