(វ៉ាស៊ីនតោន)៖ ប្រធានាធិបតីអាមេរិកលោក ដូណាល់ ត្រាំ បាននិយាយថា លោកមើលមិនឃើញហេតុផលណាមួយ ដើម្បីឱ្យសហរដ្ឋអាមេរិកលុបចោលការលក់អាវុធមានតម្លៃរាប់ពាន់លានដុល្លារឱ្យអារ៉ាប៊ីសាអូឌីត ដោយសារតែការបាត់ខ្លួនរបស់អ្នកសារព័ត៌មានអារ៉ាប៊ីសាអូឌីត លោក ចាម៉ាល់ ខាសហូកជី (Jamal Khashoggi) នោះឡើយ។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters នៅព្រឹកថ្ងៃសុក្រ ទី១២ ខែតុលា ឆ្នាំ២០១៨។
ការលើកឡើងខាងលើរបស់លោក ដូណាល់ ត្រាំ កើតមានឡើងនៅក្រោយពេលសមាជិកសភាអាមេរិកមួយចំនួនយល់ថា សហរដ្ឋអាមេរិកគួរតែចាត់វិធានការ ឬទណ្ឌកម្មប្រឆាំងនឹងទីក្រុងរីយ៉ាដ នៅក្នុងករណីដែលគេរកឃើញថា លោក Khashoggi ពិតជាត្រូវបានគេសម្លាប់មែននោះ។
តែទោះជាយ៉ាងណា លោក ត្រាំ បានអះអាងថា លោកមើលមិនឃើញថា មានហេតុផលណាមួយដើម្បីលុបចោលគំរោងលក់អាវុធ និងការវិនិយោគរបស់អារ៉ាប៊ីសាអូឌីតនៅក្នុងសហរដ្ឋអាមេរិក ដោយគ្រាន់តែការបាត់ខ្លួនរបស់អ្នកសារព័ត៌មានម្នាក់នោះទេព្រោះថា ការធ្វើដូច្នោះនឹងបង្ខំឱ្យទីក្រុងរីយ៉ាដយកលុយទៅចាយនៅក្នុងប្រទេសរុស្ស៊ី និងចិនតែប៉ុណ្ណោះ។
លោក ដូណាល់ ត្រាំ បានគូសបញ្ជាក់ប្រាប់អ្នកសារព័ត៌មាននៅថ្ងៃព្រហស្បតិ៍សប្ដាហ៍នេះ យ៉ាងដូច្នេះថា «ពួកគេ (អារ៉ាប៊ីសាអូឌីត) កំពុងត្រៀមចាយលុយ ១១០ពាន់លានដុល្លារ លើការទិញបរិក្ខាយោធា ហើយដែលនេះបានបង្កើតការងារយ៉ាងច្រើនសន្ធឹកសន្ធាប់ នៅក្នុងសហរដ្ឋអាមេរិក។ ដូច្នេះខ្ញុំមិនពេញចិត្តទាល់តែសោះ ចំពោះគំនិតបញ្ឍប់ការលក់អាវុធ ឬការវិនិយោគរបស់ទីក្រុងរីយ៉ាដ ដ្បិតអ្នកទាំងអស់គ្នាដឹងយ៉ាងច្បាស់ថា ពួកគេនឹងធ្វើអ្វីជាការឆ្លើយតប។ ពោលគឺពួកគេនឹងដក យកលុយវិញ ហើយយកវាទៅចាយនៅក្នុងប្រទេសរុស្ស៊ី ឬចិន ឬក៏ប្រទេសណាមួយក៏ថាបាន»។
គួរម្រាបថា លោក Jamal Khashoggi ដែលជាអ្នករិះគន់ការដឹកនាំនៃរាជ្យវង្សអារ៉ាប៊ីសាអូឌីត បានចូលក្នុងស្ថានកុងស៊ុលអារ៉ាប៊ីសាអូឌីត ប្រចាំទីក្រុងអ៊ីស្ដង់ប៊ូល កាលពីថ្ងៃទី០២ ខែតុលាកន្លងទៅ ដើម្បីទទួលយកឯកសារសម្រាប់គំរោង រៀបអាពាហ៍ពិពិពាហ៍របស់លោកជាមួយស្ត្រីជាជនជាតិតួកគីម្នាក់ឈ្មោះ ហាធីស សិនជីស (Hatice Cengiz)។
ក៏ប៉ុន្តែនាង Hatice ជាគូដណ្ដឹងដែលចំានៅខាងក្រៅស្ថានកុងស៊ុលបានអះអាងថា លោក Khashoggi មិនបានចេញមកក្រៅវិញនោះទេ។ ចំណែកឯប្រព័ន្ធផ្សព្វផ្សាយតួកគី បានរាយការណ៍ថា អ្នកសារព័ត៌មានរូបនេះត្រូវបានគេបាញ់សម្លាប់ នៅក្នុងស្ថានកុងស៊ុលអារ៉ាប៊ីសាអូឌីត ខណៈទីក្រុងរីយ៉ាដក៏បានចេញមុខទាត់ចោលការចោទប្រកាន់នេះរួចហើយដែរ៕
