(កំពង់ឆ្នាំង)៖ នៅ​វេលា​ព្រឹកថ្ងៃទី២២ ខែកក្កដា ឆ្នាំ២០២៥ វេទិកាសម្ព័ន្ធសង្គមស៊ីវិល (វ.ស.ស.) នៃទីស្តីការគណៈរដ្ឋមន្រ្តី បានរៀបចំវេទិកាសន្ទនា ស្ដីពី “​កិច្ចសហប្រតិបត្ដិការ​ក្នុងភាពជាដៃ​គូ ដើម្បីពង្រឹង​សមត្ថភាព​​អង្គការ​សង្គមស៊ីវិល​ក្នុងបរិបទ​ថ្មី​” ជាមួយ​បណ្ដា​អង្គការសង្គមស៊ីវិលដែលមានប្រតិបត្តិការក្នុងខេត្តកំពង់ឆ្នាំង ក្នុង​គោលបំណង​ជំរុញការចូលរួម​របស់អង្គការ​សង្គម​ស៊ីវិលដែលជាតួអង្គមិនអាចខ្វះបាន រួមចំណែកជាមួយរាជរដ្ឋាភិបាល​ជំរុញការអភិវឌ្ឍសេដ្ឋកិច្ច និង​សង្គម។

វេទិការសន្ទនា​នេះ បានប្រព្រឹត្ដឡើង​ក្រោមអធិបតីភាពលោក​ កឹមរ័ត្ន វិសិដ្ឋ នាយករងខុទ្ទកាល័យសម្តេ​ច​មហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា និងជាប្រធានក្រុមប្រឹក្សាភិបាល វ.ស.ស. និងលោក ជា សុខរិទ្ធិ អភិបាលរងខេត្តនៃ​គណៈអភិបាលខេត្ត​​កំពង់ឆ្នាំងតំណាងឯកឧត្តម ស៊ុន សុវណ្ណារិទ្ធ អភិបាលនៃគណៈអភិបាលខេត្តកំពង់ឆ្នាំង ដោយ​មាន​ការចូលរួម​ពី​តំណាង​អង្គការ សមាគម សហជីព និងសហគមន៍ក្នុងខេត្តកំពង់ឆ្នាំង និងអាជ្ញាធរមូលដ្ឋានសរុបជិត ៣០០នាក់។

ថ្លែង​ក្នុង​ឱកាសនោះ​ លោក​ប្រធានក្រុមប្រឹក្សាភិបាល បានមានប្រសាសន៍បញ្ជាក់ជាថ្មីថា រាជរដ្ឋាភិបាល​គ្រប់នីតិកាលនៃរដ្ឋសភា តែងតែយកចិត្តទុកដាក់ខ្ពស់ចំពោះអង្គការសង្គមស៊ីវិលដែលជាតួអង្គមិនអាចខ្វះបា​ន​ ព្រមទាំងបានចូលរួមចំណែកយ៉ាងសកម្មជាមួយរាជរដ្ឋាភិបាលក្នុងការលើកជំរុញការអភិវឌ្ឍសេដ្ឋ​​កិច្ច សង្គមឱ្យ​មានការរីកចម្រើនជាលំដាប់។ ក្នុងកាលៈទេសៈបច្ចុប្បន្នដែលកម្ពុជា និងពិភពលោកកំពុងជួបប្រទះនឹងការប្រែ​ប្រួលថ្មី វិបត្តិសេដ្ឋកិច្ចសកល ក៏ដូចជា ការប្រកួតប្រជែងផ្នែក​ភូមិសាស្រ្តនយោបាយ សេដ្ឋកិច្ច​ រួមទាំងការឈ្លានពានពីប្រទេសជិតខាង អង្គការសង្គមស៊ីវិលត្រូវតែពង្រឹងស្មារតីសាមគ្គីជាតិ និងរួមគ្នាលើកកម្ពស់ជាតិនិយម ព្រមទាំងបន្តរួបរួមជាមួយរាជរដ្ឋាភិបាលក្នុងការអភិវឌ្ឍសង្គមជាតិ ជាពិសេស ត្រូវបន្តពង្រឹ​ង​សមត្ថភា​ព​របស់ខ្លួន ដើម្បីអាចមានលទ្ធភាពបន្តសកម្មភាពក្នុងការអភិវឌ្ឍមូលដ្ឋានលើវិស័យសំខាន់ៗ ដូចជា វិស័យអប់រំ សុខាភិបាល និងការអភិវឌ្ឍជនបទជាដើម។ ​លោកប្រធាន​ក្រុមប្រឹក្សាភិបាល ​បានអំពាវនាវឱ្យអង្គការសង្គមស៊ីវិលបន្តគោរពអនុវត្តច្បាប់ជាធរមាន ដើម្បីលើកកម្ពស់នីតិរដ្ឋ និងបន្តគាំទ្រគោលនយោបាយអភិវឌ្ឍន៍​របស់រាជរដ្ឋាភិបាល ក្រោមការដឹកនាំប្រកបដោយគតិបណ្ឌិតរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី​នៃព្រះរាជាណាចក្រកម្ពុជា។ ជាមួយ​គ្នា​នេះដែរ អង្គ​វេទិកាទាំងមូលបានបង្ហាញពីការគាំទ្រចំពោះកិច្ចខិតខំប្រឹ​ង​​​ប្រែង​របស់​ប្រមុខរាជរដ្ឋាភិបាល និង​ការដាក់ចេញ​នូវ​​វិធានការ​ការពារបូរណភាពទឹកដី អធិបតេយ្យភាពជាតិ ជាពិសេស​ ការ​ដោះស្រាយ​ជម្លោះ​ជាមួយប្រទេស​ថៃ​។

ក្នុងឱកាសនៃវេទិកាសន្ទនានេះ អង្គវេទិកាក៏​បានស្តាប់នូវបទបង្ហាញស្តីពី «ការរៀបចំគម្រោងសំណើនិ​ង​បទពិសោធន៍នៃការគ្រប់គ្រង» ដោយលោកស្រី ប៉ុក បញ្ញាវិចិត្រ អតីតប្រធានអង្គការកម្ពុជាដើម្បីជួយស្ត្រីមានវិបត្តិ ដែលជាការចូលរួមចំណែកក្នុងការពង្រឹងសមត្ថភាពរបស់អង្គការសង្គមស៊ីវិល ក្នុងបរិបទដែលអង្គការសង្គ​ម​ស៊ីវិលភាគច្រើនជួបប្រទះនឹងបញ្ហាហិរញ្ញវត្ថុសម្រាប់ការអនុវត្តគម្រោងរបស់ខ្លួន ដោយសារបញ្ហាវិបត្តិសេដ្ឋកិ​ច្ច​សកល ជាពិសេសការកាត់ផ្តាច់ជំនួយឥតសំណងពីម្ចាស់ជំនួយនៃប្រទេសលោកខាងលិច។ លោកស្រីបា​ន​ណែ​នាំ​ឱ្យអង្គការសង្គមស៊ីវិលអាចពិចារណារកប្រភពជំនួយថ្មីៗ ដែលអាច​ស្វែង​រកបាន​។

តំណាងអង្គការ សមាគម សហជីព និងសហគមន៍ដែលបានចូលរួមវេទិកាសន្ទនានាថ្ងៃនេះ បានពិភា​ក្សា និងពិគ្រោះយោបល់ដោយត្រង់ទៅត្រង់មកយ៉ាងផុលផុសជាមួយអាជ្ញាធរមូលដ្ឋាន ហើយបញ្ហាប្រឈ​មនិងសំណូមពរមួយចំនួន ត្រូវបានដោះស្រាយជាក់ស្តែងនៅក្នុងវេទិកាសន្ទនាដោយផ្ទាល់។ ចំពោះបញ្ហាមួយចំនួនទៀត ដែលទាមទារឱ្យមានការសិក្សាបន្ថែម និងការដោះស្រាយក្នុងកម្រិតបច្ចេកទេសជំនាញ នឹងត្រូវយកទៅពិភាក្សាជាមួយស្ថាប័ន និងសមត្ថកិច្ចជំនាញ ដើម្បីស្វែងរកដំណោះស្រាយសមស្របសម្រាប់ការចូលរួមលើកកម្ពស់ការអភិវឌ្ឍនៅថ្នាក់មូលដ្ឋាន៕