(ជែងស៊ី, ចិន)៖ សមាគមសហព័ន្ធអ្នកវិនិយោគកម្ពុជា មានអ្នកឧកញ៉ា លី ឃុនថៃ ជាប្រធាន បានសហការជាមួយអ្នកវិនិយោគនៅក្នុងខេត្តជាំងស៊ី ប្រទេសចិនប្រមាណ ១៨០ក្រុមហ៊ុន បានរៀបចំពិព័រណ៍ស្តីពីកិច្ចសហប្រតិបត្តិការកម្រិតខ្ពស់ផ្នែកបរិក្ខារថាពលអគ្គិសនី ក្នុងគោលដៅលើកកម្ពស់កិច្ចសហប្រតិបត្តិការវិនិយោគលើបរិក្ខារថាមពលអគ្គិសនី ក៏ដូចជាលើវិស័យដទៃទៀតរវាងអ្នកវិនិយោគនៅកម្ពុជា និងខេត្តជាំងស៊ី របស់ចិន។
ពិព័រណ៍នេះត្រូវបានរៀបចំឡើងកាលពីថ្ងៃទី១៥ ខែឧសភា ឆ្នាំ២០២៥ នៅស្រុកឆុងរិន ខេត្តជាំងស៊ី ប្រទេសចិន។ ក្នុងពិធីនេះមានការអញ្ជើញចូលរួមពីអ្នកឧកញ៉ា លី ឃុនថៃ, លោក គង់ ពុទ្ធារ៉ា អនុព័ន្ធពាណិជ្ជកម្មអមស្ថានទូតកម្ពុជាប្រចាំប្រទេសចិន, លោក កឹម រតនា ប្រធានការិយាល័យនវានុវត្តន៍ថាមពលអគ្គិសនី, លោក Guo Xinchun សមាជិកគណៈកម្មាធិការទីក្រុងហ្វូចូវ និងលោក Huang Zhigang អភិបាលស្រុកឆុងយ៉ូន។
ស្រុកឆុងយ៉ូនត្រូវបានគេស្គាល់ថាជា «ទីក្រុងអគ្គិសនី» របស់ចិន ដែលបានអភិវឌ្ឍន៍លើវិស័យអគ្គិសនីជាង៥០ឆ្នាំមកហើយ។ ស្រុកនេះ មានសហគ្រាសអគ្គិសនី និងសហគ្រាសពាក់ព័ន្ធវិស័យអគ្គិសនីជាង១៣០កន្លែង ផលិតបរិក្ខារអគ្គិសនីទៅកាន់តំបន់អាស៊ីអាគ្នេយ៍ អាមេរិកខាងត្បូង និងអាហ្វ្រិកជាដើម។ នៅពេលថ្មីៗនេះ ស្រុកនេះកំពុងជំរុញការផ្លាស់ប្តូរឌីជីថល បង្កើតរោងចក្រឆ្លាតវៃ៥G និងពង្រីកការនាំចេញទៅក្រៅប្រទេស។
ពិព័រណ៍នេះ មិនត្រឹមតែជំរុញការពិភាក្សាដោយផ្ទាល់រវាងសហគ្រាសកម្ពុជា និងចិនប៉ុណ្ណោះទេ ថែមទាំងផ្តល់កម្លាំងថ្មីដល់ការធ្វើទំនើបកម្មឧបករណ៍អគ្គិសនីនៅកម្ពុជាផងដែរ។
ក្នុងពិធីនេះអ្នកឧកញ៉ា លី ឃុនថៃ បានលើកបង្ហាញពីការអភិវឌ្ឍន៍បណ្តាញអគ្គិសនីនៅកម្ពុជា ដែលគ្រប់ដណ្តប់ស្ទើរទូទាំងប្រទេស ហើយខ្នងផ្ទះប្រជាពលរដ្ឋរហូតដល់ទៅ៩៩ភាគរយហើយ ត្រូវបានតភ្ជាប់បណ្តាញអគ្គិសនី។
សម្រាប់អ្នកឧកញ៉ា លី ឃុនថៃ ការអភិវឌ្ឍលើថាមពលអគ្គិសនី គឺជាផ្នែកដ៏សំខាន់សម្រាប់ជំរុញការវិនិយោគ ក៏ដូចជាលើកកម្ពស់ជីវភាពប្រជាពលរដ្ឋ និងជំរុញការអភិវឌ្ឍប្រទេស។ ដូច្នេះកិច្ចសហប្រតិបត្តិការល្អរវាងអ្នកវិនិយោគដែលមានពិសោធន៍ខ្ពស់លើការផលិតបរិក្ខារថាមពលអគ្គិសនីនៅក្នុងខេត្តជាំងស៊ី ប្រទេសចិន ជាមួយអ្នកវិនិយោគនៅកម្ពុជា គឺជាការរួមចំណែកដ៏សំខាន់ដល់ការធ្វើឱ្យកាន់តែទំនើបលើកិច្ចអភិវឌ្ឍន៍វិស័យអគ្គិសនីនៅកម្ពុជា។
បើតាមអ្នកឧកញ៉ា លី ឃុនថៃ តាមរយៈវេទិកាខាងលើនេះ លោកក៏បានព្យាយាមផ្សព្វផ្សាយពីសក្តានុពលវិនិយោគនៅកម្ពុជា ហើយបានកៀរគរអ្នកវិនិយោគរបស់ចិន ក្នុងខេត្តជាំងស៊ី ឱ្យមកសិក្សា និងពិនិត្យលទ្ធភាពវិនិយោគនៅកម្ពុជាផងដែរ។ ជាពិសេសលោកបានព្យាយាមលើកពីគោលនយោបាយរបស់រាជរដ្ឋាភិបាលលើកគម្រោងវិនិយោគបរទេស ដែលមានភាពបត់បែន ផ្តល់ការលើកទឹកចិត្ត និងគាំពារខ្ពស់។
សូមបញ្ជាក់ថា ក្នុងដំណើរទៅកាន់ខេត្តជាំងស៊ីនាពេលនេះ អ្នកឧកញ៉ា លី ឃុនថៃ និងអ្នកវិនិយោគពីកម្ពុជា បានទៅទស្សនកិច្ចនៅសហគ្រាសសំខាន់ៗ រួមមាន Jiangxi Ifa Electric Power Technology Co., Ltd, Jiangxi Ganyan Electric Co., Ltd និង Jiangxi Mingyuan Electric Co., Ltd ដើម្បីសិក្សាបទពិសោធន៍ក្នុងការផលិត បច្ចេកវិទ្យាឆ្លាតវៃ និងការគ្រប់គ្រងប្រកបដោយគុណភាពខ្ពស់៕
