(ភ្នំពេញ)៖ យុទ្ធនាការ «កម្ពុជាស្អាតខ្មែរធ្វើបាន» «ផ្លូវជាតិគ្មានសំរាមប្លាស្ទិក» និងយុទ្ធនាការ «ថ្ងៃនេះ ខ្ញុំមិនប្រើប្លាស្ទិក!» ដាក់ចេញដោយលោក អ៊ាង សុផល្លែត រដ្ឋមន្ត្រីក្រសួងបរិស្ថាន បានក្លាយជា ចលនាដ៏ផុលផុសជំរុញមន្ត្រីរាជការ ប្រជាពលរដ្ឋ និងសិស្សានុសិស្ស ចុះរើសសំរាមតាមទីសាធារណៈ សាលារៀន ទីអារាម និងតាមដងផ្លូវនានាទូទាំងប្រទេស។
លោក អ៊ាង សុផល្លែត បានបង្ហាញនូវបំណងដ៏ពុះកញ្ជ្រោលក្នុងការនាំភាពស្អាតជូនកម្ពុជា ដោយមិនឱ្យមានសំរាមតាមទីសាធារណៈ។ លោករដ្ឋមន្ត្រីបានថ្លែងអំណរគុណជ្រាលជ្រៅបំផុត ចំពោះថ្នាក់ដឹកនាំរាជធានី ខេត្ត មន្ត្រីរាជការ អាជ្ញាធរ កម្លាំងប្រដាប់អាវុធ លោកគ្រូ អ្នកគ្រូ សិស្ស និស្សិត កម្មករ និយោជិត មន្ត្រីអង្គការសង្គមស៊ីវិល និងប្រជាពលរដ្ឋគ្រប់រូប ដែលបានចូលរួមសំអាតសំរាមតាមទីសាធារណៈនានា។
បើទោះបីជាយ៉ាងណា លោករដ្ឋមន្ត្រី បន្តអំពាវនាវដោយទទូចដល់ប្រជាពលរដ្ឋរួមគ្នាលុបបំបាត់ការប្រើប្លាស្ទិក បញ្ឈប់ការបោះសំរាមពាសវាលពាសកាល ដើម្បីកម្ពុជាស្រស់ស្អាត។ បរិស្ថានល្អស្អាត នាំមកនូវសុខភាព និងជីវិតស្រស់ថ្លា ព្រមទាំងបង្ហាញនូវឥរិយាបថប្រកបដោយសេចក្តីថ្លៃថ្នូរ៕
