(ព្រះសីហនុ)៖ លោកឧត្តមសេនីយ៍ឯក ស រដ្ឋា អគ្គស្នងការរង និងជាស្នងការនគរបាលខេត្តព្រះសីហនុ បានចាត់ឱ្យលោកឧត្តមសេនីយ៍ត្រី ស៉ី ធឿនតុលា ស្នងការរងផែនសណ្តាប់ធ្នាប់ ដឹកនាំកម្លាំងនគរបាលចរាចរណ៍ផ្លូវគោក ចុះរឹតបន្តឹងច្បាប់ស្តីពីចរាចរណ៍ផ្លូវគោក ត្រួតពិនិត្យរកជាតិស្រវឹង ផ្ទុកសារធាតុញៀនលើអ្នកបើកបរ និងត្រួតពិនិត្យបច្ចេកទេសយានយន្តធន់ធំ ដើម្បីទប់ស្កាត់ កាត់បន្ថយការគ្រោះថ្នាក់ចរាចរណ៍កើតឡើងជាយថាហេតុ ដែលបង្កឡើងដោយការធ្វេសប្រហែស មានភាពមិនប្រក្រតីលើអ្នកបើកបរ និងភាពខ្លះខាតបច្ចេកទេសយានយន្តខាងលើ។
ប្រតិបត្តិការនេះធ្វើឡើងនៅរសៀលថ្ងៃទី៣១ ខែឧសភាឆ្នាំ២០២៥ តាមបណ្តោយផ្លូវជាតិលេខ៤ ម្តុំរោងច្រស្តារក្រោនឃ្លាំងលើ ស្ថិតក្នុងសង្កាត់លេខ៣ ក្រុងព្រះសីហនុ។
លោកឧត្តមសេនីយ៍ត្រី បានលើកឡើងថា ដើម្បីកាត់បន្ថយការគ្រោះថ្នាក់ចរាចរណ៍កើតឡើង គឺយើងត្រូវចូលរួមទប់ស្កាត់ទាំងអស់គ្នា ទាំងសមត្ថកិច្ច ទាំងអ្នកធ្វើដំណើរតាមដងផ្លូវត្រូវចូលរួមអនុវត្តច្បាប់ គោរពច្បាប់ ស្វែងយល់ពីផលប៉ះពាល់នៃគ្រោះថ្នាក់ចរាចរណ៍ កុំភ្លេចពាក់មួកសុវត្តិភាព កុំបើកបរលើសល្បឿនកំណត់ កុំវ៉ាជែងក្នុងស្ថានភាពគ្រោះថ្នាក់ កុំបើកបរក្នុងស្ថានភាពស្រវឹង ជាពិសេសហាមដាច់ខាតការសេពគ្រឿងញៀន ហើយយើងត្រូវចាំថាយើងមានក្រុមគ្រួសារ កំពុងតែរង់ចាំនៅផ្ទះ។
លោកបន្ថែមទៀតថា អ្នកបើកបរគ្រប់រូបត្រូវចូលរួមគោរពច្បាប់ស្ដីពីចរាចរណ៍ផ្លូវគោកជាពិសេស ពាក់មួកសុវត្ថិភាព មិនបើកបរបញ្ច្រាស់ទិសចរាចរណ៍ គោរពភ្លើងសញ្ញា-ផ្លាកសញ្ញាចរាចរណ៍ កុំបើកបរលើសល្បឿនកំណត់មិនបើកបរស្ថិតក្រោម ឥទ្ធិពល នៃគ្រឿងស្រវឹង-គ្រឿងញៀន ត្រូវប្រុងប្រយ័ត្នខ្ពស់គ្រប់ផ្លូវបំបែក ផ្លូវប្រសព្វការឈប់ចតឱ្យបានត្រឹមត្រូវមានសណ្តាប់ធ្នាប់ ដើម្បីជៀសផុតពីគ្រោះថ្នាក់ចរាចរណ៍កើតឡើងជាយថាហេតុស្រលាញ់ជីវិតអ្នក ស្រលាញ់ក្រុមគ្រួសារអ្នក ស្រលាញ់ទ្រព្យសម្បត្តិអ្នក និងទ្រព្យសម្បត្តិសាធារណៈ យើងទាំងអស់គ្នាត្រូវចូលរួមគោរពច្បាប់ស្តីពីចរាចរណ៍ផ្លូវគោក ធ្វើដំណើរប្រកបដោយសុវត្ថិភាព និងសុខសប្បាយទាំងអស់គ្នា។
លោកឧត្តមសេនីយ៍ត្រី បានគូសបញ្ជាក់ថា ក្រៅពីចុះរឹតបន្តឹងច្បាប់ចរាចរណ៍ផ្លូវគោក លោកក៏បានបែងចែកកម្លាំងប្រចាំការនៅការិយាល័យ តាមគោលដៅសំខាន់ៗក្នុងខេត្ត និងកម្លាំងល្បាតចល័ត ដើម្បីសម្របសម្រួលចរាចរណ៍ជូនថ្នាក់ដឹកនាំគ្រប់ជាន់ថ្នាក់ជាតិ-អន្តរជាតិ បងប្អូនប្រជាពលរដ្ឋ ភ្ញៀវទេសចរណ៍ជាតិ-អន្ដរជាតិ ដែលមកបំពេញភារកិច្ច និងកម្សាន្តលេងខេត្តព្រះសីហនុ កុំឱ្យមានការកកស្ទះចរាចរណ៍។ ចំណែកផ្លូវទឹកមានកម្លាំងនគរបាលចរាចរណ៍ផ្លូវទឹក ប្រចាំការនៅកំពង់ផែទូកទេសចរណ៍ និងល្បាតតាមឆ្នេរសមុទ្រដើម្បីការពារសន្តិសុខ សុវត្ថិភាព ជូនភ្ញៀវទេសចរជាតិ/អន្តរជាតិ/ភ្ញៀវបរទេស និង ប្រជាពលរដ្ឋ មកលេងកម្សាន្ត តាមឆ្នេរ និងកោះ។
លោកវរសេនីយ៍ត្រី ស៉ី ធឿនតុលា លើកឡើងទៀតថា ក្រោយធ្វើកិច្ចការងារនេះយ៉ាងមមាញឹកយប់ថ្ងៃជាប្រចាំ ដោយមិនដកដៃនោះ យោងតាមរបាយការណ៍ឃើញចំនួនអ្នកគ្រោះថ្នាក់ រងរបួសធ្ងន់ស្រាល និងស្លាប់ មានការថយចុះជាងមុនផងដែរ។
ចុងក្រោយលោកសំណូមពរម្តងហើយ ម្តងទៀតដល់អ្នកប្រើប្រាស់យានយន្តគ្រប់ប្រភេទចូលរួមគោរពច្បាប់ចរាចរណ៍ផ្លូវគោកឲ្យបានគ្រប់ៗគ្នា បើបងប្អូនគោរពបានត្រឹមត្រូវគ្មាននគរបាលឯណាទៅផាកពិន័យបងប្អូនបានឡើយ សូមគោរពច្បាប់មួយនេះឲ្យបានល្អ ជាជាងខ្លាចនគរបាលចរាចរណ៍៕
