(ភ្នំពេញ)៖ លោក ខៀវ កាញារីទ្ធ អតីតរដ្ឋមន្ត្រីក្រសួងព័ត៌មាន និងជាសមាជិករដ្ឋសភា​កម្ពុជានាពេលបច្ចុប្បន្ន បានបង្ហាញការងឿងឆ្ងល់រឿងថៃចោទកម្ពុជាលួចដាក់មីនលើដី​តាមព្រំដែនកម្ពុជា-ថៃ។ ចម្ងល់នោះ គឺថៃមានទាំងដ្រូនស៊ើបការណ៍ និងកម្លាំងឱ្យខ្នាប់​ដី ហេតុអ្វីចោទខ្មែរលបដាក់មីន ហើយថៃមិនដឹង?

កាលពីថ្ងៃពុធ ទី១៦ ខែកក្កដា ឆ្នាំ២០២៥កន្លងទៅនេះ ទាហានថៃ ៣នាក់ បានរងរបួស​ដោយ​សារជាន់មីន អំឡុងពេលដើរល្បាតលើដីតាមបណ្តោយព្រំដែន។ ហេតុការណ៍​ផ្ទុះមីននេះ បណ្តាលឱ្យទាហានថៃម្នាក់ ដាច់ជើងម្ខាង រីឯ ២នាក់ទៀត បានរងរបួស។

បន្ទាប់ពីហេតុការណ៍នេះ ក្រុមយោធាថៃ ព្យាយាមចោទមកកម្ពុជាថា មីនដែល​ទាហាន​​របស់គេដើរជាន់នោះជាមីនដាក់ថ្មីៗដោយទាហានកម្ពុជា។

តបនឹងការចោទរបស់ថៃនេះ អតីតរដ្ឋមន្ត្រីក្រសួងព័ត៌មានរបស់កម្ពុជា លោក ខៀវ កាញារីទ្ធ បានលើកឡើងថា ពីការឃ្លាំមើលព្រំដែនរបស់ទាហានថៃ រហូតពេល​កន្លង​ទៅ គ្រាន់តែទ័ពខ្មែរចេញពីលេណដ្ឋានមិនប្រយ័ត្នក៏ត្រូវពួក sniper ថៃបាញ់សម្លាប់​បានដែរ។

បន្ថែមពីលើនោះ ថៃទើបបង្អួតពីដ្រូនគ្រប់បែប ដូចជាដ្រូនត្រួតពិនិត្យ ដ្រូនស៊ើប​ការណ៍ ដ្រូនប្រយុទ្ធ និងកម្ទេចមុខសញ្ញាសំខាន់ៗជាដើម ហើយកងកម្លាំងរបស់​ពួក​គេ​ក៏ខ្នាប់ដីផងដែរ ហេតុអីក៏ចោទខ្មែរលបទៅដាក់មីនបាន ?

លោក ខៀវ កាញារីទ្ធ បានលើកឡើងបែបចំអកទៅថាថា ការដាក់មី​ច្រើន​គ្រាប់​មាន​ន័យថា ត្រូវប្រើកម្លាំងលើសពី ២នាក់ ម៉េចក៏មិនដឹង?

លោក ខៀវ កាញារីទ្ធ បានលើកឡើងទៀថា កន្លងមកកងបះបោរនៅភូមា មានអាវុធ​ទិញ​ពីឈ្មួញថៃ ហេតុអី ក៏ថៃថា ​គ្មាន​មីន​រុស្សុី?

សូមបញ្ជាក់ថា ពាក់ព័ន្ធការចោទប្រកាន់របស់ថៃនេះ អាជ្ញាធរមីនរបស់កម្ពុជា បានច្រានចោល ហើយប្រកាសសហការក្នុងស៊ើបអង្កេត ដើម្បីរកការពិតលើរឿងនេះ៕