(ព្រុចស៊ែល)៖ ប្រធានក្រុមប្រឹក្សាអឺរ៉ុប លោក Charles Michel បាននិយាយថា ការឈ្លានពានរបស់រុស្ស៊ីលើអ៊ុយក្រែនក្នុងឆ្នាំ ២០២២ បានផ្តល់កម្លាំងរុញច្រានថ្មី សម្រាប់ជំហររបស់សហភាពអឺរ៉ុប ក្នុងការពង្រីកសមាជិកថ្មីបន្ថែមទៀត ដោយបង្ហាញក្តីសង្ឃឹមថាប្លុកនេះ និងសមាជិកថ្មីដែលមានសក្តានុពល នឹងត្រូវបានរៀបចំនៅឆ្នាំ ២០៣០។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន Reuters នៅថ្ងៃទី២៩ ខែមេសា ឆ្នាំ២០២៤។

ដោយឆ្លុះបញ្ចាំងពីខួបលើកទី ២០ នៃការពង្រីកសមាជិកដ៏ធំ ដែលហៅថា "Big Bang" របស់ EU ក្នុងឆ្នាំ ២០០៤ ដែលបានប្រមូលផ្តុំអតីតប្រទេសកុម្មុយនិស្តចំនួន ១០ប្រទេស រួមជាមួយនឹងប្រទេសកោះមេឌីទែរ៉ាណេ ដូចជា Malta និង Cyprus លោក Michel បានលើកឡើងពីសារៈសំខាន់ជាប្រវត្តិសាស្ត្រ នៃការបង្រួបបង្រួមបណ្តាប្រទេសអឺរ៉ុបក្នុងការប្រឈមមុខនឹងបញ្ហាភូមិសាស្ត្រនយោបាយ។

ប្រទេសបេក្ខភាពនាពេលបច្ចុប្បន្ន ដែលកំពុងស្វែងរកការចូលជាសមាជិកសហភាពអឺរ៉ុប រួមមានប្រទេសចំនួនប្រាំមួយមកពីតំបន់បាល់កង់ រួមមានប្រទេសអ៊ុយក្រែន ហ្សកហ្ស៊ី និងម៉ុលដាវ៉ា ដោយអ៊ុយក្រែនគឺជាសមាជិកដ៏មានសក្តានុពលបំផុត ដោយសារចំនួនប្រជាជនច្រើន និងវិស័យកសិកម្ម។

លោក Michel បានសង្កត់ធ្ងន់ថាសង្រ្គាមដែលចាប់ផ្តើមដោយរុស្ស៊ីប្រឆាំង នឹងអ៊ុយក្រែនបានធ្វើឱ្យមានជីវិតឡើងវិញ នូវយុទ្ធសាស្រ្តពង្រីករបស់សហភាពអឺរ៉ុប ទោះបីជាមានបញ្ហាប្រឈមដែលខ្លួនបានដាក់ក៏ដោយ។ លោកក៏បានសង្កត់ធ្ងន់លើសារៈសំខាន់អំពី ធ្វើកំណែទម្រង់ចាំបាច់ នៅឆ្នាំ ២០៣០ ដើម្បីសម្រួលដល់ដំណើរការពង្រីកសមាជិកផងដែរ៕