(ភ្នំពេញ)៖ លោក ស៊ុន មេសា អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ នៅថ្ងៃទី២៧ ខែឧសភា ឆ្នាំ២០២៥ បានកម្មវិធី TVET ពិតជាផ្ដល់ប្រាក់ឧបត្ភម្ថ ២៨ម៉ឺនរៀលក្នុងមួយខែជូនដល់សិស្សទាំងអស់ និងទទួលបានការងារពិតប្រាកដ។

ក្នុងកិច្ចសម្ភាសជាមួយអង្គភាព Fresh News, លោក ស៊ុន មេសា បានលើកឡើងពីបញ្ហានានាដែលក្រសួងបានជួបប្រទះ ក្រោយដាក់ដំណើរការកម្មវិធី TVET កាលពីខែមករា​ ឆ្នាំ២០២៤ ដែលជាបវេសនកាលដំបូង។ លោក បានបន្តថា មកដល់ពេលនេះមានអ្នកស្នើឈ្មោះជាង១១៤,០០០នាក់ ក្នុងនោះអ្នកកំពុងសិក្សា និងបានបញ្ចប់ការសិក្សា ៧២,០០០នាក់ ហើយអ្នកបញ្ចប់ការសិក្សាដែលមានការងារធ្វើចំនួន ១៦,០០០នាក់ផងដែរ។

បន្ថែមពីនេះ លោកស៊ុន មេសា បានបញ្ជាក់ថាកម្មវិធី TVET សិក្សារយៈពេលខ្លី ហើយទទួលបានការងារមួយដែលមានប្រាក់ខែសមរម្យ អាចកែប្រែជីវភាពកាន់តែល្អប្រសើរ។

ដោយ លោក ស៊ុន មេសា បានគូសបញ្ជាក់ថា​៖​ «មិនថាបងប្អូនសិក្សាបានត្រឹមថ្នាក់ទី១ក៏ដោយ ទី២ក៏ដោយ ទី៣ក៏ដោយ ទី៤ក៏ដោយ ទី៥ក៏ដោយ ឱ្យតែបងប្អូនចង់ចូលរៀន អាចចុះឈ្មោះរៀនវគ្គបណ្ដុះបណ្ដាលវិជ្ជាជីវៈ កម្រិត C1 បានដែរ»។

ជាមួយគ្នានេះ អ្នកនាំពាក្យក្រសួងការងារ ក៏បានរំលេចពីការបែងចែកកាលវិភាគសម្រាប់ការសិក្សា ដែលមានរហូតដល់ទៅ៧វេនសិក្សា ដែលផ្ដល់ជាជម្រើសបន្ថែមជូនដល់ប្រជាពលរដ្ឋ ដែលមានបំណងមកសិក្សា៕