(ភ្នំពេញ)៖ ជុំវិញករណីរឿងដែលមានបុគ្គលមួយរូបកំពុងស្នាក់នៅក្រៅប្រទេស នឹងបានយកពាក្យស្លោក ពាក្យ «អរគុណសន្តិភាព» ដែលបានដាក់តាំងបង្ហាញនៅលើស្ពានលេខ២៨ ដែលជាស្ពានខ្ពស់ជាងគេ​របស់កម្ពុជា ទៅបំភ្លើស បំភ្លៃការពិត ដែលនាំឱ្យមហាជនមានការយល់ច្រលំនោះ, លោក ផន រឹម អ្នកនាំពាក្យក្រសួងសាធារណការ និងដឹកជញ្ជូន បានបង្ហាញការហួសចិត្ត និងបានបញ្ជាក់ថា វាជារឿងគួរឲ្យ​សោកស្តាយ និងជាទង្វើដ៏គួរឲ្យស្អប់ខ្ពើមបំផុត ចំពោះសកម្មភាពបំភ្លើស បំភ្លៃ បំភាន់ អត្ថន័យផ្ទាំងពាក្យស្លោក ហើយយកទៅផ្សព្វផ្សាយលើបណ្តាញសង្គមដូចនេះ។

លោក ផន រឹម តាមរយៈបណ្តាញសង្គមផ្លូវការ ដែលបណ្តាញព័ត៌មាន Fresh News ទទួលបាននៅរសៀលថ្ងៃទី២៣ ខែឧសភា ឆ្នាំ២០២៥នេះបានបញ្ជាក់ដូចនេះថា «ជារឿងគួរឲ្យសោកស្តាយ និងជាទង្វើដ៏គួរឲ្យស្អប់ខ្ពើមបំផុត ចំពោះសកម្មភាពបំភ្លើស បំភ្លៃ បំភាន់ អត្ថន័យផ្ទាំងពាក្យស្លោកផ្សព្វផ្សាយលើបណ្តាញសង្គម Facebook ពីសំណាក់បុគ្គលម្ចាស់គណនេយ្យ Facebook ឈ្មោះ “Sothea Chhin”ធ្វើឲ្យមានការយល់ច្រលំ»។

លោក ផន រឹម បានបន្ថែមថា ក្នុងនាមអ្នកនាំពាក្យក្រសួងសាធារណការ និងដឹកជញ្ជូន សូមជម្រាបជូនថា នៅពាក់កណ្តាលស្ពានខ្ពស់ជាងគេ (ទាំងសងខាង) នៃគម្រោងផ្លូវជាតិលេខ១០ (សំឡូត-បាត់ដំបង, វាលវែង-ពោធិ៍សាត់, ក្រុងខេរភូមិន្ទ-កោះកុង) ស្ថិតនៅភូមិឆាយលូក ឃុំអូរសោម ស្រុកវាលវែង ខេត្តពោធិ៍សាត់ មានយ៉សម្រាប់ឈរទស្សនារូបភាព និងថតរូបអនុស្សាវរីយ៍ដល់បងប្អូនប្រជាពលរដ្ឋ​ដែលឆ្លងកាត់ទៅ-មកទីតាំងស្ពាន ដោយរំលេចពាក្យស្លោកចំនួនពីរផ្ទាំងគឺ«អរគុណសន្តិភាព» និង«រួមគ្នាថែរក្សា ការពារសន្តិភាព» មិនមានពាក្យស្លោកផ្សេងដូចបុគ្គលម្ចាស់គណនេយ្យ Facebook ឈ្មោះ Sothea Chhin បំភ្លៃនោះទេ។

ពាក្យ «អរគុណសន្តិភាព» គឺជាពាក្យមួយឃ្លា ដែលមានអត្ថធំធេងសម្រាប់ប្រជាពលរដ្ឋកម្ពុជា ដែលធ្លាប់ឆ្លងកាត់សង្គ្រាមកាប់សម្លាប់រាប់មិនអស់។ ប្រជាជនកម្ពុជាទាំងអស់ បានផ្តល់គុណតម្លៃយ៉ាងធំធេង​ដល់សន្តិភាព។ ពាក្យ «អរគុណសន្តិភាព» ត្រូវបានកត់សម្គាល់ថា មានបិទស្ទើរគ្រប់ទីកន្លែងទូទាំងប្រទេស។

សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី និងជាប្រធានគណបក្សប្រជាជនកម្ពុជា តែងបានអំពាវនាវដល់បងប្អូនជនរួមជាតិ បន្តថែរក្សាការពារសន្តិភាព ក្នុងប្រទេសរបស់យើង​ឲ្យបានគង់វង្ស។ អរគុណសន្តិភាព! អរគុណនយោបាយឈ្នះ ឈ្នះ! ដឹងគុណស្ថាបនិក មគ្គុទ្ទេសក៍ឯក និងប្រតិបត្តិករ នយោបាយឈ្នះ ឈ្នះ ដែលបាននាំមកនូវសន្តិភាព និងការឯកភាពជាតិពេញលេញ ៕