(វ៉ាស៊ីនតោន)៖ រដ្ឋបាលលោកប្រធានាធិបតី ដូណាល់ ត្រាំ មានគម្រោងលុបចោលលក្ខនិ្តកៈពាណិជ្ជកម្មពិសេសសម្រាប់ប្រទេសឥណ្ឌា ដែលជាគោលនយោបាយធ្លាប់អនុញ្ញាតឱ្យផលិតផលមួយចំនួនរបស់មហាយក្សលេខ ២ នៃទ្វីបអាស៊ីមួយនេះ ចូលក្នុងសហរដ្ឋអាមេរិកដោយមិនជាប់កតាព្វកិច្ចបង់ពន្ធនោះ។ នេះបើតាមការចេញផ្សាយដោយសារព័ត៌មាន BBC នៅរសៀលថ្ងៃអង្គារ ទី០៥ ខែមីនា ឆ្នាំ២០១៩។
ការសម្រេចខាងលើរបស់លោក ដូណាល់ ត្រាំ ធ្វើឡើងដោយលោកសំអាងថា រដ្ឋាភិបាលទីក្រុងញូដេលីបានបរាជ័យក្នុងការអនុញ្ញាតឱ្យ ផលិតផលអាមេរិកចូលក្នុងទីផ្សារឥណ្ឌា ដោយស្មើភាពដូចដែលអាមេរិកបានធ្វើ។ ប៉ុន្តែឥណ្ឌាអះអាងថា ការលុបចោលលក្ខនិ្តកៈពាណិជ្ជកម្មជាពិសេស នឹងមិនធ្វើឱ្យប៉ះពាល់ធ្ងន់ធ្ងរ ដល់សេដ្ឋកិច្ចជាតិរបស់ខ្លួននោះទេ ហើយម្យ៉ាងវិញទៀតក្រៅតែពីឥណ្ឌាសហរដ្ឋអាមេរិក ក៏បានប្រកាសបញ្ចប់លក្ខន្តិកៈពិសេស ដូចគ្នានេះសម្រាប់ប្រទេសតួកគីផងដែរ។
គួរបញ្ជាក់ថា ការលុបចោលលក្ខនិ្តកៈពាណិជ្ជកម្មពិសេស ចេញពីប្រទេសឥណ្ឌា និងតួកគី គឺជាការចាត់វិធានការចុងក្រោយបំផុតនៃរដ្ឋបាល លោក ដូណាល់ ត្រាំ ក្នុងការប្រយុទ្ធប្រឆាំងនឹងការធ្វើ ឬការអនុវត្តពណិជ្ជកម្មមិនត្រឹមត្រូវ ខណៈលោក ត្រាំ ផ្ទាល់បានសន្យាថានឹងកាត់បន្ថយឱនភាពពាណិជ្ជកម្មរវាងសហរដ្ឋអាមេរិក និងបណ្ដាប្រទេសដទៃ៕
