(កំពត)៖ ដើម្បីអបអរសាទរពិធីបុណ្យចូលឆ្នាំថ្មីប្រពៃណីជាតិខ្មែរ ដែលនឹងឈានចូលមកដល់នាពេលខាងមុខ លោក ម៉ៅ ធនិន អភិបាលខេត្តកំពត បានជួបសំណេះសំណាលជាមួយមន្ត្រីសាលាខេត្តទាំងអស់ ដើម្បីផ្តល់ជូនគ្រឿង ឧបភោគបរិភោគ និងថវិកាមួយចំនួនសម្រាប់យកទៅជូនដល់ឪពុកម្តាយ យាយតា ពេលទៅធ្វើបុណ្យនៅឯស្រុកកំណើត។
អភិបាលខេត្ត បានណែនាំមន្ត្រីទាំងអស់ត្រូវខិតខំអភិវឌ្ឍន៍ខ្លួនដើម្បីក្លាយជាមេដឹកនាំល្អ និងជាគំរូល្អនៅក្នុងសង្គម។ ថ្លែងនៅក្នុងពិធីសំណេះសំណាលមន្ត្រីរាជការ នៃសាលាខេត្ត ក្នុងឱកាសបុណ្យចូលឆ្នាំថ្មីប្រពៃណីជាតិ នាថ្ងៃទី៩ ខែមេសា ឆ្នាំ២០២៥ នៅសាលប្រជុំសាលាខេត្តកំពត។
អភិបាលខេត្ត បានកោតសរសើរចំពោះកិច្ចខិតខំប្រឹងប្រែងបំពេញការងាររបស់មន្ត្រីសាលាខេត្តទាំងអស់ ក្នុងការជួយជ្រែងឱ្យរដ្ឋបាលខេត្តសម្រេចបាននូវសមិទ្ធផលថ្មីៗជាច្រើន ហើយលទ្ធផលការងារដ៏ល្អប្រសើរនេះអាស្រ័យដោយ មន្ត្រីទាំងអស់ចេះរួមសាមគ្គី និងចេះគោរពតាមតួនាទីភារកិច្ច និងការងាររបស់ខ្លួនបានល្អ ធ្វើឱ្យពលរដ្ឋពេញចិត្ត និងកោតសរសើរ ចំពោះតម្លៃនៃការងារ និងសេចក្តីថ្លៃថ្នូរបស់មន្ត្រីសាលាខេត្តកំពត ហើយមិនដែលលេចលឺពាក្យ មិនល្អ ឬមានពាក្យបណ្តឹងណាមួយនោះទេ។
យ៉ាងណាក៏ដោយ នៅក្នុងឱកាសសំណេះសំណាលដ៏កក់ក្តៅនោះ អភិបាលខេត្ត បានណែនាំមន្ត្រីទាំងអស់ឱ្យខំប្រឹងប្រែងបំពេញការងារបន្ថែមទៀត ពិសេសត្រូវចេះអភិវឌ្ឍន៍ខ្លួនឱ្យមានទាំងចរិយាសម្បត្តិ និងវិជ្ជាសម្បត្តិ ដោយផ្តើម ចេញពីការសិក្សាស្វែងយល់ពីខ្លួនឯង (ចំណេះ ជំនាញ ឥរិយាបថរបស់ខ្លួន) ស្គាល់ពីអ្នកដទៃ (សង្គម និងអ្នកជុំវិញខ្លួន) ដើម្បីបង្កើតទំនាក់ទំនងល្អនៅក្នុងសង្គមការងារ និងសង្គមទូទៅ ដើម្បីឱ្យក្លាយជាមេដឹកនាំល្អ និងជាបុគ្គលគំរូម្នាក់នៅក្នុងសង្គមគ្រួសារ ការងារ និងសង្គមជាតិ។
អភិបាលខេត្តបានបន្តថា ទទ្ទឹមនឹងមានចរិយាសម្បត្តិ វិជ្ជាសម្បត្តិ និងទំនាក់ទំនង់ល្អហើយនោះ មន្ត្រីទាំងអស់ត្រូវមានគំនិតចេះចែករំលែកនៅក្នុងសង្គម (ចែករំលែកចំណេះដឹង បទពិសោធន៍ការងារ សេចក្តីសុខ សេចក្តីថ្លៃថ្នូរជាដើម..) ព្រោះសង្គមមួយចែកចេញជាពីរគ្រួសារ គឺគ្រួសារតូច (គ្រួសារយើងម្នាក់ៗ) និងគ្រួសារធំ (សហគមន៍ ភូមិឃុំ ស្រុក ខេត្ត និងប្រទេស) បានន័យថា បើគ្រួសារតូចនីមួយៗពោពេញដោយមនុស្សកតញ្ញូ មានសីលធម៌ គុណធម៌ ព្រហ្មវិហារធម៌ នោះ គ្រួសារធំ ឬសង្គមយើងក៏ល្អទៅតាមនោះដែរ។
ម្យ៉ាងទៀតឯកលោកអភិបាលខេត្ត បានណែនាំមន្ត្រីទាំងអស់ត្រូវធ្វើជាមនុស្សកតញ្ញូ ចេះស្គាល់បុណ្យបាប គុណទោស ចេះស្គាល់គុណ ដឹងគុណ និងសងគុណបុព្វការីជន ថ្នាក់ដឹកនាំខ្លួន និងអ្នកដែលធ្លាប់ជួយយកអាសាយើង ពិសេសពេលរដូវបុណ្យទានធំៗម្តងៗ ត្រូវគិតគូរ និងនាំយករបស់កំដរដៃទៅជូនលោកឪពុក អ្នកម្តាយ លោកតា លោកយាយ ដែលនេះគឺជាគំរូល្អ និងជាទំនៀមទម្លាប់ប្រពៃណីដ៏ល្អបន្តមកពីដូនតា សូមមន្ត្រីទាំងអស់នាំគ្នាជួយថែរក្សាឱ្យបាន។
ចុងបញ្ចប់ នៃពីធីសំណេះសំណាលនាពេលនេញ លោកអភិបាលខេត្តបានផ្តាំផ្ញើការសួរសុខទុក្ខដល់លោកឪពុក អ្នកម្តាយ លោកតាលោកយាយ របស់មន្ត្រីទាំងអស់ និងបានផ្តល់ជូននូវគ្រឿងឧបភោគបរិភោគ និងថវិការមួយចំនួន ដល់មន្ត្រីសាលាខេត្ត ប្រធាន និងសមាជិកក្រុមប្រឹក្សាខេត្ត និងមន្ត្រីពាក់ព័ន្ធមួយចំនួនផងដែរ៕
