(វ៉ាស៊ីនតោន)៖ សារព័ត៌មាន Bloomberg បានឱ្យដឹងថា រដ្ឋមន្ត្រីថាមពលអាមេរិកលោក រីក ភែរី (Rick Perry) មានគម្រោងចាកចេញពីរដ្ឋបាលប្រធានាធិបតីអាមេរិក លោក ដូណាល់ ត្រាំ ខណៈពេលវេលានៃការលាលែងពីតំណែងរបស់លោក នឹងត្រូវបានប្រកាសនាពេលឆាប់ៗនេះ។ នេះបើតាមការដកស្រង់ចេញផ្សាយដោយ ទីភ្នាក់ងារសារព័ត៌មានចិនស៊ីនហួរ នៅព្រឹកថ្ងៃព្រហស្បតិ៍ ទី១៨ ខែមេសា ឆ្នាំ២០១៩។

យោងតាម Bloomberg លោក Perry មានអាយុ ៦៩ឆ្នាំ បានពិចារណាលាលែងពីតំណែង ​អស់រយៈពេលជាច្រើនសប្ដាហ៍មកហើយ។ លោក Perry បានដើរតួនាទីយ៉ាងសំខាន់ក្នុងការអនុវត្ត គោលនយោបាយបង្កើនការផលិតថាមពលរបស់លោក ដូណាល់ ត្រាំ ហើយលោកក៏ត្រូវបានគេរាយការណ៍ដែរថា នឹងជំនួសតំណែងដោយអនុរដ្ឋមន្ត្រី ថាមពលលោក ឌែន ប្រ៊ូអ៊ីឡេត (Dan Brouillette)។ ប៉ុន្តែគេមិនទាន់ច្បាស់ឡើយថា លោក ត្រាំ នឹងតែងតាំងលោក Brouillette ជារដ្ឋមន្ត្រីថាមពលថ្មី ឬក៏យ៉ាងណានោះ។

គួរជម្រាបថា លោក Rick Perry គឺជាអតីតមន្ត្រីកងទ័ពអាមេរិកម្នាក់ និងធ្លាប់បម្រើការងារជាអភិបាលរដ្ឋតិចសាស់ជំនាន់ទី ៤៧ផងដែរ។ ការលាលែងចេញពីតំណែង​របស់មន្ត្រីជាន់ខ្ពស់ខាងលើនេះ គឺបានកើតមានឡើងបន្ទាប់ពីមន្ត្រីកំពូលៗរបស់លោក ដូណាល់ ត្រាំ មួយចំនួនទៀតទើបតែបានសម្រេចចិត្តលាលែង ឬបណ្តេញចេញពីតំណែងដូចគ្នា៕