(វ៉ាស៊ីនតោន)៖ ប្រធានាធិបតីអាមេរិកលោក ដូណាល់ ត្រាំ បាននិយាយថា សហរដ្ឋអាមេរិកបានរកឃើញចំណុចរួម មួយចំនួននៅក្នុងកិច្ចព្រមព្រៀងពាណិជ្ជកម្មជាមួយចិន ជាមួយការរំពឹងជួបជាមួយលោកប្រធានាធិបតី ស៊ី ជិនពីង នៅពេលវេលាដ៏សាកសមណាមួយ។ នេះបើតាមការចេញផ្សាយដោយ​សារព័ត៌មាន BBC នៅរសៀលថ្ងៃសុក្រ ទី០៥ ខែមេសា ឆ្នាំ២០១៩។

លោក ដូណាល់ ត្រាំ ធ្វើការកត់សម្គាល់បែបនេះ នៅឯសេតវិមានមុននឹងជំនួបជាមួយ​ឧបនាយករដ្ឋមន្ត្រីចិនលោក លីវ ហេ (Liu He)។ ស្ថិតក្នុងឱកាសនោះ ប្រធានាធិបតីអាមេរិករូបនេះ​ បានបញ្ជាក់បន្ថែមយ៉ាងដូច្នេះថា «វានឹងក្លាយជាកិច្ចព្រមព្រៀង ដ៏អស្ចារ្យ និងជាប្រវត្តិសាស្ត្របើវាកើតឡើងមែននោះ ហើយយើងទំាងអស់គ្នានឹងបានឃើញ ព្រោះវាមានឱកាសច្រើនដែលនឹងអាចកើតឡើង»។ ប៉ុន្តែទន្ទឹមគ្នាលោក ត្រាំ នៅតែអះអាងដដែលថា នៅមានចំណុចខ្លះទៀតដែលភាគីទាំង ២ នៅតែខ្វែងគំនិតគ្នានៅឡើយ។

គួរបញ្ជាក់ថា បើតាមលោក ដូណាល់ ត្រាំ កិច្ចព្រមព្រៀងដែលលោកបាននិយាយ អាចនឹងកើតមានឡើងនៅ ០៤សប្ដាហ៍ខាងមុខទៀតនេះ បន្ទាប់ពីភាគីទាំង ២ បានជួបចរចាគ្នាតាំងតែពីខែធ្នូ ឆ្នាំ២០១៨ មកម្ល៉េះ ដើម្បីបញ្ចប់ សង្រ្គាមពាណិជ្ជកម្ម ដែលកំពុងបង្កការផលប៉ះពាល់អវិជ្ជមាន​ដល់សេដ្ឋកិច្ចពិភពលោកទាំងមូល។ យ៉ាងណាក៏ដោយ​ក្រោយពីភាគីទាំងពីរ ចិន និងអាមេរិក បានចុះកិច្ចព្រមព្រៀងផ្អាកជម្លោះនៅក្នុងកិច្ចប្រជុំ G20 ចុងឆ្នាំ២០១៨ ​នាប្រទេសអាហ្សង់ទីននោះ ស្ថានការណ៍វិវាទពាណិជ្ជកម្មបានស្ងប់ស្ងាត់ និង​រង់ចាំ​មន្ត្រីតំណាងប្រទេសទាំងពីរ ធ្វើការចរចាដោះស្រាយបញ្ហា៕