(ជូបហ្សាណា)៖ រដ្ឋមន្រ្តីការបរទេសនៃប្រទេសស្លូវេនី លោក Tanja Fajon បាននិយាយថា ស្លូវេនីកាលពីថ្ងៃព្រហស្បតិ៍ ទី១៧ ខែកក្កដា បានសម្រេចប្រកាសចាត់ទុក រដ្ឋមន្រ្តីស្តាំនិយមជ្រុល២រូបរបស់ប្រទេសអ៉ីស្រាអែល គឺលោក Itamar Ben-Gvir និងលោក Bezalel Smotrich ជាបុគ្គលដែលមិនត្រូវបានស្វាគមន៍។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

ប្រការនេះនាំឱ្យស្លូវេនីក្លាយជាសមាជិកដំបូងគេនៅសហភាពអឺរ៉ុប (UN) ដែលបានធ្វើបែបនោះ។ រដ្ឋាភិបាលស្លូវេនី បានចោទប្រកាន់ រដ្ឋមន្រ្តីសន្តិសុខជាតិអ៉ីស្រាអែល លោក Ben-Gvir និងរដ្ឋមន្រ្តីហិរញ្ញវត្ថុអ៉ីស្រាអែល លោក Smotrich ដែលទាំងពីរនាក់សុទ្ធតែជា​អ្នកតាំងទីលំនៅក្នុងតំបន់ West Bank ថាបានធ្វើសេចក្តីថ្លែងការណ៍ ដែលជំរុញអំពើប្រល័យពូជសាសន៍ និងដុតបញ្ឆេះហិង្សាប្រឆាំងជនជាតិប៉ាឡេស្ទីន។

លោក Fajon បាននិយាយថា ស្លូវេនីបានសម្រេចចិត្តធ្វើយ៉ាងដូច្នោះ បន្ទាប់ពីក្រុមរដ្ឋមន្រ្តីការបរទេស EU មិនអាចព្រមព្រៀងគ្នា​លើសកម្មភាពរួមប្រឆាំងអ៉ីស្រាអែល ជុំវិញការចោទប្រកាន់ពីបទរំលោភបំពានសិទ្ធិមនុស្ស នៅឯកិច្ចប្រជុំក្នុងទីក្រុងព្រុចសែល កាលពីថ្ងៃអង្គារសប្តាហ៍នេះ។

គួរបញ្ជាក់ថា កាលពីឆ្នាំមុន ស្លូវេនីបានប្រកាសទទួលស្គាល់ ប៉ាឡេស្ទីនជារដ្ឋឯករាជ្យ ខណៈកាលពីខែមិថុនាកន្លងទៅ ចក្រភពអង់គ្លេស ន័រវែស អូស្រ្តាលី នូវែលសេឡង់ និងកាណាដា បានដាក់ទណ្ឌកម្មលើរដ្ឋមន្រ្តីអ៉ីស្រាអែលទាំងពីររូបនោះ ជាមួយការចោទប្រកាន់ថា ពួកគេបានបំផុសបំផុលឱ្យមានអំពើហិង្សាប្រឆាំងជនជាតិប៉ាឡេស្ទីន៕