រដ្ឋមន្ត្រីព័ត៌មានកម្ពុជា នឹងលាតត្រដាងពីគំនិតទុច្ចរិតរបស់សារព័ត៌មានថៃ ដែលប្រើប្រាស់ព័ត៌មានក្លែងក្លាយ ដើម្បីបង្ខូចកិត្តិយសកម្ពុជា លើឆាកអន្តរជាតិចែករំលែកដល់រដ្ឋមន្ត្រីព័ត៌មាន និងអ្នកជំនាញព័ត៌មានមកពីទ្វីបអាស៉ី ឱ្យយល់ច្បាស់
21-07-2025 20:10
(ភ្នំពេញ)៖ លោក នេត្រ ភក្ត្រា រដ្ឋមន្ត្រីក្រសួងព័ត៌មាន បានបញ្ជាក់ថា កម្ពុជានឹងលាតត្រដាងពីគំនិតទុច្ចរិតរបស់សារព័ត៌មានថៃ ដែលបានប្រើប្រាស់ព័ត៌មានក្លែងក្លាយ ដើម្បីបង្ខូចកិត្តិយស មុខមាត់របស់ប្រទេសកម្ពុជា នៅលើឆាកអន្តរជាតិ មកចែករំលែកដល់រដ្ឋមន្ត្រីក្រសួងព័ត៌មាន និងអ្នកជំនាញផ្នែកមកព័ត៌មានមកពីទ្វីបអាស៉ី ឱ្យបានយល់ច្បាស់។
ការបញ្ជាក់បែបនេះរបស់រដ្ឋមន្ត្រី នេត្រ ភក្ត្រា បានធ្វើឡើងនៅរសៀលថ្ងៃទី២១ ខែកក្កដា ឆ្នាំ២០២៥នេះ បន្ទាប់ពីលោកបានបញ្ចប់ពិធីបើកសិក្ខាសាលាស្តីពីការពង្រឹងសមត្ថភាពឌីជីថល របស់យុជន និងក្មេងស្រី ក្នុងវិស័យ ITC Cambodia ឆ្នាំ២០២៥ ជូនដល់យុវជន និងបណ្តាមន្ត្រីជំនាញផ្នែកព័ត៌មាន មកពីបណ្តាប្រទេសចំនួន២៦ នៅលើទឹកដីសៀមរាប-អង្គរ ដែលប្រទេសកម្ពុជាធ្វើជាម្ចាស់ផ្ទះរៀបចំសន្និសីទកំពូលប្រព័ន្ធផ្សព្វផ្សាយអាស៊ីលើកទី២០ (20th Asia Media Summit -AMS) នៅលើទឹកដីអង្គរ ខេត្តសៀមរាប ក្រោមប្រធានបទ «អបអរសាទរពីរទសវត្សរ៍នៃឧត្តមភាព និងលើសពីនេះ»។
ត្រង់ចំណុចនេះ រដ្ឋមន្ត្រីក្រសួងព័ត៌មាន បានបន្ថែមថា កម្ពុជាត្រូវឆ្លើយតបតាមរយៈការផ្ដល់ព័ត៌មានពិត អ្វីដែលជាមូលដ្ឋានគ្រឹះឱ្យប្រជាពលរដ្ឋបានយល់ដឹង ពិភពលោកបានឃើញថា តើអ្វីដែលភាគីម្ខាងទៀតកំពុងតែធ្វើ តើវាយ៉ាងមេច។
លោករដ្ឋមន្ត្រី ភក្ដ្រា បានគូសបញ្ជាក់ថា៖ «បច្ចុប្បន្ននេះ យើងឃើញស្រាប់ហើយភាគីម្ខាងទៀត ដែលមានបញ្ហាជាមួយយើងហ្នឹង គឺតែងតែប្រើប្រាស់ព័ត៌មានក្លែងក្លាយ ផ្សព្វផ្សាយតាមបណ្តាញព័ត៌មានរបស់ខ្លួន បំភ្លៃ បំផ្លើស បំប៉ោងការពិត ក្នុងគោលគំនិតច្បាស់លាស់ ដើម្បីបំភ្លៃឱ្យពិភពលោកមានការយល់ច្រឡំពីប្រទេសកម្ពុជា។ យើងត្រូវការចាំក្នុងការឆ្លើយតប តាមរយៈការផ្តល់នូវព័ត៌មានពិត ឱ្យពិភពលោកបានឃើញថាតើអ្វីភាគីម្ខាងទៀត គេកំពុងតែធ្វើតើយ៉ាងម៉េច អ៊ឹចឹងបញ្ហានេះខ្ញុំនឹងត្រូវលើកយកមកចែករំលែកជាមួយបណ្តាប្រទេសផ្សេងៗទៀត ពីការសង្កេតប្រើប្រាស់ព័ត៌មានក្លែងក្លាយ ដើម្បីបំផ្លាញមុខមាត់ ចោទប្រកាន់ដោយគ្មានមូលដ្ឋាន ប៉ុន្ដែយើងបានប្រើប្រាស់មធ្យោបាយ និងព័ត៌មានរបស់យើងឆ្លើយតបទៅវិញ»។
លោករដ្ឋមន្ត្រី នេត្រ ភក្ត្រា បានបញ្ជាក់អំពីការលើកយកចិត្ដប្រធានបទនេះក្នុងកិច្ចប្រជុំកំពូលថា អ្វីដែលពិភពលោកបាននិងកំពុងតែឃើញថា តើនរណាដែលកំពុងតែប្រើប្រាស់ព័ត៌មានក្លែងក្លាយដើម្បីកេងចំណេញ ឬប្រើប្រាស់ជាគោលបំណងនយោបាយ។
លោករដ្ឋមន្រ្តី នេត្រ ភក្រ្តា បានបន្តថា អ្វីដែលយើងរំពឹងទុកបណ្តាប្រទេស ក្នុងតំបន់អាស៊ាន និងពិសេសក្នុងតំបន់អាស៊ីតែម្តងកាន់តែរួបរួមគ្នា ថែមទៀតក្នុងកិច្ច សហប្រតិបត្តិការក្នុងវិស័យព័ត៌មាន និងសោតទស្សន៍ក្នុងតំបន់។ ត្រូវតែមានការចែករំលែករបស់ប្រទេសនីមួយៗក្នុងតំបន់ និងចែករំលែកដល់ប្រទេសផ្សេងៗ ទៀតបាន យកទៅអនុវត្ត ឬទាញយកទៅជាបទពិសោធន៍សម្រាប់ការអនុវត្តក្នុង កិច្ចការងាររបស់ខ្លួន។
បន្ថែមពីនេះ លោករដ្ឋមន្ត្រីក្រសួងព័ត៌មាន បានបន្តថា ដោយឡែកចំពោះការទូតព័ត៌មាន ដែលក្រសួងព័ត៌មានកម្ពុជាបង្កើតឡើង គឺដើម្បីឱ្យបណ្តាប្រទេសនីមួយៗមានការយកចិត្តទុកដាក់ ហើយរួបរួមគ្នាក្នុងការរៀបចំនូវគោលនយោបាយ គំនិតផ្តួចផ្តើមគម្រោង និងការអនុវត្តផ្សេងៗដែលបម្រើឱ្យតំបន់ បម្រើឱ្យទ្វីបក្នុងអាស៊ី តែម្តងដែលធ្វើឱ្យបណ្តាប្រទេសនីមួយៗកាន់តែជិតស្និទ្ធឈានទៅដល់ការដោះស្រាយរួមគ្នា។
លោករដ្ឋមន្ត្រី នេត្រ ភក្ដ្រា បានបន្ថែមថា បណ្ដាប្រទេសទាំងអស់ ដែលមានចំនួន២៦ប្រទេស នឹងឯកភាពគ្នាលើយន្ដការរួមទៅលើការប្រយុទ្ធប្រឆាំងព័ត៌មានក្លែងក្លាយ តាមរយៈសេចក្ដីថ្លែងការណ៍ប្រឆាំងព័ត៌មានក្លែងក្លាយ២.០ ដែលផ្ដោតលើការវិវត្ដន៍ថ្មីៗក្នុងសង្គម ជាពិសេសបញ្ញាសិប្បនិម្មិត (AI) និងបម្រើផលប្រយោជន៍ ក៏ដូចជារបៀបវីរៈនយោបាយ។ បញ្ហាទាំងនេះត្រូវតែលុបបំបាត់ និងផ្ដល់ព័ត៌មានពិតជូនប្រជាពលរដ្ឋជឿទុកចិត្ដ ច្បាស់លាស់ដែលមិនឱ្យប្រជាពលរដ្ឋយល់ច្រលំ ឬដាក់ការសង្ស័យលើព័ត៌មានដែលបានចេញផ្សាយ៕
