(ភ្នំពេញ)៖ ​ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍​ ​​រដ្ឋាករទឹកស្វយ័តក្រុងភ្នំពេញ​ ​បានដាក់ផែនការពង្រីកការផ្គត់ផ្គង់ទឹកស្អាត សម្រាប់អ្នកជំងឺនៅតាមមន្ទីរពេទ្យទទួលទានដោយឥតគិតថ្លៃ តាមរយៈការបំពាក់ប្រព័ន្ធបន្សុទ្ធទឹកបរិសុទ្ធ​​នៅតាមបណ្តាមន្ទីរពេទ្យនានា ដើម្បីដាក់ជូន​ដល់អ្នកសម្រាកព្យាបាលជំងឺ ទទួលពិសាដោយមិនគិតថ្លៃ​ ក្នុងគោលបំណងកាត់បន្ថយការចំណាយរបស់អ្នកជំងឺ។

ប្រព័ន្ធបន្សុទ្ធទឹកបរិសុទ្ធ​ ដែលបានបំពាក់ជូននៅតាមមន្ទីរពេទ្យនេះ គឺផ្តល់ទឹកស្អាតដែលមានគុណភាពខ្ពស់ស្របតាមស្តង់ដារទឹកស្អាត​ ដើម្បីលើកកម្ពស់អនាម័យ និងសុវត្ថិភាព សុខភាព នៅក្នុងមន្ទីរពេទ្យ​ និងកាត់បន្ថយហានិភ័យ នៃការចម្លងមេរោគ។ ​​ការបំពាក់ប្រព័ន្ធបន្សុទ្ធទឹកបរិសុទ្ធនេះ នឹងចូលរួមចំណែកយ៉ាងសំខាន់ក្នុងការលើកកម្ពស់គុណភាព សេវាព្យាបាល និងសុវត្ថិភាព សុខុមាលភាពជូនប្រជាពលរដ្ឋ ជាពិសេសកុមារី-កុមារាកម្ពុជាទាំងអស់ ដែលមកទទួលសេវាកម្មព្យាបាលនៅក្នុងមន្ទីរពេទ្យ។

លោក ហែម វណ្ណឌី រដ្ឋមន្រ្តីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានលើកឡើងថា ការបំពាក់ប្រព័ន្ធបន្សុទ្ធទឹកបរិសុទ្ធ​​នៅតាមបណ្តាមន្ទីរពេទ្យនានា នឹងជួយសម្រួលបន្ទុកថវិការបស់ពលរដ្ឋដែលរកសេវាព្យាបាលនៅតាមមន្ទីរពេទ្យ​ ក៏ដូចជាកាត់បន្ថយការសំណល់ប្លាស្ទិកផងដែរ។

បើតាមលោករដ្ឋមន្រ្តី ​មកទល់ពេលនេះ ប្រព័ន្ធបន្សុទ្ធទឹកបរិសុទ្ធនេះ បានដាក់ឱ្យប្រើប្រាស់នៅតាមមន្ទីរពេទ្យចំនួន២ហើយក្នុងរាជធានីភ្នំពេញ រួមមានមន្ទីរពេទ្យគន្ធបុប្ផា និងមន្ទីរព្រះអង្គឌួង ហើយនៅពេលខាងមុខ ​ក្រសួងឧស្សាហកម្ម និង​រដ្ឋាករទឹកស្វយ័តក្រុងភ្នំពេញ នឹងបន្តដាក់នៅតាមមន្ទីរពេទ្យចំនួន៧ទៀត និងពិនិត្យលទ្ធភាពដាក់នៅតាមមន្ទីរពេទ្យផ្សេងទៀតនៅតាមខេត្តផងដែរ។

​ប្រព័ន្ធបន្សុទ្ធទឹកបរិសុទ្ធ​ មានសមត្ថភាពផលិតទឹកស្អាតបាន២៥០លីត្រក្នុងមួយម៉ោង ក្នុងនោះម៉ាស៊ីនចំនួន២គ្រឿង មានទីតាំងស្ថិតនៅក្នុងបរិវេណនៃអគារគន្ធបុប្ផាទី៤ ចំនួន១គ្រឿង និងអគារគន្ធបុប្ផាទី៥ ចំនួន១គ្រឿង ដោយយកប្រភពទឹកពីបណ្តាញទុយោទឹកស្អាត របស់រដ្ឋាករទឹកស្វយ័តក្រុងភ្នំពេញ។

ម៉ាស៊ីនបន្សុទ្ធទឹកនេះ បានផលិតទឹកបរិសុទ្ធដែលមានគុណភាពខ្ពស់បញ្ជូនទៅទូក្បាលរ៉ូប៊ីណេស្វ័យប្រវត្តិ ដែលបានបំពាក់នូវធុងស្តុកសម្ពាធទឹក Reverse Osmosis ចំណុះ ៤១លីត្រ ប្រព័ន្ធ សម្លាប់មេរោគ Ultra Violet (UV) និងក្បាលរ៉ូប៊ីណេស្វ័យប្រវត្តិប្រើប្រាស់បច្ចេកវិទ្យា Infrared Red Sensor​ ចំនួន១៥។

​​បន្ទាប់ពីការប្រគល់ទទួលប្រព័ន្ធបន្សុទ្ធទឹកបរិសុទ្ធនេះរួចរាល់ មន្ទីរពេទ្យគន្ធបុប្ផា នឹងបន្តទទួលខុសត្រូវលើការថែទាំប្រព័ន្ធនេះ ជាប្រចាំស្របតាមបទដ្ឋានណែនាំ ដើម្បីធានាដល់ដំណើរការល្អ និង ប្រើប្រាស់បានយូរអង្វែង​៕