(ម៉ូស្គូ)៖ ការលុបចោលគំរោងលក់អាវុធ ដាក់សម្ពាធផ្នែកការទូត និងពាណិជ្ជកម្ម, ការលុបចោលទិដ្ឋាការ និងការបង្កកកិច្ចព្រមព្រៀងពាណិជ្ជកម្ម គឺជាវិធានការឆ្លើយតបស្ថិតនៅក្នុងការពិចារណា របស់បណ្ដាប្រទេសលោកខាងលិច រួមទាំងសហរដ្ឋអាមេរិក នៅក្នុងករណីដែលអារ៉ាប៊ីសាអូឌីត មានជាប់ពាក់ព័ន្ធនឹងការស្លាប់របស់អ្នកកាសែតលោក ចាម៉ាល ខាសហូកជី (Jamal Khashoggi)។ នេះបើតាមការចេញផ្សាយដោយ CNN នាព្រឹកថ្ងៃសុក្រ ទី២៦ ខែតុលា ឆ្នាំ២០១៨។
ក៏ប៉ុន្តែស្របពេលបណ្ដាប្រទេសមហាអំណាចលោកខាងលិចទាំងនេះ នាំគ្នារិះគន់ទីក្រុងរីយ៉ាដ ដោយសារតែពួកគេមិនអាចទទួល យកបានចំពោះការបកស្រាយរបស់ក្រុមមន្ត្រីអារ៉ាប៊ីសាអូឌីត ប្រទេសមួយដែលមិនបានចេញមុខរិះគន់មហាសេដ្ឋីប្រេងមួយនេះ ទាល់តែសោះនោះគឺរុស្ស៊ី។ ជាក់ស្ដែងថ្លែងប្រាប់សារព័ត៌មាននៅក្នុងស្រុក ប្រធានាធិបតីរុស្ស៊ីលោក វ្ល៉ាឌីមៀ ពូទីន បាននិយាយថា ទីក្រុងម៉ូស្គូ មិនអាចបំពុលទំនាក់ទំនងជាមួយអារ៉ាប៊ីសាអូឌីត ដោយមិនទាន់ដឹងច្បាស់ពីការពិត ដែលកើតឡើងលើលោក Khashoggi នោះទេ ពោលគឺរង់ចាំលទ្ធផលស៊ើបអង្កេតជាមុនសិន។
ដោយឡែកក្រុមអង្គការសិទ្ធិមនុស្សមិនយល់ដូច្នេះឡើយ រុស្ស៊ីនៅស្ងៀមព្រោះទីក្រុងម៉ូស្គូក៏មានកេរ្តិ៍ឈ្មោះមិនល្អខាងបង្រ្កាប អ្នកសារព័ត៌មានរិះគន់លោក ពូទីន ផងដែរ។ ជាឧទាហរណ៍ អ្នកសារព័ត៌មានជាច្រើននាក់ ត្រូវបានគេរាយការណ៍ថា ត្រូវបានគេសម្លាប់នៅក្នុងប្រទេសរុស្ស៊ី ក្នុងនោះរួមានអ្នកសារព័ត៌មានស៊ើបអង្កេត លោកស្រី អាន់ណា ផូលីតកូវកាយ៉ា (Anna Politkovskaya) ដែលត្រូវបានគេបាញ់ សម្លាប់នៅក្នុងផ្ទះខ្លួនឯងកាលពីឆ្នាំ២០០៦ កន្លងទៅ។
លើសពីនេះទៅទៀត ទីក្រុងម៉ូស្គូក៏ត្រូវបានគេចោទថា ជាអ្នកនៅពីក្រោយការព្យាយាមបំពុលសម្លាប់អតីតទីភ្នាក់ងារស៊ើបការណ៍សំងាត់រុស្ស៊ី លោក ស៊ឺហ្គៃ ស្គ្រីផាល់ (Sergei Skripal) និងកូនស្រីរបស់លោកនៅលើទឹកដីអង់គ្លេស កាលពីខែមីនាកន្លងទៅ។ ប៉ុន្តែអ្វីដែលធ្វើឱ្យរុស្ស៊ីមិនទាន់អាចរិះគន់អារ៉ាប៊ីសាអូឌីត នោះគឺថាខ្លាចប៉ះពាល់ដល់ការវិនិយោគជាង ៥ពាន់លានដុល្លារ របស់អារ៉ាប៊ីសាអូឌីតលើ គំរោងឧស្ម័នរុស្ស៊ីនៅឯតំបន់សមុទ្រទឹកកកអាក់ទិច។
គួររំលឹកឡើងវិញថា លោក Jamal Khashoggi បានបាត់ខ្លួនយ៉ាងអាថ៌កំបាំង ក្រោយចូលស្ថានកុងស៊ុលអារ៉ាប៊ីសាអូឌីត ប្រចាំ ទីក្រុងអ៊ីស្ដង់ប៊ូល ប្រទេសតួកគី កាលពីថ្ងៃទី០២ ខែតុលា។ ក្រោយមកទៀត មានសេចក្ដីរាយការណ៍ជាបន្តបន្ទាប់ថា លោកត្រូវបានគេសម្លាប់ចោលនៅក្នុងស្ថានកុងស៊ុល ហើយកាលពីថ្ងៃព្រហស្បតិ៍ អារ៉ាប៊ីសាអូឌីតក៏បានទទួលស្គាល់ដែរថា ការស្លាប់របស់អ្នកកាសែតរូបនេះ គឺជាឃាតកម្មរៀបចំទុកជាមុន៕
