(ភ្នំពេញ)៖ នៅរសៀលថ្ងៃសុក្រ ទី១៨ ខែកក្កដា ឆ្នាំ២០២៥នេះ លោកអ្នកឧកញ៉ា ទ្រី ភាព ទីប្រឹក្សា និងជាបេសកជនពិសេសសម្ដេចតេជោ ហ៊ុន សែន ប្រធានព្រឹទ្ធសភា បានអនុញ្ញាតឱ្យនិស្សិតទទួលបានអាហារូបករណ៍សិក្សានៅប្រទេសហុងគ្រី ចូលជួបសម្តែងការគួរសម និងសំណេះសំណាល។

និស្សិតរបស់កម្ពុជាចំនួន១៦រូប ទទួលបានអាហារូបករណ៍ពីរដ្ឋាភិបាលប្រទេសហុងគ្រី សិក្សាថ្នាក់បរិញ្ញាបត្រ បរិញ្ញាបត្រជាន់ខ្ពស់ និងថ្នាក់បណ្ឌិត ហើយគ្រោងចេញទៅ​សិក្សា​ក្នុងពេលឆាប់ៗខាងមុខនេះ។

ក្នុងជំនួបសំណេះសំណាលនេះ លោកអ្នកឧកញ៉ា ទ្រី ភាព បានសម្តែងការអបអរ​សា​ទរជាមួយនិស្សិតទាំង១៦រូប និងបានកោតសរសើរពីសមត្ថភាពរបស់ពួកគេ ក្នុងការ​ប្រកួតប្រជែងយកអាហារូបករណ៍នេះ ព្រោះអាហារូបករណ៍មានចំនួនកំណត់ ហើយបេក្ខជន ដែលបានដណ្តើមយកនោះមានចំនួនច្រើន។

លោកអ្នកឧកញ៉ា បានលើកឡើងថា ការផ្តល់អាហារូបករណ៍ពីសំណាក់រដ្ឋាភិបាល​ប្រទេស​ហុងគ្រី គឺផ្តើមចេញពីទំនាក់ទំនងល្អរវាងរាជរដ្ឋាភិបាលកម្ពុជា និងរដ្ឋាភិបាល​ហុងគ្រី។ លោកអ្នកឧកញ៉ា បានគូសបញ្ជាក់ថា ការអប់រំជាកិច្ចការអាទិភាពរបស់រាជ​រដ្ឋាភិបាលចាប់តាំងពីពេលដឹកនាំដោយសម្តេចតេជោ ហ៊ុន សែន បន្តរហូតដល់​សម្តេច​មហាបវរធិបតី ហ៊ុន ម៉ាណែត។ ដោយមើលឃើញពីគុណតម្លៃនៃការអប់រំនេះ​ហើយ ទើបរាជរដ្ឋាភិបាលយកចិត្តទុកដាក់ពង្រឹងការអប់រំក្នុងប្រទេស ហើយក៏ពង្រីក​កិច្ចសហប្រតិបត្តិការជាមួយប្រទេសនានា ដើម្បីទទួលបានអាហារូបករណ៍ឱ្យនិស្សិត​កម្ពុជា ឱ្យពួកគេទទួលបានការអប់រំកាន់តែប្រសើរនៅក្រៅប្រទេស។

ក្នុងឱកាសនោះ លោកអ្នកឧកញ៉ា បានផ្ដាំផ្ញើដល់និស្សិតក្ដាប់យកឱកាសដ៏វិសេស​វិសាល​នេះ ប្រឹងប្រែងក្រេបជញ្ជក់យកចំណេះដឹងតាមជំនាញរៀងៗខ្លួន ហើយនៅ​ពេល​បញ្ចប់​ការសិក្សា ត្រូវយកចំណេះដឹងមកចូលរួមអភិវឌ្ឍប្រទេសជាតិ ក៏ដូចជាតប​ស្នងសងគុណដល់ឪពុកម្ដាយ។

ក្រុមនិស្សិតទទួលបានអាហារូបករណ៍ទៅសិក្សានៅហុងគ្រី បានថ្លែងអំណរគុណ​ដល់​រាជរដ្ឋាភិបាល ដែលបានសាងទំនាក់ទំនងជាមួយរដ្ឋាភិបាលហុងគ្រី ឱ្យពួក​គេមាន​ឱកាស​ទទួលបានអាហារូបករណ៍។ ក្រុមនិស្សិត ក៏បានថ្លែងអំណរគុណលោកអ្នក​ឧកញ៉ា ទ្រី ភាព ដែលបានឆ្លៀតពេលវេលាមានតម្លៃឱ្យពួកគេបានចូលជួបទទួលបាន​ដំបូន្មាន​ល្អៗបន្ថែមទៀត ជាទុនសម្រាប់ការសិក្សារៀនសូត្រ និងសម្រាប់ជីវិត។

សូមបញ្ជាក់ថា នៅក្នុងឱកាសនោះ លោកអ្នកឧកញ៉ា ទ្រី ភាព បានឧបត្ថម្ភ​ថវិកា​មួយ​ចំនួនដល់និសិត្សទាំង១៦រូប ជាការលើកទឹកចិត្តសម្រាប់កិច្ចប្រឹងប្រែងរបស់ពួកគេ​ក្នុងការសិក្សារៀនសូត្រ៕