(សេអ៊ូល)៖ មេដឹកនាំកូរ៉េខាងជើងលោក គីម ជុងអ៊ុន កំពុងសម្លឹងមើលការបំពេញដំណើរទស្សនកិច្ចទៅកាន់ទីក្រុងម៉ូស្គូ ដើម្បីស្វែងរកខ្នងបង្អែក ក៏ដូចជាពង្រឹងទំនាក់ទំនងឱ្យកាន់តែរឹងមាំជាមួយរុស្ស៊ី បន្ទាប់ពីកិច្ចប្រជុំកំពូលជាមួយប្រធានាធិបតីអាមេរិកលោក ដូណាល់ ត្រាំ នៅវៀតណាមកាលពីចុងខែកុម្ភៈកន្លងទៅបរាជ័យ។ នេះបើតាមអតីតមន្ត្រីជាន់ខ្ពស់ CIA ដកស្រង់ចេញផ្សាយដោយទីភ្នាក់ងារព័ត៌មាន យ៉ុនហាប់ នៅព្រឹកថ្ងៃព្រហស្បតិ៍ ទី២១ ខែមីនា ឆ្នាំ២០១៩។
លោក អានឌ្រូ គីម (Andrew Kim) ដែលបានលាលែងពីតំណែងជា ប្រធានទីភ្នាក់ងារស៊ើបការណ៍សំងាត់អាមេរិក CIA ទទួលបន្ទុកបេសកកម្មកូរ៉េកាលពីឆ្នាំ២០១៨ បានធ្វើការកត់សម្គាល់បែបនេះ នៅអំឡុងកិច្ចប្រជុំបិទទ្វារក្នុងទីក្រុងសេអ៊ូលកាលពីថ្ងៃពុធ ក្រោយពីលោកបានមកដល់កូរ៉េខាងត្បូង កាលពីថ្ងៃចន្ទដើមសប្តាហ៍នេះ។
គួរជម្រាបថា ការជជែកគ្នាយ៉ាងផុលផុសពីដំណើរទស្សនកិច្ចរបស់លោក គីម ជុងអ៊ុន ទៅកាន់ប្រទេសរុស្ស៊ី បានកើតមានឡើង ជាបន្តបន្ទាប់កិច្ចប្រជុំកំពូលជាមួយប្រធានាធិបតីអាមេរិកលោក ដូណាល់ ត្រាំ នៅវៀតណាមកាលពីចុងខែកុម្ភៈកន្លងទៅបរាជ័យ ។ មិនតែប៉ុណ្ណោះទីក្រុងព្យុងយ៉ាងត្រូវបានគេមើលឃើញថា បានរឹតចំណងមិត្តភាពការទូតកាន់តែខ្លាំងជាមួយទីក្រុងម៉ូស្គូ ដោយបានបញ្ជូនមន្ត្រីជាន់ខ្ពស់របស់ខ្លួន ០៣រូប ទៅកាន់ប្រទេសរុស្ស៊ីនៅក្នុងខែមីនានេះ។
ដោយឡែកកាលពីថ្ងៃពុធកន្លងទៅនេះ ក៏មានព័ត៌មានបានចេញផ្សាយផងដែរថា កូរ៉េខាងជើងបានកោះហៅអគ្គរដ្ឋទូតរបស់ខ្លួនប្រចាំប្រទេសចិន និងអង្គការសហប្រជាជាតិ (UN) ឱ្យត្រឡប់មកស្រុកវិញ ដើម្បីពិភាក្សាគ្នាពីការចាត់វិធានការឆ្លើយតបនានា បន្ទាប់ពីព្រមានសហរដ្ឋអាមេរិកថា អាចនឹងពិចារណាលើការអនុវត្តគោល នយោបាយនុយក្លេអ៊ែរឡើងវិញផងដែរ៕
