(គូឡាឡាំពួរ)៖ ស្ត្រីជនជាតិឥណ្ឌូណេស៊ី នាង ស៊ីទី អៃស៊ីយ៉ាហ៍ (Siti Aisyah) ដែលត្រូវបានគេចោទប្រកាន់ថា បានសម្លាប់លោក គីម ជុងណាំ បងប្រុសឪពុកតែមួយម្ដាយទីទៃរបស់មេដឹកនាំកំពូលកូរ៉េខាងជើង លោក គីម ជុងអ៊ុន ត្រូវបានដោះលែងឱ្យមានសេរីភាពហើយ បន្ទាប់ពីព្រះរាជា អាជ្ញាម៉ាឡេស៊ីទម្លាក់ចោលការចោទប្រកាន់ប្រឆំាងនឹងរូបនាង។ នេះបើតាមការចេញផ្សាយដោយសារព័ត៌មាន Channel News Asia នៅព្រឹកថ្ងៃចន្ទ ទី១១ ខែមីនា ឆ្នាំ២០១៩។
ក្រុមព្រះរាជាអាជ្ញាម៉ាឡេស៊ី នៅថ្ងៃចន្ទនេះបានសម្រេចចិត្តដាក់សំណើ សុំទម្លាក់ចោលការចោទប្រកាន់ប្រឆាំងនាង Siti Aisyah រីឯតុលាការក៏បានទទួលសំណើនេះដែរ។ ស្ត្រីជនជាតិឥណ្ឌូណេស៊ីរូបនេះ ត្រូវបានដោះលែងពីមន្ទីរឃុំឃាំង និងឡើងជិះរថយន្ដស្ថានទូតមួយគ្រឿង បន្ទាប់ពីដើរចេញពីតុលាការ។ សវនាការកាត់ទោសស្ត្រីឥណ្ឌូណេស៊ី នាង Siti Aisyah អាយុ ២៦ឆ្នាំ ត្រូវបានផ្អាកកាលពីខែធ្នូ ឆ្នាំ២០១៨ ខណៈមេធាវីរបស់ជនជាប់ចោទរូបនេះសម្ដែងការជំទាស់ ទៅនឹងការធ្វើសេចក្ដីថ្លែងការណ៍ របស់សាក្សីចំនួន ០៧នាក់។ ប៉ុន្តែក្រុមព្រះរាជ្ញាម៉ាឡេស៊ីមិនបានបញ្ជាក់ពីមូលហេតុលម្អិតជុំវិញសំណើរបស់ខ្លួនឡើយ។
គួរជម្រាបថា នាង Siti Aisyah និងស្ត្រីជាជនជាតិវៀតណាមម្នាក់ទៀតឈ្មោះ ដួន ធីហ័ង (Doan Thi Huong) រួមទាំងជនជាតិកូរ៉េខាងជើងបួននាក់ ផ្សេងទៀតដែលកំពុងរត់គេចខ្លួន ត្រូវបានតុលាការម៉ាឡេស៊ីចោទប្រកាន់ពីបទ ជាប់ពាក់ព័ន្ធនឹងការសម្លាប់លោក គីម ជុងណំា អាកាសយានដ្ឋានទីក្រុងគូឡាឡាំពួរ កាលពីថ្ងៃ ទី១៣ ខែកុម្ភៈ ឆ្នាំ២០១៧។ ប៉ុន្តែស្ត្រីទាំង ០២នាក់នេះបានទាត់ចោលរាល់ការចោទប្រកាន់នេះដោយអះអាងថា ខ្លួនត្រូវបានគេបោកបញ្ឆោតថាការសម្លាប់លោក គីម ជុងណាំ គ្រាន់តែការសម្ដែងខ្សែភាពយន្ដប៉ុណ្ណោះ។
លោក គីម ជុងណាំ ត្រូវបានគេសម្លាប់ដោយប្រើប្រាស់សារធាតុគីមីពុល VX។ ចំណែកឯ សហរដ្ឋអាមេរិកធ្លាប់បានចោទប្រកាន់ថា រដ្ឋាភិបាលកូរ៉េខាងជើងគឺជាអ្នកនៅពីក្រោយអំពើឃាតកម្មនេះ ប៉ុន្តែទីក្រុងព្យុងយ៉ាងបានបដិសេធរាល់ការចោទប្រកាន់៕
