(វៀងច័ន្ទ)៖ ចំនួនមនុស្សស្លាប់បានកើនដល់ ១៣នាក់ហើយ និងជាង២០នាក់ផ្សេងទៀតរងរបួស ខណៈមនុស្សពីរនាក់កំពុងបាត់ខ្លួន នៅក្នុងគ្រោះថ្នាក់ក្រឡាប់រថយន្តដឹកអ្នកទេសចរជនជាតិចិនមួយគ្រឿង នៅភាគខាងជើងប្រទេសឡាវកាលពីថ្ងៃចន្ទ។ នេះបើតាមការចេញផ្សាយដោយ​សារព័ត៌មាន Spuntik នៅរសៀលថ្ងៃអង្គារ ទី២០ ខែសីហា ឆ្នាំ២០១៩។

គ្រោះថ្នាក់ចរាចរណ៍ខាងលើបានកើតឡើង នៅពេលរថយន្តក្រុងដឹកភ្ញៀវទេសចរមួយគ្រឿង ដែលមានជនជាតិចិន ៤៣នាក់ និងជនជាតិឡាវពីរនាក់បានរអិលធ្លាក់ពីផ្លូវ នៅចំនុចមួយរវាងរដ្ឋធានីវៀងច័ន្ទ និងភាគខាងជើងនៃខេត្តហ្លួងព្រះបាង នៅចម្ងាយប្រហែល ១៨០គីឡូម៉ែត្រពីទីក្រុងវៀងច័ន្ទ កាលពីរសៀលថ្ងៃចន្ទម្សិលមិញនេះ។ ដោយឡែកមូលហេតុ នៃគ្រោះថ្នាក់នេះ ខាងមន្ត្រីប៉ូលីសឡាវបានគូសបញ្ចាក់ប្រាប់ថា ប្រហែលជាបណ្តាលមកពីបញ្ហាហ្វ្រាំងរថយន្ត។

គួរបញ្ជាក់ថា បុគ្គលិកស្ថានទូតចិនប្រចាំនៅប្រទេសឡាវ និងស្ថានអគ្គកុងស៊ុលចិន ប្រចាំនៅខេត្តហ្លួងព្រះបាង បានធ្វើដំណើរទៅកាន់កន្លែងកើតហេតុដោយផ្ទាល់ ដើម្បីស្វែងរក និងជួយសង្គ្រោះជនរងគ្រោះ។ ជាមួយគ្នានេះ ពួកគេបានក្រើនរំលឹកពីសុវត្ថិភាពក្នុងការធ្វើដំណើរ នៅពេលបើកបរក្នុងរដូវវស្សា ជាពិសេសនៅលើភ្នំ និងត្រូវត្រួតពិនិត្យយានយន្ត ឱ្យបានម៉ត់ចត់មុននឹងចេញដំណើរ៕