(ភ្នំពេញ)៖ ទំនាក់ទំនងកម្ពុជា-ចិន កើតមានមកជាង១៣សតវត្សរួចមកហើយ និងមានទំនាក់ទំនងការទូតជាផ្លូវការនៅថ្ងៃទី ១៩ ខែកក្កដា ឆ្នាំ១៩៥៨ ដែលនឹងមានអាយុកាល ៦៧ ឆ្នាំហើយបើគិតត្រឹមពេលនេះ។ ទំនាក់ទំនងកម្ពុជាចិននេះ បានបន្តវឌ្ឍន ភាពរហូតមកដល់ពេលបច្ចុប្បន្ន តាមរយៈការផ្លាស់ប្តូរគ្រប់កម្រិត និង ជាប្រចាំ រួមទាំងវិស័យសេដ្ឋកិច្ច សង្គម វប្បធម៌ និង ប្រជាជន។ ប្រទេសទាំងពីរបានធ្វើកិច្ចសហប្រតិបត្តិការនយោបាយនិងយោធា។

នៅឆ្នាំ២០០៦ប្រទេសយើងទាំងពីរ បានបង្កើតមានកិច្ចសហប្រតិបត្តិការដៃគូគ្រប់ជ្រុងជ្រោយ និង ឈានការបង្កើតឱ្យទៅជា កិច្ចសហប្រតិបត្តិការដៃគូយុទ្ធសាស្រ្តគ្រប់ជ្រុងជ្រោយនៅឆ្នាំ២០១០។ លើសពីនេះទៀត ប្រទេសយើងទាំងពីរក៏បានចុះហត្ថលេខា លើផែការសកម្មភាព ២០១៩-២០២៣ ស្តីពីការកសាងសហគមន៍ជោគវាសនារួមកម្ពុជា-ចិន ដោយធ្វើកិច្ចសហការលើវិស័យចំនួន ៥ គឺនយោបាយ សន្តិសុខ សេដ្ឋកិច្ច ទំនាក់ទំនងប្រជាជននិងប្រជាជន និង កិច្ចសហប្រតិបត្តិការពហុភាគីនិយម ។ ជាមួយគ្នានេះដែរ កម្ពុជាក៏ចូលរួមយ៉ាងពេញទំហឹងជាមួយនឹងគំនិតផ្តួចផ្តើមខ្សែក្រវាត់និងផ្លូវ ដើម្បីបង្កើតឱកាស ក្នុងការអភិវឌ្ឍសេដ្ឋកិច្ច។

ក្នុងឆ្នាំ២០២៥នេះ ទំនាក់ទំនងកម្ពុជា-ចិនកាន់តែមានភាពរឹងមាំបន្ថែមទៀត បន្ទាប់ពីមានដំណើរទស្សនកិច្ចផ្លូវរដ្ឋរបស់ លោកប្រធានាធិបតី ស៊ី ជិនភីង មកកាន់ប្រទេសកម្ពុជា កាលពីថ្ងៃទី ១៧ ខែមេសា ឆ្នាំ២០២៥ កន្លងទៅនេះ។ ដំណើរទស្សនកិច្ចដ៏មានអត្ថន័យនេះ បានធ្វើឱ្យទំនាក់ទំនងរវាងប្រទេសទាំងពីរ មានលទ្ធផលជាវិជ្ជមានយ៉ាងច្រើនសន្ធឹកសន្ធាប់ រួមមាន វិស័យសេដ្ឋកិច្ច សង្គម និង វប្បធម៌។ ចំពោះកិច្ចសហប្រតិបត្តិការនយោបាយ ភាគីទាំងពីរបានទទួលស្គាល់ពី សារៈសំខាន់នៃការផ្លាស់ប្តូរទស្សនកិច្ចគ្រប់កម្រិត ក្នុងការថែរក្សាទំនាក់ទំនងយូរអង្វែង និងជឿទុកចិត្តគ្នាជាយុទ្ធសាស្រ្ត ជាពិសេសលើវិស័យការបរទេស និង ការពារជាតិ។

ចំពោះកិច្ចសហប្រតិបត្តិការលើវិស័យការពារជាតិ និង សន្តិសុខ ភាគីទាំងពីរបានឯកភាពពង្រឹងយន្តការកិច្ចសហប្រតិបត្តិការ រវាងកម្លាំងប្រដាប់អាវុធ នៃប្រទេសទាំងពីរ រក្សាការផ្លាស់ប្តូរទស្សនកិច្ចជាញឹកញាប់គ្រប់កម្រិត និង បង្កើនសកម្មភាពកិច្ចសហប្រតិបត្តិការ រួមទាំងការហ្វឹកហ្វឺន និង សមយុទ្ធរួម ដូចជាការសង្គ្រោះបន្ទាន់ និង ការជួយសង្គ្រោះមហន្តរាយ និង ការកែលម្អផ្នែកសេវាវេជ្ជសាស្រ្តនិងភស្តុភារកម្ម។

ចំពោះសន្តិសុខមនុស្សជាតិ ភាគីទាំងពីរបានទទួលស្គាល់ការគំរាមកំហែងជាសកល ដែលបង្កឡើងដោយការប្រែប្រួលអាកាសធាតុ ពង្រឹងការការពារបរិស្ថាន ជំរុញកិច្ចសហការថាមពលស្អាត រួមមានវារីអគ្គិសនី ថាមពលព្រះអាទិត្យ និង ថាមពលខ្យល់។
ចំពោះកិច្ចសហប្រតិបត្តិការអភិវឌ្ឍន៍ពាណិជ្ជកម្ម និង វិនិយោគ ភាគីទាំងពីរបានឯកភាពគ្នា កសាងច្រវាក់ផ្គត់ផ្គង់ និង ឧស្សាហកម្មប្រកបដោយសុវត្ថិភាព និង ស្ថិរភាព។ លើសពីនេះទៀត ភាគីទាំងពីរក៏បានយកចិត្តទុកដាក់លើការអភិវឌ្ឍ តំបន់កិច្ចសហប្រតិបត្តិការសេដ្ឋកិច្ច និង ពាណិជ្ជកម្មស្តង់ដារខ្ពស់ ក៏ដូចជាការលើកកម្ពស់ការកសាង ហេដ្ឋារចនាសម្ព័ន្ធគាំទ្រសំខាន់ៗ រួមមានប្រព័ន្ធដឹកជញ្ជូនបណ្តាញថាមពល ខ្សែកាបអុបទិក ឃ្លាំងស្តុកទំនិញ និង ភស្តុភារកម្ម។

ចំពោះកិច្ចសហប្រតិបត្តិការអន្តរជាតិ ភាគីទាំងពីរក៏បានផ្លាស់ប្តូរទស្សនៈលើបញ្ហាតំបន់និងសកល ដែលជាការចាប់អារម្មណ៍ និងកង្វល់រួម ហើយខិតខំពង្រឹងកិច្ចសហប្រតិបត្តិការ ក្រោមក្របខ័ណ្ឌពហុភាគី និង ដើម្បីរួមគ្នារួមចំណែកដល់សន្តិភាព ស្ថិរភាព និង វិបុលភាពពិភពលោក ជាពិសេសការគាំទ្រដល់គំនិតផ្តួចផ្តើមអភិវឌ្ឍន៍សាកល គំនិតផ្តួចផ្តើមសន្តិសុខសាកល និង គំនិតផ្តួចផ្តើមអរិយធម៌សកល ព្រមទាំងការកសាងសហគមន៍ជោគវាសនារួមនៃសន្តិភាព និង វិបុលភាព ក្នុងបណ្តាប្រទេសអាស៊ាន-ចិន និង ក្នុងបណ្តាប្រទេសមេគង្គ-ឡានឆាង។

ចំពោះការផ្លាស់ប្តូរប្រជាជននិងប្រជាជន និង វប្បធម៌ ភាគីចិនបានសន្យាផ្តល់អាហារូបករណ៍ និង ពង្រឹកកិច្ចសហប្រតិបត្តិការ ដើម្បីបង្កើតការងារ និង លើកកម្ពស់សហគ្រិនភាព។ ភាគីទាំងពីរក៏បានយកឆ្នាំ២០២៥ ជាឆ្នាំនៃការផ្លាស់ប្តូររវាងប្រជាជន និង ប្រជាជន អភិវឌ្ឍវិថីទេសចរណ៍ លើកកម្ពស់ការផ្សព្វផ្សាយគោលដៅទេសចរណ៍ និង ពង្រឹងកិច្ចសហប្រតិបត្តិការ ផ្នែកសុវត្ថិភាពទេសចរណ៍។

ប្រទេសចិនជំរុញយ៉ាងសកម្មនូវកិច្ចសហប្រតិបត្តិការអន្តរជាតិ ហើយគំនិតផ្តួចផ្តើមអភិវឌ្ឍន៍ជាសាកលរបស់ចិនយកចិត្តទុកដាក់ ចំពោះតម្រូវការអភិវឌ្ឍន៍នៃបណ្តាប្រទេសសកលខាងត្បូង ដោយផ្តោតលើការលើកកម្ពស់កិច្ចសហប្រតិបត្តិការលើ វិស័យសំខាន់ៗដូចជា ការកាត់បន្ថយភាពក្រីក្រ សន្តិសុខស្បៀង ការអភិវឌ្ឍន៍បៃតង និងសេដ្ឋកិច្ចឌីជីថល ដែលសមស្របនឹង គោលដៅអភិវឌ្ឍន៍ជាតិរបស់កម្ពុជា។ កម្ពុជានិងចិនគួរតែពង្រឹងកិច្ចសហប្រតិបត្តិការឱ្យកាន់តែស៊ីជម្រៅ តភ្ជាប់យុទ្ធសាស្ត្រអភិវឌ្ឍន៍ របស់កម្ពុជាជាមួយគំនិតផ្តួចផ្តើមរបស់ប្រទេសចិន និងបន្តពង្រីកកិច្ចសហប្រតិបត្តិការ ដើម្បីបញ្ចូលកម្លាំងចលករថ្មីទៅក្នុង ការអភិវឌ្ឍន៍នៃប្រទេសទាំងពីរ។

កម្ពុជាគាំទ្រគំនិតផ្តួចផ្តើមខ្សែក្រវាត់ និងផ្លូវ ដោយចាត់ទុកថា វាជាយន្តការដ៏សំខាន់មួយ ក្នុងការជំរុញការសាងសង់ហេដ្ឋារចនាសម្ព័ន្ធ ការអភិវឌ្ឍន៍ពាណិជ្ជកម្ម និងការតភ្ជាប់នៅក្នុងសកលលោកខាងត្បូង។ ចំពោះកិច្ចសន្ទនាសន្តិសុខនិងសន្តិភាពក្នុងតំបន់ កម្ពុជានិងចិននឹងប្រើប្រាស់យន្តការផ្សេងៗ ដើម្បីពង្រឹងកិច្ចសហប្រតិបត្តិការ រួមគ្នាជំរុញការដោះស្រាយជម្លោះដោយសន្តិវិធី និង រួមចំណែកដល់ស្ថិរភាព និងវិបុលភាពយូរអង្វែងក្នុងតំបន់។

ជឿជាក់ថា ជាមួយនឹងការខិតខំប្រឹងប្រែងរួមគ្នារបស់ភាគីទាំងពីរ ការកសាងសហគមន៍រួមវាសនារវាងកម្ពុជា និងចិន ប្រាកដជានឹងទទួលបានសមិទ្ធផលកាន់តែច្រើន ដែលមិនត្រឹមតែផ្តល់ផលប្រយោជន៍ដល់ប្រជាជននៃប្រទេសទាំងពីរប៉ុណ្ណោះទេ ប៉ុន្តែថែមទាំងរួមចំណែកដល់សន្តិភាព និងការអភិវឌ្ឍនៃពិភពលោក។

កិច្ចសហប្រតិបត្តិការកម្ពុជា-ចិន ក្នុងមួយរយៈពេលចុងក្រោយនេះ កាន់តែមានភាពរឹងមាំ និង មានលក្ខណៈជាយុទ្ធសាស្រ្ត ដែលធ្វើឱ្យប្រទេសទាំងពីរអាចអនុវត្តបាននូវគំនិតផ្តួចផ្តើមជាសាកលទាំងបី និងឈានដល់ការការសាងសហគមន៍ជោគវាសនារួម ប្រកបដោយប្រសិទ្ធភាពនិងស័ក្តិសិទ្ធភាព៕