(ប៉េកាំង)៖ បន្ទាប់ពីបានចុះចតនៅផ្ទៃចំហៀងម្ខាងទៀតនៃព្រះច័ន្ទ ដែលពុំធ្លាប់មានការុករកពីមុនមក យានអវកាសចិន «ឆាងអឺទី៤» បានបាញ់បញ្ជូនរូបភាពដំបូង ចំនួនពីរសន្លឹកដំបូងនៃតំបន់នោះមកកាន់ផែនដីវិញ ដែលថតបានអំឡុងពេលវាព្យាយាមធ្វើការចុះចត ហើយលទ្ធផលនេះទោះគាំទ្រ ឬមិនគាំទ្រក៏គ្រប់គ្នាមិនអាចប្រកែកបានឡើយ អំពើសមត្ថភាពស្រាវជ្រាវទីអវកាសរបស់ចិន ដែលកំពុងវិវឌ្ឍន៍លឿនស្ទើរមិនគួរឲ្យជឿចំពោះមុខមហាអំណាចអវកាសមុនៗ ជាពិសេសអាមេរិក រុស្ស៊ី និងអឺរ៉ុប។ នេះបើតាមការដកស្រង់ការផ្សាយពីសារព័ត៌មាន BBC និង Space នៅព្រឹកថ្ងៃសុក្រ ទី០៤ ខែមករា ឆ្នាំ២០១៩។
យាន «ឆាងអឺ» បានត្រូវបានទីភ្នាក់ងារអវកាសចិន CNSA បាញ់បង្ហោះចេញពីផែនដីកាលពីថ្ងៃទី០៨ ខែធ្នូ ហើយម្សិលមិញនេះ (ថ្ងៃព្រហស្បតិ៍) វាបានធ្វើការចុះចតជាលើកដំបូងបង្អស់ នៅតំបន់គេហៅថា Far Side ឬក៏ Dark Side របស់ព្រះច័ន្ទ ជាផ្ទៃមួយចំហៀងទៀតដែរបែរចេញពីផែនដី។ សម្រាប់ទីតាំងដែលយានអវកាស «ឆាងអឺ-៤» បានចុះចតគឺជារណ្តៅអាចម៍ផ្កាយដ៏ចំណាស់ និងធំបំផុតមួយ ប្រចាំនៅក្នុងប្រព័ន្ធអាទិត្យយើងមានឈ្មោះថា វ៉ុនខាមែន (Von Karman) ដែលមានមុខកាត់រហូតដល់ទៅ ១៨៦គីឡូម៉ែត្រឯណោះ។
ជាក់ស្តែងណាស់ ទីភ្នាក់ងារអវកាសធំៗបានស្គាល់ និងគូសវាសផែនទីរួចទៅហើយ នៃតំបន់មួយចំហៀងទៀតនៃព្រះច័ន្ទ ហើយក៏ធ្លាប់បានបរាជ័យក្នុងការបញ្ជាយានចុះចតនៅទីនោះផងដែរ។ ផ្នែកដែលមិនអាចបែរមករកផែនដី ឬមនុស្សលើផែនដីគ្មានថ្ងៃបានឃើញឡើយ ប្រសិនបើមិនមានផ្កាយរណប ឬយានទៅថតរូបទេនោះ គឺពិបាកណាស់ក្នុងការស្រាវជ្រាវ ហេតុដូច្នេះការចុះចត និងបញ្ជាយានលើផ្ទៃនោះ គឺជាកម្រិតសមត្ថភាពថ្មីមួយទៀតរបស់ចិន ដែលចង់បង្ហាញប្រាប់ពិភពលោកថា ចិនពិតជាមានសមត្ថភាពផ្នែកគ្រប់គ្រងបច្ចេកទេស និងធនធានទ្រទ្រង់កម្មវិធីដែលខ្លួនបានបង្កើតមែន។
ជុំវិញសមិទ្ធផលរបស់ចិននេះដែរ លោក យ៉េ ក្វាន់ជី (Ye Quanzhi) តារាវិទូនៃវិទ្យាស្ថាន Caltech បានប្រាប់ BBC កាលពីថ្ងៃព្រហស្បតិ៍ថា «ប្រទេសចិនព្យាយាមសម្រេចបាននូវអ្វីដែលមហាអំណាចអវកាសនានា មិនអាចធ្វើបានពីមុខមក...។» អ្នកវិទ្យាសាស្ត្រអន្តរជាតិបានដឹងយ៉ាងច្បាស់ថា ផ្នែកមួយចំហៀងទៀតនៃព្រះច័ន្ទ គឺជាកន្លែងដ៏ប្រសើរបំផុតសម្រាប់បំពាក់មជ្ឈមណ្ឌលតារាសាស្ត្រ ឬតេឡេស្កូបរលកវិទ្យុសកម្ម ព្រោះវាអាចគេចឆ្ងាយពីការរំខាននៃរលកវិទ្យុដ៏ស្មុគស្មាញ ដែលជះចេញពីភពផែនដីយើង។
អ្វីដែលគួរឲ្យចាប់អារម្មណ៍បន្ថែមទៀតនោះ យាន Lander នៅលើឆាងអឺ-៤ ក៏បានពាំនាំយកទៅជាមួយនូវពូជរុក្ខជាតិដូចជា កប្បាស, rapeseed, ដំឡូងបារាំង, fruit fly, yeast និង arabidopsis ជាដើម ស្ថិតនៅក្នុងទិសដៅបង្កើតជីវៈចំរុះតូចមួយនៅលើនោះ។ ងាកមក NASA វិញ អ្នកជំនាញនៅអង្គការអវកាសអាមេរិកមួយនេះ ក៏បានទទួលស្គាល់ផងដែរថា អ្វីដែលចិនសម្រេចបានពេលនេះ គឺជាលើកដំបូងសម្រាប់មនុស្សជាតិ និងជាសមិទ្ធផលដ៏គួរឲ្យភ្ញាក់ផ្អើលមួយថែមទៀត។
គួរជម្រាបថា បេសកកម្មជាប្រវត្តិសាស្រ្តរបស់ប្រទេសចិន នឹងជួយត្រួសត្រាយផ្លូវសម្រាប់ការរុករកជាបន្តបន្ទាប់ទៀតនាថ្ងៃអនាគត នៅតំបន់អាថ៌កំបាំងនេះ។ ការទទួលជោគជ័យនៃបេសកកម្មរបស់ចិនត្រូវសម្រេចបាន នៅចំពោះមុខការផ្តោតចំណាប់អារម្មណ៍ឡើងវិញ ចំពោះការស្រាវជ្រាវរុករកលើឋានព្រះច័ន្ទ ពីសំណាក់ទីភ្នាក់ងារអវកាសអាមេរិក NASA, ទីភ្នាក់ងារអវកាសអឺរ៉ុប ESA, រុស្ស៊ី, ឥណ្ឌា, និងក្រុមហ៊ុនអវកាសឯកជនជាច្រើនផ្សេងទៀត៕
