(ភ្នំពេញ)៖ នាព្រឹកថ្ងៃទី២៦ ខែឧសភា ឆ្នាំ២០២៥ សម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ជាទីសក្ការៈដ៏ខ្ពង់ខ្ពស់បំផុត ព្រះអង្គសព្វព្រះរាជហឬទ័យប្រោសព្រះរាជទានលោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ព្រមទាំងប្រតិភូអមដំណើរ ចូលជួបសវនាការ ដើម្បីទូលថ្វាយអំពីវឌ្ឍនភាពវិស័យកសិកម្ម ការងារអភិរក្សធនធានធម្មជាតិ និងសត្វផ្សោតទន្លេមេគង្គ នៅព្រះរាជដំណាក់គន្ធបុប្ផាក្នុងព្រះបរមរាជវាំង។
ជាកិច្ចចាប់ផ្តើមលោករដ្ឋមន្រ្តី ឌិត ទីណា បានទូលថ្វាយ ព្រះវររាជមាតាជាតិខ្មែរ អំពីការងារអភិរក្សធនធានធម្មជាតិ និងវឌ្ឍនភាព នៃសត្វផ្សោតទន្លេមេគង្គ ដែលរាជរដ្ឋាភិបាលបានយកចិត្តទុកដាក់ខ្ពស់បំផុត ទប់ស្កាត់បទល្មើស នេសាទខុសច្បាប់តាមរយៈការបង្កើតក្រុមឆ្មាំទន្លេ៧២រូប សហការជាមួយរដ្ឋបាលខេត្តក្រចេះ និងស្ទឹងត្រែង និងដៃគូនានា ដើម្បីចុះល្បាតជាប្រចាំ ស្រាវជ្រាវនិងតាមដានពីស្ថានភាពសត្វផ្សោត ជាពិសេសបានផ្តល់សកម្មភាព អប់រំផ្សព្វផ្សាយ និងណែនាំប្រជានេសាទជៀសវាងការប្រើឧបករណ៍នេសាទខុសច្បាប់ និងឧបករណ៍នេសាទផ្សេងៗទៀតដែលបង្កហានិភ័យដល់សត្វផ្សោត។
លោករដ្ឋមន្រ្តី បានទូលថ្វាយបន្ថែមថា រាជរដ្ឋាភិបាលនីតិកាលទី៧ ដឹកនាំដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានយកចិត្តទុកដាក់ខ្ពស់លើការងារអភិរក្សនេះ និងបានចំណាយថវិកាក្នុងសកម្មភាព គ្រប់គ្រងនិងការពារសត្វផ្សោតទន្លេមេគង្គនេះផងដែរ។
ជាលទ្ធផលចំនួនសត្វផ្សោតមានភាពប្រសើរឡើងជាបន្តបន្ទាប់ កាត់បន្ថយអត្រាស្លាប់ឱ្យនៅទាបបំផុត ជាក់ស្តែងដើមឆ្នាំ២០២៥នេះ កូនផ្សោតកើតថ្មីមាន៧ក្បាល និងពុំទាន់មានផ្សោតស្លាប់នៅឡើយទេ ដែលធ្វើឱ្យចំនួនផ្សោត កើនរហូតដល់១១១ក្បាល។ ប្រជាពលរដ្ឋមូលដ្ឋានកំពុងទទួលបានចំណូលពីការផ្តល់សេវាដល់ភ្ញៀវទេសចរណ៍ ដូចជាការនាំទេសចរណ៍ជិះទូកមើលផ្សោត ការលក់វត្ថុអនុស្សាវរីយ៍ ការស្នាក់នៅ និងការបម្រើម្ហូបអាហារផ្សេងៗ។
តាងនាមរាជរដ្ឋាភិបាលដែលមានក្រសួងកសិកម្ម រុក្ខាប្រមាញ់ និងនេសាទ ជាសេនាធិការ រដ្ឋមន្រ្តី ឌិត ទីណា បានប្តេជ្ញាបន្តប្រឹងប្រែងឱ្យអស់លទ្ធភាពក្នុងកិច្ចការពារធនធានដ៏មានតម្លៃនេះសម្រាប់កិត្តិយសជាតិជួយដល់ប្រជាពលរដ្ឋ និងសហគមន៍មូលដ្ឋានទទួលបានប្រាក់ចំណូល លើកកម្ពស់ជីវភាពឱ្យបានល្អប្រសើរ ជាពិសេសការការពារសត្វផ្សោតទន្លេមេគង្គកម្ពុជា ដែលជារតនសម្បត្តិធម្មជាតិមានជីវិតដ៏ពិសិដ្ឋ និងជាកេរិ៍្តដំណែលសម្រាប់កូនចៅ ជំនាន់ក្រោយៗទៀត។
ក្នុងឱកាសដ៏វិសេសវិសាលនេះ សម្ដេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ព្រះអង្គសព្វព្រះរាជហឬទ័យប្រោសព្រះរាជទានអំណោយថវិកាសប្បុរសចំនួន១ម៉ឺនដុល្លារ និងឯកសារផ្សេងៗដល់ក្រសួង កសិកម្ម រុក្ខាប្រមាញ់ និងនេសាទ តាមរយៈលោករដ្ឋមន្រ្តី ឌិត ទីណា សម្រាប់តម្កល់ជាឧត្តមប្រយោជន៍សម្រាប់អភិរក្សសត្វផ្សោត៕
