(ឥណ្ឌូនេស៊ី)៖ អ្នកនាំពាក្យរបស់រដ្ឋាភិបាលឥណ្ឌូនេស៊ី បានឲ្យដឹងថា មានមនុស្ស ៤នាក់ ដែលជិះនៅលើ​យន្តហោះ Trigana Air Service ATR 42-300 ធ្លាក់នៅខេត្ត Papua ភ្ជាប់នៅលុយសុទ្ធជិត ៥០ម៉ឺនដុល្លារអាមេរិក នេះបើយោងតាមការចុះផ្សាយរបស់ Reuters ចេញផ្សាយនៅ​រសៀលថ្ងៃនេះ។

លោក Abu Sofjan អ្នកនាំពាក្យរដ្ឋាភិបាល បានឲ្យដឹងថា មនុស្ស៤នាក់ ដែលជិះនៅលើយន្តហោះ​នោះ ជាមន្ត្រីរដ្ឋាភិបាល ដោយបាននាំយកលុយ ៤៧១.៥០០ដុល្លារអាមេរិក ដែលជាលុយកម្មវិធីជំនួយផ្លូវ​ការ​សម្រាប់ជនក្រីក្រ និងទុកបម្រុងដើម្បី ចែកជូនដល់អ្នកភូមិ។ លុយជិត ៥០ម៉ឺនដុល្លារអាមេរិកនោះ ត្រូវបានអ្នកនាំពាក្យបញ្ជាក់ថា ជាលុយសម្រាប់យកទៅសាងសង​ហេដ្ឋារចនាសម្ព័ន្ធ នៅក្នុងភូមិមួយ ស្ថិតនៅភាគខាងប្រទេស ដែលជាតំបន់សម្បូរដោយប្រជាជនក្រីក្រ និង​ខ្វះខាតច្រើន។

ខាងក្រោមនេះជាព័ត៌មានមួយចំនួនជុំវិញយន្តហោះ ATR-42 នេះ៖

ការចេញដំណើរ គោលដៅ និងការបាត់ដំណឹង៖ យន្តហោះ ATR-42 នេះ បានចាកចេញពី​អាកាសយាន្តដ្ឋាន Sentani ក្នុងទីក្រុង Jayapura ខេត្ត Papua ប្រទេស ឥណ្ឌូនេស៊ី នៅវេលាម៉ោង ២៖២២នាទីរសៀលថ្ងៃអាទិត្យ ដោយគ្រោងនឹងចុះចតនៅអាកាសយាន្តដ្ឋានតូចមួយឈ្មោះថា Oksibil នៅវេលាម៉ោង៣៖១៦នាទីរសៀល។ តែជាអកុសលយន្តហោះបានបាត់ដំណឹងនៅ​វេលាម៉ោង២៖៥៥នាទីរសៀល ខណៈកំពុងហោះហើរលើ តំបន់ដាច់ស្រយាលភាគខាងកើតខេត្ត Papua នេះបើយោងតាមការលើកឡើងរបស់​អ្នកនាំពាក្យ រដ្ឋមន្ត្រីក្រសួងដឹកជញ្ជូន ប្រាប់ភ្នាក់ងារសារព័ត៌មាន CNN ប្រចាំប្រទេស ឥណ្ឌូនេស៊ី។

អ្នកដំណើរ និងសហសេវិក៖ យោងតាមសារព័ត៌មាន Reuters បានឲ្យដឹងថា យន្តហោះនេះមានផ្ទុក​មនុស្ស៥៤នាក់ ក្នុងនោះមានអ្នកដំណើរជាមនុស្សពេញវ័យ៤៤នាក់ និងកុមារ៥នាក់ រួមទាំងសហសេវិក៥នាក់។ ប៉ុន្តែខណៈនេះ នៅមិនទាន់មានរបាយការណ៍ណាមួយ អាចបញ្ជាក់បានថា តើមានអ្នកនៅរស់រានមានជីវិតឬអត់នោះ នៅឡើយទេ។

មូលហេតុ៖ អ្នកវិភាគផ្នែកអាកាសចរណ៍របស់ សារព័ត៌មាន CNN បានបញ្ជាក់ថា ដោយសារយន្តហោះជួបគ្រោះថ្នាក់នេះ មិនបាន​ហៅសុំជំនួយ (Distress Call) ជាហេតុនាំឲ្យមានការសន្និដ្ឋាន​ទៅលើកត្តាជាច្រើន។  បញ្ហានេះអាចចង្អុលបង្ហាញថា សហសេវិករបស់យន្តហោះ ជាប់រវល់ក្នុងការគ្រប់គ្រងការហោះហើរ ខណៈដែលមានបញ្ហាកើតឡើង រហូតមិនអាចមានពេលគ្រប់គ្រាន់​សម្រាប់ការហៅសុំជំនួយ។ ដោយឡែកមូលហេតុម្យ៉ាងទៀតដែលសាមញ្ញនោះគឺ អាចបណ្តាលមកពីពួកគេមិនបានដឹងថា យន្តហោះកំពុងស្ថិតក្នុងបញ្ហា។

មន្ត្រីផ្នែកអាកាសចរណ៍បានបញ្ជាក់ថា ក្នុងពេលដែលយន្តហោះចាប់ចេញដំណើរពី​អាកាសយាន្តដ្ឋាន អាកាសធាតុមានលក្ខណៈល្អប្រសើរទេ ។ ប៉ុន្តែបើតាមការលើកឡើងរបស់លោក Ivan Cabrera ជំនាញផ្នែកឧត្តុនិយមប្រចាំសារព័ត៌មាន CNN បានបញ្ជាក់ថា ខ្យល់ព្យុះរួមទាំងផ្គររន្ទះបានកើតមាននៅត្រង់តំបន់ភ្នំ ដែលជាផ្លូវហោះហើររបស់យន្តហោះនេះ។ ហេតុនេះ បញ្ហាអាកាសធាតុអាចជាមូល​ហេតុមួយក្នុងចំណោមមូលហេតុនានា នៃគ្រោះថ្នាក់នេះ។

ដោយឡែកបើពិនិត្យទៅលើ​បញ្ហាសណ្ឋានដីវិញ ក៏អាចចាត់ទុកជាកត្តាគ្រោះថ្នាក់ផងដែរ ដោយនៅទីតាំងដែលយន្តហោះធ្លាក់នោះមានលក្ខណៈចំណោត និងជម្រាលជាខ្លាំង។  

លោក Beni Sumaryanto ប្រធានប្រតិបត្តិរបស់ក្រុមហ៊ុនអាកាសចរណ៍ Trigana បានបញ្ជាក់ថា បន្ទាប់ទទួលដំណឹងធ្លាក់យន្តហោះ ក្នុងរយៈពេល៣០នាទីក្រោយមក ក្រុមហ៊ុនក៏សម្រេចបញ្ជូន​យន្តហោះមួយ​គ្រឿង​ទៀតដើម្បីហោះហើរ​តាមផ្លូវ នៃយន្តហោះដែលបានបាត់ដំណឹង ប៉ុន្តែភ្លាមៗនោះ ពុំបានទទួលបានព័ត៌មានអ្វីឡើយ ដោយសារអាកាសធាតុមិនអំណោយផល បូករួមទាំងភាពងងឹត និងសណ្ឋានដីជម្រាលខ្លាំង ជាហេតុនាំឲ្យពិបាកក្នុងការស្វែងរកយន្តហោះដែលបានធ្លាក់នោះ។ យ៉ាងនេះក្តីប្រជាពលរដ្ឋរស់នៅក្នុងតំប​ន់បានផ្តល់ដំណឹងថា យន្តហោះនេះបានធ្លាក់នៅលើភ្នំ Tangok។ ប៉ុន្តែស្ថានភាពនៃគ្រោះថ្នាក់កម្រិតណានោះ កំពុងស្ថិតនៅក្រោមការតាមដាននៅឡើយ។

ប្រភេទយន្តហោះ៖ យោងតាម​ព័ត៌មានក្នុងប្រព័ន្ធទំនាក់ទំនងសង្គម Twitter ពីសំណាក់មន្ត្រី BASARNAS បានឲ្យដឹងថា យន្តហោះនេះ​ជាប្រភេទយន្តហោះATR42-300 សម្រាប់ហោះហើរក្នុងស្រុក ជាកម្មសិទ្ធ​របស់ក្រុមហ៊ុនអាកាសចរណ៍ Trigana របស់ប្រទេស ឥណ្ឌូនេស៊ី។ យន្តហោះនេះត្រូវបានផលិតឡើងក្នុងប្រទេស បារាំង និងអ៉ីតាលី ដែលត្រូវបានដាក់ឲ្យហោះហើរជាលើកដំបូងតាំងពីខែតុលា ឆ្នាំ១៩៩០មកម្ល៉េះ មានន័យថា យន្តហោះនេះមានអាយុកាលប្រមាណជាង២៥ឆ្នាំទៅហើយ។ គួរបញ្ជាក់ថា យន្តហោះប្រភេទហោះហើរក្នុងស្រុកនេះ មានតម្លៃប្រមាណជា១៩,៥លានដុល្លារអាម៉េរិក(របាយការណ៍ក្នុងឆ្នាំ២០១២)។

ក្រុមហ៊ុនអាកាសចរណ៍៖ យោងតាម​ទិន្ន័យដែលទទួលបានពីគេហទំព័រ Airfleet.com បានឲ្យដឹងថា ក្រុមហ៊ុនអាកាសចរណ៍នេះ មានយន្តហោះចំនួន​១៤គ្រឿង ក្នុងនោះ​ប្រភេទយន្តហោះATR មានចំនួន ១០គ្រឿង និងយន្តហោះ Boeing 737 Classics ចំនួន៤គ្រឿង។ គួររំលឹកផងដែរថា ក្រុមហ៊ុនអាកាសចរណ៍ Trigana នេះ ធ្លាប់ជួបហេតុការណ៍បាត់យន្តហោះយ៉ាងហោចណាស់ បីករណីក្នុងរយៈពេល១៨ខែ​ចុងក្រោយនេះ ហើយធ្លាប់ជួបគ្រោះថ្នាក់ធ្ងន់ធ្ងររហូតដល់​១៤ករណី បូករួមទាំងគ្រោះថ្នាក់ចុងក្រោយនេះផងដែរ គិតចាប់តាំងពីការចាប់ដំណើរការជាលើកដំបូងឆ្នាំ១៩៩១មក ។ សូមជម្រាបថា ក្រុមហ៊ុនអាកាសចរណ៍នេះ ក៏ធ្លាប់ត្រូវបានសហភាពអឺរ៉ុប ចុះក្នុងបញ្ជីហាមឃាត់មិនឲ្យហោះហើរទៅអឺរ៉ុបផងដែរ ចាប់តាំងពីឆ្នាំ២០០៧មក ដោយសារក្តីបារម្ភ ពីភាពខ្វះស្តង់ដាក្នុងការរក្សាសុវត្ថិភាពហោះហើរ៕