(វ៉ាស៉ីនតោន)៖ ការបិទការិយាល័យមួយ ដែលទទួលបន្ទុកដោះស្រាយបញ្ហា សម្រាប់អ្នកការទូតអាមេរិក និងក្រុមគ្រួសារពួកគេនៅបរទេស កាលពីសប្តាហ៍មុន បានទទួលរងនូវការរិះគន់យ៉ាងខ្លាំង។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន Reuters នៅថ្ងៃសុក្រ ទី១៨ ខែកក្កដា ឆ្នាំ ២០២៥។

ការិយាល័យនេះ បានទទួលការជូនដំណឹងអំពីការបិទបញ្ចប់ការងារ នៅថ្ងៃសុក្រសប្តាហ៍មុន ជាមួយនិងបុគ្គលិកជាង ១ ៣៥០នាក់ និងបង្កឱ្យមានការភ្ញាក់ផ្អើលយ៉ាងខ្លាំង។ ការបិទការិយាល័យនេះ គឺជាផ្នែកមួយនៃការកែសម្រួលដ៏ធំ ក្នុងក្រសួងការបរទេស ដោយលោកប្រធានាធិបតី ត្រាំ អនុវត្តតាមគោលនយោបាយ «America First» របស់លោក។

តាមលិខិតរបស់ក្រសួងការបរទេសដែល Reuters ទទួលបាន ការកែសម្រួលត្រូវបានធ្វើឡើង ដោយប្រុងប្រយ័ត្ន។ ប៉ុន្តែ​នៅតែមានចម្ងល់​មួយ​ចំនួន ជុំវិញការសម្រេចចិត្តបិទការិយាល័យ Office of Casualty Assistance ដែលទទួលបន្ទុក​គាំទ្រអ្នកការទូតអាមេរិក និងក្រុមគ្រួសារពួកគេនៅក្រៅប្រទេស ​ក្នុងករណីមានអ្នកការទូតឬសមាជិកគ្រួសារ ស្លាប់ឬក៏រងរបួសធ្ងន់។

កំណែទម្រង់បែបនេះ បានទាក់ទាញការរិះគន់យ៉ាងខ្លាំង ពីសមាជិកព្រឹទ្ធសភានៃគណបក្សប្រជាធិបតេយ្យ អតីតមន្ត្រីការទូត និងអតីតរដ្ឋមន្រ្តីការបរទេស ដោយពួកគេចាត់ទុកថាជាវិធីសាស្រ្តបំពាន។ ក្រុមអ្នករិះគន់និយាយថា វាទាក់ទងនឹងការបណ្តេញបុគ្គលិកជំនាញ មានបទពិសោធន៍ និងធ្លាប់ធ្វើការនៅតំបន់ឆ្ងាយៗនៃពិភពលោក ហើយបុគ្គលិកដែលមានជំនាញបែបនេះ ពិបាកនឹងអ្នកមកជំនួសណាស់ក្នុងពេលភ្លាមៗ៕