(ភ្នំពេញ)៖ នៅព្រឹកថ្ងៃសុក្រ ទី២៣ ខែឧសភា ឆ្នាំ២០២៥នេះ សម្តេចតេជោ ហ៊ុន សែន ប្រធានព្រឹទ្ធសភាកម្ពុជា បានអនុញ្ញាតឱ្យលោក ឯក ណាត ដាកាល់ (Ek Nath Dhakal) អគ្គលេខាធិការនៃសន្និសីទប្រធានសភា នៃអន្តរសភា (ISC) ចូលជួបសម្តែងការគួរសម នៅវិមានព្រឹទ្ធសភា។
លោក ជា ធីរិទ្ធ អ្នកនាំពាក្យព្រឹទ្ធសភា បានឱ្យដឹងថា ជាកិច្ចចាប់ផ្តើមនៃជំនួបនោះ សម្តេចតេជោ ហ៊ុន សែន បានសម្តែងនូវក្តីរីករាយ និងស្វាគមន៍លោកអគ្គលេខាធិការ ISC និងសហការី ដែលបានអញ្ជើញមកបំពេញទស្សនកិច្ចនៅកម្ពុជា។ សម្តេចតេជោ បានអរគុណលោកអគ្គលេខាធិការ ដែលបាននាំយកនូវសញ្ញាសម្គាល់សមាជិកស្ថាបនិកជូនសម្តេចនាពេលនេះ។
សម្តេចតេជោ ហ៊ុន សែន បានសម្តែងនូវការអបអរសាទរ និងវាយតម្លៃខ្ពស់ចំពោះលទ្ធផលដ៏ត្រចះត្រចង់ ដែលសន្និសីទ និងកិច្ចប្រជុំកំពូលនៃសហព័ន្ធសន្តិភាពសកល UPS សម្រេចបានកាលពីថ្ងៃទី១១ ខែមេសា ឆ្នាំ២០២៥។
ក្នុងជំនួបនោះ លោកអគ្គលេខាធិការ ISC បានអរគុណសម្តេចតេជោ ហ៊ុន សែន ដែលបានអនុញ្ញាតឱ្យរូបលោក និងសហការី បានជួបសម្តែងការគួរសម។
លោកអគ្គលេខាធិការ ក៏បាននាំនូវការសាកសួរសុខទុក្ខសម្តេចតេជោ ហ៊ុន សែន ពីសំណាក់លោកស្រី ហាក់ ចាន់ហាមូន ស្ថាបនិក UPS ផងដែរ។
ក្នុងជំនួបនេះ លោកអគ្គលេខាធិការ បានគូសរំលេចនូវការសរសើរចំពោះភាពជាអ្នកដឹកនាំរបស់សម្តេចតេជោ ហ៊ុន សែន នាពេលកន្លងមក ជាពិសេសការគាំទ្រចំពោះដំណើរការរបស់ ISC ជាបន្តបន្ទាប់មក។
លោកអគ្គលេខាធិការ បានថ្លែងកោតសរសើរថា «សម្តេចតេជោ គឺជាមេដឹកនាំដែលត្រូវបានទទួលស្គាល់នៅក្នុងប្រទេសកម្ពុជា តំបន់ រួមទាំងពិភពលោកទាំងមូល នូវភាពជាអ្នកដឹកនាំដ៏ឆ្នើម»។
ជាមួយការមានឱកាសបានជួបផ្ទាល់ជាមួយសម្តេចតេជោនាពេលនេះ លោកអគ្គលេខាធិការ និងសហការី បានស្នើសុំនូវអនុសាសន៍ពីសម្តេចតេជោ ដើម្បីដឹកនាំស្ថាប័ន ISC ដំណើរការទៅមុខដោយជោគជ័យ និងអាចបញ្ជ្រៀតខ្លួនចូលទៅក្នុងស្ថាប័នអន្តរជាតិនានាបន្ថែមទៀត។
ទន្ទឹមនឹងនេះលោកអគ្គលេខាធិការ បានគោរពស្នើសុំសម្តេចតេជោ ជួយគាំទ្របន្ថែមទៀត ជាពិសេសជួយជ្រោមជ្រែង ISC ក្លាយទៅជាសមាជិកអង្កេតការណ៍របស់មហាសន្និបាតអន្តរសភា ហៅកាត់ថា អាយប៉ា នាពេលខាងមុខ។
សម្តេចតេជោ ហ៊ុន សែន ប្រធានព្រឹទ្ធសភាកម្ពុជា បានឆ្លើយតបដោយការផ្តាំផ្ញើសាកសួរសុខទុក្ខលោកស្រី ហាក់ ចាន់ ហាមូន ហើយសម្តេចក៏នឹករលឹកលោកស្រីផងដែរ។
ឆ្លើយតបការស្នើសុំគាំទ្រលើស្ថាប័ន ISC នោះ សម្តេចតេជោ ហ៊ុន សែន បានបង្ហាញការគាំទ្រពេញទំហឹងក្នុងការឱ្យស្ថាប័ន ISC ក្លាយជាសមាជិកអង្កេតការណ៍របស់អាយប៉ា។ សម្តេចតេជោ ហ៊ុន សែន បានចាត់ទុកការក្លាយសមាជិកអង្កេតការណ៍របស់អាយប៉ា ជារឿងសមហេតុសមផល និងជាការពង្រីកនូវយន្តការបន្ថែមទៀតរបស់ ISC ក្នុងការចូលរួមចំណែកដោះស្រាយបញ្ហារបស់ពិភពលោក ជាពិសេសការចូលរួមចំណែករកសន្តិភាពសម្រាប់ពិភពលោកផងដែរ។
ក្នុងឱកាសនោះសម្តេចតេជោ ក៏បានចែករំលែកជាមួយលោកអគ្គលេខាធិការដោយលើកឡើងពីបញ្ហាប្រឈមនានារបស់ពិភពលោកនាពេលបច្ចុប្បន្ន ជាពិសេសបញ្ហាសង្គ្រាមនៅអ៊ុយក្រែន បញ្ហាសង្គ្រាមនៅតំបន់កាហ្សា រួមទាំងបញ្ហាសមុទ្រចិនខាងត្បូងផងដែរ។
បញ្ហាទាំងនេះ សម្តេចតេជោ ហ៊ុន សែន បានចែករំលែកនូវទស្សនទានជាច្រើន ជាមួយលោកអគ្គលេខាធិការ ISC ដើម្បីរួមចំណែកបង្ហាញផ្លូវបន្ថែមទៀត ក្នុងការស្វែងរកដំណោះស្រាយ និងជាជំហានបន្តរបស់ ISC។
សម្តេចតេជោប្រធានព្រឹទ្ធសភា បានគូសរំលេចថា នៅក្នុងស្ថានភាពស្មុគស្មាញរបស់ពិភពលោកនេះ តួនាទីរបស់ ISC រឹតតែសំខាន់ ពីព្រោះស្ថាប័នអង្គការអន្តរជាតិធំៗកំពុងមានស្ថានភាពចុះខ្សោយ ទាមទារឱ្យមានការចូលរួមបន្ថែមទៀតពីស្ថាប័នតំបន់ ដើម្បីចូលរួមចំណែកដោះស្រាយបញ្ហាស្មុគស្មាញរបស់ពិភពលោក ក៏ដូចជាការស្វែងរកនូវសន្តិភាពសម្រាប់តំបន់ និងពិភពលោកផងដែរ។ នៅក្នុងឱកាសនោះសម្តេចតេជោ ហ៊ុន សែន ក៏បានរំលេចបន្ថែមក្នុងការផ្តល់អនុសាសន៍ដល់ ISC ដើម្បីឱ្យស្ថាប័ននេះ ដំណើរការទៅមុខដោយជោគជ័យ សម្តេចតេជោ ក៏បានផ្តល់នូវការណែនាំពាក់ព័ន្ធការយកចិត្តទុកដាក់បន្ថែមទៀតលើការពង្រឹងលេខាធិការដ្ឋានរបស់ ISC ដើម្បីឱ្យលេខាធិការដ្ឋានមានភាពរឹងមាំ។
សម្តេចតេជោ បានគូសបញ្ជាក់ថា ស្ថាប័ន ISC អាចរឹងមាំ និងបន្តនិរន្តរភាពទៅបាន គឺមិនអាចខ្វះបានឡើយនូវតួនាទីដ៏សំខាន់របស់លេខាធិការដ្ឋាន។
ក្នុងឋានៈជាស្ថាបនិកមួយរូបរបស់ ISC សម្តេចតេជោ ហ៊ុន សែន បានផ្តល់យោបល់ឱ្យលោកអគ្គលេខាធិការយកចិត្តទុកដាក់ពង្រឹងតួនាទីរបស់អគ្គលេខាធិការដ្ឋាន ហើយត្រូវពង្រីកខ្លួនបន្ថែមទៀត ចូលទៅក្នុងយន្តការអន្តរជាតិនានា ដើម្បីជាចំណែកក្នុងការរកដំណោះស្រាយ ជួយដល់ពិភពលោកទាំងមូល ជាពិសេសដំណើរស្វែងរកសន្តិភាព។
លោកអគ្គលេខាធិការ បានសម្តែងក្តីរីករាយយ៉ាងខ្លាំង បន្ទាប់ពីបានស្តាប់នូវការណែនាំ និងការចែករំលែកទស្សនៈរបស់សម្តេចតេជោ។ លោកអគ្គលេខាធិការ ចាត់ទុកការណែនាំរបស់សម្តេចតេជោ គឺមានតម្លៃខ្លាំងណាស់ ហើយលោកនឹងយកទៅអនុវត្តតាមទិដ្ឋភាពជាក់ស្តែង ដើម្បីឱ្យស្ថាប័ន ISC បានរីកចម្រើនទៅមុខ។
សម្តេចតេជោ ហ៊ុន សែន បានណែនាំទៅលោកអគ្គលេខាធិការ ISC ឱ្យធ្វើការជាបន្តទៀតជាមួយសម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភាកម្ពុជា៕
