(ប្រ៊ីហ្គាដ)៖ ប្រទេសស៊ែប៊ីកំពុងតែរងសម្ពាធយ៉ាងខ្លាំង ខណៈដែលមន្ត្រីជាន់ខ្ពស់ នៃក្រសួងការបរទេសអាមេរិក ដែលមកទស្សនកិច្ចនៅរដ្ឋធានី Belgrade បានណែនាំឲ្យប្រទេសអឺរ៉ុបមួយនេះ ជ្រើសរើសយកភាគីដែលត្រូវដើរតាម រវាងអាមេរិក និងរុស្ស៊ី ឲ្យច្បាស់លាស់បានតែមួយប៉ុណ្ណោះ ដោយមិនអាចឲ្យជើងមួយជាន់ទូកពីរនោះឡើយ។ នេះបើតាមការចេញផ្សាយនៅមុននេះបន្តិច ដោយសារព័ត៌មាន sputnik នារសៀលថ្ងៃសៅរ៍ ទី០៤ ខែវិច្ឆិកា ឆ្នាំ២០១៧។
អនុរដ្ឋមន្ត្រីការបរទេសអាមេរិក ទទួលបន្ទុកកិច្ចអាស៊ី-អឺរ៉ុប លោក Hoyt Brian Yee បានប្រាប់បណ្តាថ្នាក់ដឹកនាំកំពូលៗរបស់ប្រទេសស៊ែប៊ី ក្នុងដំណើរទស្សនកិច្ចនាសប្តាហ៍នេះថា «ប្រទេសរបស់អ្នក មិនអាចអង្គុយលើកៅអីពីរ នៅក្នុងពេលតែមួយបាននោះទេ»។ ស៊ែប៊ីគឺជាប្រទេសកុម្មុយនិស្តមួយដែលធ្លាប់ជាសមាជិក នៃបណ្តាប្រទេសមិនចូលបក្ខសម្ព័ន្ធ ក្នុងសហភាព Yugoslavia កាលពីសម័យសង្គ្រាមត្រជាក់។
ទោះបីជាបែបនេះក្តី មន្ត្រីកំពូលអាមេរិករូបនេះ ហាក់ដូចជាកំពុងបង្ខំឲ្យស៊ែប៊ី ជ្រើសរើសយកផ្លូវដើរ ឬសម្ព័ន្ធមិត្តមួយជាគោល ទាំងមិនបានបញ្ជាក់ថា តើផលប្រយោជន៍អ្វីខ្លះ ដែលប្រទេសនេះនឹងត្រូវទទួលបាននោះឡើយ។ ទោះបីជាយ៉ាងណាក៏ដោយ ជាការឆ្លើយតបទៅវិញនោះ រដ្ឋមន្ត្រីការបរទេសស៊ែប៊ី លោក Ivica Dacic ដែលជាសមាជិករដ្ឋាភិបាលឆ្វេងនិយម បានបញ្ជាក់ច្បាស់ៗតបវិញថា «ស៊ែប៊ី នឹងបន្តព្យាយាមរក្សាទំនាក់ទំនងប្រកបដោយតុល្យភាពរវាង សហរដ្ឋអាមេរិក សហភាពអឺរ៉ុប រុស្ស៊ី និងចិន។ អ្វីដែលយើងមិនចង់ឃើញនោះ គឺនរណាម្នាក់ ដែលមកធាក់យើង ចេញពីកៅអីដែលយើងកំពុងអង្គុយ។ អ្វីដែលសំខាន់នោះ គឺយើងនឹងសម្លឹងមើលថា តើអ្វីដែលជាផលប្រយោជន៍ល្អបំផុតរបស់យើង»៕
