(កំពង់ធំ)៖ នៅរសៀលថ្ងៃសៅរ៍ ទី១២ ខែមេសា ឆ្នាំ២០២៥ នេះ លោករដ្ឋមន្ត្រី ថោ ជេដ្ឋា អនុប្រធានក្រុមការងាររាជរដ្ឋាភិបាល ចុះមូលដ្ឋាន ខេត្តកំពង់ធំ និងជាប្រធានក្រុមការងាររាជរដ្ឋាភិបាល ចុះមូលដ្ឋានស្រុកស្ទោង បាន អញ្ជើញ ជាអធិបតីភាពដ៏ខ្ពង់ខ្ពស់ បើកព្រឹត្តិការណ៍សង្ក្រាន្តឆ្នាំថ្មី នៅឃុំចំនួន៣ រួមមាន៖ ឃុំទ្រា ឃុំបន្ទាយស្ទោង និងឃុំកំពង់ចិនជើង ក្នុងចំណោមឃុំចំនួន១៣ នៃស្រុកស្ទោង ខេត្តកំពង់ធំ។
សូមជម្រាបថា «ព្រឹត្តិការណ៍សង្ក្រាន្តឆ្នាំថ្មី» នៅតាមបណ្តាឃុំទាំង១៣ នៃស្រុកស្ទោង មានកម្មវិធីកម្សាន្តសប្បាយជាច្រើនរួមមាន៖ ការប្រគុំតន្រ្តី, ការលេងល្បែងប្រជាប្រិយដូចជា លោតបាវ ពមនុស្ស ទាញព្រ័ត្រ បោះអង្គុញ ដណ្ដើមស្លឹកឈើនិងវាយក្អម និងការចាប់រង្វាន់រាប់រយរង្វាន់រួមមាន ធុងទឹកកក ចានស្រាក់ បំពង់ទឹកក្ដៅ ឆ្នាំងដាំបាយអគ្គិសនី កង្ហារ កង់ ទូរសព្ទដៃ ទូរទឹកកក និងម៉ូតូចំនួនមួយគ្រឿង ដែលជាអំណោយដ៏ថ្លៃថ្លារបស់លោករដ្ឋមន្ត្រី ថោ ជេដ្ឋា និងលោកស្រីផងដែរ។
លោករដ្ឋមន្ត្រី ថោ ជេដ្ឋា បានមានប្រសាសន៍ថា៖ «សង្រ្កាន្តឆ្នាំថ្មី បានរៀបចំឡើងនៅគ្រប់ទីកន្លែងទូទាំងព្រះរាជាណាចក្រកម្ពុជា ចាប់តាំងពីថ្នាក់ខេត្ត ស្រុក/ ឃុំ ភូមិ និងគ្រឹះស្ថានសិក្សា នានា។ ព្រឹត្តិការណ៍នេះ ជួយបំផុសដល់ប្រជាជនកម្ពុជា ជាពិសេសកុលបុត្រ កុលធីតាជំនាន់ក្រោយឱ្យស្វែងយល់ ស្រឡាញ់ និងផ្សព្វផ្សាយវប្បធម៌ អរិយធម៌ ប្រពៃណី និងទំនៀមទំលាប់ដ៏មានតម្លៃរបស់ខ្មែរ ក្នុងគោលដៅរក្សាអត្តសញ្ញាណជាតិ និងបង្កើតមោទនភាពជាតិ។
ទន្ទឹមនឹងនេះលោករដ្ឋមន្ត្រី បានបញ្ជាក់ឱ្យដឹងថា ព្រឹត្តិការណ៍ សង្រ្កាន្តឆ្នាំថ្មីនាពេលនេះ អាចប្រព្រឹត្តទៅបានក៏ដោយសារតែប្រទេសជាតិមានសន្តិភាព ស្ថិរភាព និងការអភិវឌ្ឍជាបន្តបន្ទាប់ ក្រោមការដឹកនាំដ៏ប៉ិនប្រសប់របស់ថ្នាក់ដឹកនាំជំនាន់មុន ដែលមានសម្តេចតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា ជាបិតាសន្តិភាព និងបន្តដឹកនាំប្រកបដោយភាពឈ្លាសវៃ និងមោះមុត របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា។ ព្រឹត្តិការណ៍នេះធ្វើឡើង ដើម្បីចូលរួមអបអរសាទរ ពិធីបុណ្យចូលឆ្នាំថ្មីប្រពៃណីជាតិខ្មែរ ក៏ដូចជាការរួមចំណែកដើម្បីបង្កើនភាពសប្បាយរីករាយ ជូនដល់យុវជន និងបងប្អូនប្រជាពលរដ្ឋ តាមរយៈកម្មវិធី សប្បាយជាច្រើនដូចជាការរាំលេងកម្សាន្ត ការ លេងល្បែងប្រជាប្រិយ និងការចាប់រង្វាន់ជាដើម។
សូមបញ្ជាក់ថា ពិធីបុណ្យចូលឆ្នាំថ្មីប្រពៃណីជាតិខ្មែរ ឆ្នាំម្សាញ់ សប្តស័ក ពុទ្ធសករាជ ២៥៦៩ ប្រព្រឹត្តទៅចាប់ពីថ្ងៃទី១៤ ដល់ថ្ងៃទី១៦ ខែមេសា ឆ្នាំ២០២៥ ខណៈពិធីទទួលស្វាគមន៍ទេវតាឆ្នាំថ្មីព្រះនាម គោរាគទេវី នឹងយាងចុះមកនៅវេលាម៉ោង ៤៖៤៨ នាទីទាបភ្លឺថ្ងៃទី១៤ ខែមេសា ឆ្នាំ២០២៥ ខាងមុខនេះ៕
