(តាកែវ)៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានថ្លែងថា ភាពម្ចាស់ការលើសន្តិសុខស្បៀងក្នុងពេលកម្ពុជាជួបការលំបាកដូចជាការរាតត្បាតជំងឺកូវីដ១៩ និងពេលបិទព្រំដែនជាមួយថៃ បង្ហាញពីភាពត្រឹមត្រូវនៃគោលនយោបាយកសិកម្មរបស់កម្ពុជា។ ផ្អែកលើការឆ្លងកាត់សង្គ្រាមនេះ និងព្រឹត្តិការណ៍អាក្រក់កន្លងទៅកម្ពុជាបានជំរុញផលិតកម្មក្នុងស្រុក និងអាចនាំចេញទៅទីផ្សារក្រៅប្រទេសថែមទៀតផង។
ការថ្លែងបែបនេះរបស់សម្តេចបវរធិបតី ហ៊ុន ម៉ាណែត បានធ្វើឡើងនៅព្រឹកថ្ងៃទី១ ខែកក្កដា ឆ្នាំ២០២៥នេះ នៅក្នុងឱកាសដែលសម្តេច បានអញ្ជើញជាអធិបតីប្រារព្ធទិវាមច្ឆជាតិ និងលែងកូនត្រីប្រមាណ ១.៥លានក្បាល ចូលបឹងទន្លេបាទី ស្ថិតក្នុងភូមិថ្នល់ទក្សិណ ឃុំក្រាំងធ្នង់ ស្រុកបាទី ខេត្តតាកែវ។
សម្តេចបវរធិបតី ហ៊ុន ម៉ាណែត បានថ្លែងយ៉ាងដូច្នេះថា៖ «ហើយការដាក់ចេញនូវគោលនយោបាយត្រឹមត្រូវនេះ គឺបានធ្វើឱ្យយើងបង្ហាញនូវភាពម្ចាស់ការ ក្នុងកាលៈទេសៈដែលលំបាក ឧទាហរណ៍កំលុងកូវីដ១ យើងបិទទាំងអស់ ទោះបីមានឡានទំនិញនៅបើកខ្លះ ប៉ុន្តែ វាមិនដូចមុនទេ ផលិតផលខ្លះ គឺត្រូវបិទនាំចូលទាំងស្រុង […] អ៊ឹចឹងយើងមានភាពម្ចាស់ការរបស់យើងផ្គត់ផ្គង់ផ្ទៃក្នុង»។
បន្ថែមពីនេះ សម្តេចបវរធិបតី ហ៊ុន ម៉ាណែត បានសង្កត់ធ្ងន់ៗថា នៅចំពោះមុខនៃបញ្ហាបិទព្រំដែនរវាងកម្ពុជា និងថៃ ដោយហាមឃាត់មិនឱ្យទំនិញរបស់ថៃ ចូលមកចរាចរណ៍លក់នៅលើទឹកដីកម្ពុជា នៅក្នុងដំណាក់កាលប្រទេសទាំងពីរកំពុងមានជម្លោះនេះ គឺបានបង្ហាញឱ្យឃើញនូវគោលនយោបាយដ៏ត្រឹមត្រូវរបស់រាជរដ្ឋាភិបាលកម្ពុជា នៅច្រើនវិស័យ ដែលអាចឱ្យកម្ពុជា ម្ចាស់ការបាននៅក្នុងដំណាក់កាលដែលលំបាកនេះ។
សម្តេចបវរធិបតី ហ៊ុន ម៉ាណែត បានលើកឡើងថា ជាក់ស្តែងបញ្ហាព្រំដែនដែលកំពុងតែកើតមានឡើងគោលនយោបាយរបស់រាជរដ្ឋាភិបាល ដែលបានដាក់ចេញជាយូរឆ្នាំ គឺបានពង្រឹងលើវិស័យអប់រំ, សុខាភិបាល ការពង្រឹងហេដ្ឋារចនាសម្ព័ន្ធរូបវ័ន្ត ទឹក ផ្លូវ ភ្លើង បច្ចេកវិទ្យា សេវាអ៉ីនធឺណែត ជាដើម។ ចំណុចនៃការពង្រឹងសមត្ថភាពក្នុងភាពជាម្ចាស់ការរបស់កម្ពុជា គឺបានចេញដោយរាជរដ្ឋាភិបាល និងមានការចូលរួមពួតដៃគ្នាពីសំណាក់វិស័យឯកជនផងដែរ។
ជាមួយគ្នានេះដែរ សម្តេចបវរធិបតី នាយករដ្ឋមន្ត្រី បានគូសបញ្ជាក់ថា ការដាក់ចេញនូវគោលនយោនបាយ និងភាពច្បាស់លាស់របស់រាជរដ្ឋាភិបាលកម្ពុជា លើដំណើរការអភិវឌ្ឍ និងពង្រឹងសមត្ថភាពរបស់ខ្លួនឥតឈប់ឈរនេះ បានធ្វើឱ្យកម្ពុជាអាចតទល់បានដោយងាយស្រួលចំពោះការព្យាយាម និងការប៉ុនប៉ង់គំរាមកំហែងពីសំណាក់ប្រទេសថៃ មកលើប្រទេសកម្ពុជា។
ចំពោះបញ្ហាដែលកំពុងកើតឡើងនៅតាមបន្ទាត់ព្រំដែនរវាងកម្ពុជា និងថៃ, ត្រូវបានសម្តេចបវរធិបតី ហ៊ុន ម៉ាណែត បានអះអាងថា បើទោះបីជាមានការគំរាមកំហែងតាមរយៈការប្រើប្រាស់កម្លាំងប្រដាប់អាវុធ គំរាមកំហែងតាមផ្លូវច្បាប់ ជាពិសេសការគំរាមកំហែងផ្នែកសេដ្ឋកិច្ចពីសំណាក់ប្រទេសថៃ មកលើកម្ពុជា ដោយប្រកាសបិទច្រកព្រំដែនមិនឱ្យទំនិញចូលមកកម្ពុជា បិទការនាំចូលប្រេង បិទភ្លើង បិទប្រព័ន្ធអ៉ីនធឺណែត និងការគំរាមកំហែងនានារបស់ថៃ គឺមិនអាចធ្វើអ្វីមកលើកម្ពុជា ជាដាច់ខាត។ ចំណុចនេះដោយសារតែរាជរដ្ឋាភិបាលកម្ពុជា ដាក់ចេញនូវគោលនយោបាយវិនិយោគ ក្នុងភាពជាម្ចាស់ការរបស់ខ្លួនលើគ្រប់វិស័យ។
សម្តេចបវរធិបតី ហ៊ុន ម៉ាណែត បានគូសបញ្ជាក់ថា៖ «ភាពជាម្ចាស់ការលើខ្លួនឯងនេះ គឺគ្មាននរណាគេមើលងាយកម្ពុជា បាននោះទេ។ នេះជាគោលនយោបាយដ៏ត្រឹមត្រូវ ស្ថានភាពសន្តិសុខ សណ្តាប់ធ្នាប់ ស្ថិរភាពនយោបាយ សន្តិភាពរបស់យើងរឹងមាំអាចធានា បើបើសិនជាគ្មាននយោបាយឈ្នះឈ្នះ ប្រហែលម៉ោងនេះយើងពិបាក ហើយរត់ទៅពឹងលិច ពឹងកើត ដើម្បីជួយ តែយើងបញ្ចប់សង្គ្រាមស៉ីវិល បានភ្ជាប់តំបន់អតីតគ្រាប់ផ្លោងទៅជាតំបន់កសិកម្ម មានហេដ្ឋារចនាសម្ព័ន្ធ ជាទីតាំងដែលប្រជាជនរស់នៅសម្បូរសប្បាយ»។
សម្តេចបវរធិបតី ហ៊ុន ម៉ាណែត បានបន្ថែមថា សម្តេចបានណែនាំឱ្យរៀបចំគោលនយោបាយវិនិយោគ ដើម្បីជំរុញបង្កើនករអភិវឌ្ឍកសិឧស្សាហកម្ម និងឧស្សាហកម្មនៅភាគខាងលិចប្រទេសកម្ពុជាបបន្ថែមទៀត។
បន្ថែមពីនេះ សម្តេចបវរធិបតី ហ៊ុន ម៉ាណែត បានគូសបញ្ជាក់ថា ភាពធន់របស់កម្ពុជានេះគឺបានចាក់ឫសនៅក្នុងគោលនយោបាយ «ឈ្នះឈ្នះ» របស់គណបក្សប្រជាជនកម្ពុជា ដែលបានរួមចំណែកដល់ការសន្តិសុខស្បៀង សុខសន្តិភាព ការអភិវឌ្ឍន៍ និងផលិតភាពរបស់ប្រទេស៕
