(ភ្នំពេញ)៖ ប្រភពពីអ្នកដឹងរឿងបានទម្លាយចេញនៅតុគុយទាវឆ្ងាញ់ ជាប់រដ្ឋបាលព្រៃឈើឲ្យដឹងថា កាលពីខែមករាកន្លងទៅគេបានឃុបឃិតគ្នាដេញថ្លៃឈើ ដែលគណៈកម្មការបង្ក្រាបបាននៅក្នុងខេត្តត្បូងឃ្មុំ ក្រចេះ និងមណ្ឌលគិរី តាមរបៀបចងមុងស្ងាត់ៗម្ដងរួចមកហើយ ដោយកាលណោះគេអះអាងថា ក្រុមហ៊ុនរបស់ «ឧកញ៉ាជ័យ» ឈ្មួញឈើល្បីល្បាញជាអ្នកដេញថ្លៃ បានដោយហ៊ានចំណាយទឹកតែខ្ពស់។

ឥឡូវក្រុមហ៊ុនដែលដេញថ្លៃបាននោះបានរត់ការសុំបើកម៉ាស៊ីអារ និងច្រៀកឈើ នៅកន្លែងស្តុកឈើលើទីតាំងក្រុមហ៊ុនប្រព្រឹត្តបទល្មើសដែល គណៈកម្មការចុះទៅបង្ក្រាបបាននាពេលកន្លងមកតែម្ដង ហើយឮថាទំនងជំនាញគេ OK ហើយ។ គេថាបើជំនាញ OK ឲ្យក្រុមហ៊ុនដែលដេញថ្លៃ បានបង្កើតរោងម៉ាស៊ីន អារ និងច្រៀកឈើ នៅលើទីតាំងស្តុកឈើនៅកណ្ដាលព្រៃមែននោះ វាមិនខុសពីយកមេមាន់ទៅដាក់ឲ្យពងលើជង្រុកស្រូវនោះទេ។

គេថា ទីតាំងដែលក្រុមហ៊ុនដេញថ្លៃឈើ ពីរដ្ឋបានសុំបង្កើតរោងម៉ាស៊ីនអារ និងច្រៀកឈើនោះ គឺនៅលើទីតាំងក្រុមហ៊ុនប្រព្រឹត្តបទល្មើសព្រៃ ឈើដែលគណៈកម្មការបង្ក្រាបបទល្មើស ធនធានធម្មជាតិធ្វើការបង្ក្រាប បាននាពេលកន្លងមកចំនួន៥ក្រុមហ៊ុន នៅកណ្ដាលព្រៃក្នុងខេត្តមណ្ឌលគិរី។

អ្នកដឹងរឿងបានខ្សឹបប្រាប់ថា ពេលដេញថ្លៃគេកំណត់អោយក្រុមហ៊ុនដេញថ្លៃ បានដឹកឈើចេញអោយអស់ពីខេត្តមណ្ឌលគិរី ក្នុងរង្វង់៦០ថ្ងៃ ដើម្បីកុំអោយកើតមានករណី «កន្ទេលធំបន្លំដេក» ដូចកន្លងមក, តែឥឡូវបើគេអនុញ្ញាតឲ្យក្រុមហ៊ុនដេញថ្លៃ បានបង្កើតរោងម៉ាស៊ីនអារ និងច្រៀកឈើ នៅទីតាំងក្រុមហ៊ុនប្រព្រឹត្តល្មើសនៅកណ្ដាលព្រៃមែននោះ បទល្មើសព្រៃឈើតាមរយៈកាប់ឈើ ពីក្រៅដឹកចូលក្រុមហ៊ុនបន្លំជាមួយឈើដេញ ថ្លៃបាននឹងកើតឡើងសារជាថ្មីជាមិនខាន។

ដូច្នេះ សូមរដ្ឋមន្ត្រីក្រសួងកសិកម្ម មេត្តាជួយពិនិត្យមើលនិងទប់ស្កាត់នូវផែនការរត់ការសុំបង្កើតរោងម៉ាស៊ីនអារ និងច្រៀកឈើ ដែលដេញថ្លៃបាននៅកណ្ដាលព្រៃនេះផង។

យោងតាមគណៈកម្មការរដ្ឋបាលព្រៃឈើ ចុះត្រួតពិនិត្យ និងវាយតម្លៃឈើ ដែលបានមកពីការបង្ក្រាបបទល្មើសកាលពីចុងឆ្នាំ២០១៩ ហើយធ្វើរបាយការណ៍ រាយការណ៍ជូនរដ្ឋមន្ត្រីក្រសួងកសិកម្ម កាលពីថ្ងៃទី១៦ ខែមករា ឆ្នាំ២០២០ កន្លងទៅ នៅក្នុងខេត្តត្បូងឃ្មុំ, ក្រចេះ និងមណ្ឌលគិរី មានចំនួនជាង៧ពាន់ម៉ែត្រគូប ដែលមានតម្លៃមូលដ្ឋានស្មើទឹកប្រាក់ជាង៤ពាន់លានរៀលឯណោះ ដើម្បីធ្វើការដាក់ពិគ្រោះថ្លៃ (ដេញថ្លៃ) ប្រមូលថវិកាបង់ចូលរដ្ឋ ព្រោះចូលដល់រដូវក្ដៅឈើ ដែលរក្សាទុកនៅទីតាំងទាំងអស់នោះ ងាយនឹងរងនូវហានិភ័យភ្លើងឆេះខូចខាត៕