(ការ៉ាកាស់)៖ ទីភ្នាក់ងារ​សារព័ត៌មាន Reuters បានចេញផ្សាយ​របាយការណ៍មួយឱ្យដឹងថា ធនាគារវិនិយោគ Citigroup មានមូលដ្ឋាន​នៅសហរដ្ឋអាមេរិក កំពុងមានគម្រោង​លក់មាសរាប់តោន​ ដែលដាក់ជាវត្ថុបញ្ចំា​ដោយធនាគារកណ្ដាល​វេណេស៊ុយអេឡា ដោយសារ​តែវេណេស៊ុយអេឡា​ ហួសពេលកំណត់ក្នុងការបង់ប្រាក់ ១.៦​ពាន់លានដុល្លារ ដែល​បានខ្ចីធនាគារនេះ តាមរយៈការយកមាសទៅតម្កល់។ នេះបើតាម​ការចេញ​ផ្សាយ​ដោយសារព័ត៌មាន Sputnik នៅរសៀលថ្ងៃព្រហស្បតិ៍ ទី២១ ខែមីនា ឆ្នាំ២០១៩។

ធនាគារ​វិនិយោគ​អាមេរិក Citigroup មាន​គម្រោងយកមាស​រាប់តោន ដែលត្រូវបានយកមក​ដាក់តម្កល់​ដោយធនាគារកណ្តាល​​វេណេស៊ុយអេឡា ទៅលក់​យកលុយសុទ្ធ ដោយសារតែ​វេណេស៊ុយអេឡា​មិន​អាចបង់ប្រាក់​ ដែលខ្លួន​បានជំពាក់ធនាគារ Citigroup ឲ្យទាន់ពេល​វេលាកំណត់ ដែលបានផុតតាំងតែពីថ្ងៃទី១១ ខែមីនា ឆ្នាំ២០១៩ មកម្ល៉េះ។

កិច្ចព្រមព្រៀងយក​មាសប្តូរយកប្រាក់​មកវិញនេះ ត្រូវបាន​ធ្វើឡើង​រវាង Citigroup និងធានគារកណ្តាល​វេណេស៊ុយអេឡា កាលពី​ឆ្នាំ២០១៥ ហើយ​ក្នុងនោះ​​ទីក្រុង​ការ៉ាកាស់​បានសន្យាថា នឹង​សងប្រាក់​ដំបូង​ចំនួន ១.១ពាន់លានដុល្លារ លើប្រាក់​ដើមទាំងអស់ ១.៦ពាន់លានដុល្លារ​ដែលខ្លួនបានខ្ចី នៅថ្ងៃទី១១ ខែមីនា ឆ្នាំ២០១៩ ខណៈ​ទាំង​ប្រាក់​ដើម និងការប្រាក់​ដែលនៅសល់ នឹងត្រូវបង់​នៅឆ្នាំ២០២០។ បើតាម Reuters ដដែល ធនាគារវិនិយោគ​អាមេរិកមួយនេះ មានគម្រោងនឹងលក់មាស​រាប់តោន ដែលជា​ទ្រព្យបញ្ចាំ​របស់​ប្រទេសវេណេស៊ុយអេឡា​​ជាមួយតម្លៃ​ទីផ្សារ ១.៣៥៨​ពាន់លានដុល្លារ។

គួរបញ្ជាក់ថា សេចក្ដីរាយការណ៍​របស់ Reuters​ ធ្វើឡើងតែប៉ុន្មាន​ថ្ងៃប៉ុណ្ណោះ បន្ទាប់ពីសហរដ្ឋអាមេរិក​សម្រេចចិត្តដាក់ ទណ្ឌកម្មថ្មីមួយលើក្រុមហ៊ុនមាសវេណេស៊ុយអេឡា ម៉ាញណឺវែន (Minerven) ដែលត្រូវបានចាត់ទុកថា ជាធនធានមួយដ៏សំខាន់​ក្នុងការជម្រុញ ឱ្យយោធា​នៅតែស្មោះស័្មគ្រ​នឹងលោក នីកូឡាស់ ម៉ាឌូរ៉ូ៕