(ភ្នំពេញ)៖ ស្របពេលដែលបុណ្យចូលឆ្នាំថ្មីប្រពៃណី ចិនខិតជិត មកដល់សមាគមសម្ព័ន្ធខ្មែរចិន នៅកម្ពុជាបានប្រារព្ធពិធីអបអរសាទរបុណ្យចូលឆ្នាំ ថ្មីប្រពៃណីចិនរយៈពេល ៣ថ្ងៃ គឺចាប់ពី ថ្ងៃទី១៧ ដល់ថ្ងៃទី១៩ ខែមករា ឆ្នាំ២០២៥នេះ នៅទីស្នាក់ការសមាគមសម្ព័ន្ធខ្មែរចិននៅកម្ពុជា រាជធានីភ្នំពេញ។

កម្មវិធីនេះដោយមានការចូលរួមពី លោកអ្នកឧកញ៉ា ពុង ឃាវសែ ប្រធានសមាគមសម្ព័ន្ធខ្មែរចិន ឧកញ៉ា ដួង តិច អនុប្រធាន និងជាប្រធានក្រុមយុវជនសមាគមសម្ព័ន្ធខ្មែរ អ្នកឧកញ៉ាលី ឃុនថៃ ប្រធានសមាគមសហព័ន្ធអ្នកវិនិយោគកម្ពុជា និងតំណាងសមាគមសម្ព័ន្ធខ្មែរចិននៅកម្ពុជា លោក Fan Manjiang ទីប្រឹក្សាស្ថានទូតចិន ព្រមទាំងថ្នាក់ដឹកនាំ និងភ្ញៀវជាតិ និងអន្ដរជាតិជាច្រើន។

ពិធីអបអរសាទរបុណ្យចូលឆ្នាំថ្មីប្រពៃណីចិននេះ ធ្វើឡើងក្នុងគោលបំណងស្នូលគឺ «ផ្សព្វផ្សាយវប្បធម៌ កម្ពុជា-ចិន» ដើម្បី ចូលរួមចំណែកក្នុងការធ្វើឱ្យកាន់តែស៊ីជម្រៅនូវមិត្តភាព ប្រពៃណីរវាងប្រជាជន និងប្រជាជន នៃប្រទេសទាំងពីរ ជំរុញកិច្ចសហប្រតិបត្តិការ និងការផ្លាស់ប្តូរវប្បធម៌ រួមគ្នាបង្កើតទំព័រថ្មីនៃទំនាក់ទំនងមិត្តភាពកម្ពុជា-ចិន។

ក្នុងឱកាសនោះដែរ លោកអ្នកឧកញ៉ា ពុង ឃាវសែ ប្រធានសមាគមសម្ព័ន្ធខ្មែរចិន នៅកម្ពុជា បានមានប្រសាសន៍ថា បុណ្យចូលឆ្នាំចិន គឺជាប្រពៃណីរបស់ជនជាតិចិន ដែលតំណាងឲ្យការជួបជុំគ្រួសារ មិត្តភក្តិ ភាពរីករាយ និងក្តីសង្ឃឹមថ្មី។

លោកអ្នកឧកញ៉ា បានបន្តថា កាលពីចុងឆ្នាំ២០២៤ ពិធីបុណ្យចូលឆ្នាំចិន ត្រូវបានអង្គការ យូនីស្កូ ដាក់បញ្ចូលជាវប្បធម៌អរូបិយ៍ ដែលនេះបញ្ជាក់ថា ពិភពលោកទាំងមូលគោរព និងទទួលស្គាល់វប្បធម៌ជនជាតិចិន ហើយការដាក់ចូលវប្បធម៌អរូបិយ៍ គឺជាការបន្ត និងការអភិរក្សវប្បធម៌ប្រពៃណីបុរាណចិន។ នេះគឺជាមោទនភាពរបស់ជនជាតិចិន និងប្រជាជនចិន ដែលជាប់ស្រឡាយចិន ដូច្នេះហើយបានជាសមាគមចាំបាច់ប្រារព្ធកម្មវិធីនេះឡើង ដើម្បីអបអរសាទរ ហើយក៏បង្កើតនូវបរិយាកាស និងដើម្បីឲ្យប្រជាពលរដ្ឋកម្ពុជាចូលរួមជាសហគមន៍ចិនដើម្បីអបអរសាទរពិធីបុណ្យចូលឆ្នាំចិនយ៉ាងរីករាយទាំងអស់គ្នា។

លោកអ្នកឧកញ៉ា ពុង ឃាវសែ បានលើកឡើងបន្ថែមថា នៅឆ្នាំ២០២៥នេះ សមាគមសម្ព័ន្ធខ្មែរចិន នៅកម្ពុជា នឹងពង្រឹងសេវាកម្មរបស់ខ្លួន ដើម្បីបម្រើប្រជាជនចិនដែលរស់នៅកម្ពុជា និងប្រជាជនដែលជាប់ខ្សែស្រឡាយចិន នឹងរួមចំណែកក្នុងការជំរុញការអភិវឌ្ឍន៍សង្គមនិងសេដ្ឋកិច្ចនៅកម្ពុជា ជាពិសេសជំរុញទំនាក់ទំនងមិត្តភាព កម្ពុជា-ចិន ឱ្យកាន់តែល្អប្រសើរនាពេលអនាគត។

ជមួយគ្នានេះ ឧកញ៉ា ដួង តិច អនុប្រធាន និងជាប្រធានក្រុមយុវជនសមាគមសម្ព័ន្ធខ្មែរចិននៅកម្ពុជា បានលើកឡើងថា ក្រុមយុវជនសមាគមសម្ព័ន្ធខ្មែរចិននៅកម្ពុជាគឺដើម្បីប្រមូលផ្តុំធនធានខ្សែស្រឡាយចិននៅកម្ពុជា ផ្តល់ការលេងយ៉ាងពេញទំហឹង ដើម្បីផលប្រយោជន៍រួមគ្នាំ ចូលរួមចំណែកដល់ការអភិវឌ្ឍន៍សេដ្ឋកិច្ចកម្ពុជា និងការអភិវឌ្ឍមិត្តភាពកម្ពុជា-ចិន ដោយ អនុវត្តការងារសុខុមាលភាពសាធារណៈ និងសកម្មភាពសប្បុរសធម៌ និងចូលរួមក្នុងសកម្មភាពផ្លាស់ប្តូរអាជីវកម្មផ្សេងៗ។

លោកបានគូសបញ្ជាក់ថា រយៈពេលបីថ្ងៃ គឺចាប់ពីថ្ងៃទី ១៧ ដល់ថ្ងៃទី១៩ ខែមករា មានស្តង់សរុបចំនួន៦០ ដែលដាក់តាំងបង្ហាញផលិតផល និងសេវាកម្មរបស់ក្រុមហ៊ុន។ កម្មវិធីមានអាហារក្នុងស្រុក ក៏ដូចជាផលិតផលពិសេសពីប្រទេសចិន និងប្រទេសផ្សេងៗទៀត។

រីឯលោក Fan Manjiang ទីប្រឹក្សាស្ថានទូតចិនលើកឡើងថា ការបន្តរីកចម្រើននៃទំនាក់ទំនងមិត្តភាពចិន-កម្ពុជាដល់កម្រិតថ្មី គឺមានការរួមចំណែកជាវិជ្ជមានរបស់ប្រជាជនដែលមានខ្សែស្រឡាយចិនផងដែរ។ ជនជាតិមានខ្សែស្រឡាយចិននៅក្រៅប្រទេសបានចូលរួមក្នុងការកសាងមាតុភូមិ។ សមាគមសម្ព័ន្ធខ្មែរចិននៅកម្ពុជាបានប្តេជ្ញាក្នុងការអភិវឌ្ឍន៍ការអប់រំភាសាចិន ការបន្តវប្បធម៌ចិន និងការជំរុញការអភិវឌ្ឍន៍ជាបន្តបន្ទាប់នៃសាលាភាសាចិននៅកម្ពុជាផ្សេងៗ។

លោកបានបន្ដថា ស្ថានទូតចិនប្រចាំកម្ពុជានឹងបន្តយកចិត្តទុកដាក់ និងគាំទ្រដល់ការអភិវឌ្ឍន៍ជនជាតិមានខ្សែស្រឡាយចិននៅក្រៅប្រទេស ការពារសិទ្ធិ និងផលប្រយោជន៍ស្របច្បាប់ដល់ពួកគេ និងកសាងវេទិកាបន្ថែមទៀតសម្រាប់កិច្ចសហប្រតិបត្តិការ និងការផ្លាស់ប្តូរ។

សូមជម្រាបដែរថា កម្មវិធីអបអរសាទរបុណ្យចូលឆ្នាំថ្មី ប្រពៃណីចិននេះ នឹងបើកឱ្យសាធារណជនទីជិតទីឆ្ងាយ ចូលរួមដោយសេរី និងឥតគិតថ្លៃ ដើម្បីផ្តល់ឱកាសជូន បងប្អូនប្រជាពលរដ្ឋកម្ពុជា ចូលរួមអបអរសាទរបុណ្យចូលឆ្នាំថ្មី ប្រពៃណីចិននេះឱ្យបានច្រើនកុះករ និងស្វែងយល់ អំពីទំនាក់ទំនងមិត្តភាព ដ៏ស្អិតល្មួតរវាងកម្ពុជា និងចិន ក៏ដូចជាសិក្សាស្វែងយល់អំពីវប្បធម៌ប្រពៃណីរបស់ចិន ដើម្បីចូលរួមចំណែកជំរុញមិត្តភាពកម្ពុជា-ចិន ឱ្យកាន់តែល្អប្រសើរនាពេលអនាគត៕