(ឡុងដ៍)៖ យោងតាមអ្នកនាំពាក្យរបស់វិមានដោននីងស្ទ្រីត (Downing Street) បានថ្លែងឲ្យដឹងថា នាយករដ្ឋមន្ត្រីអង់គ្លេសលោក បូរីស ចនសុន (Boris Johnson) បានចំណាយពេល ០២យប់ហើយនៅក្នុងមន្ទីរពេទ្យ ថូម៉ាស់ ក្នុងទីក្រុងឡុងដ៍ ដើម្បីទទួលបានការព្យាបាលជំងឺ COVID-19 យ៉ាងដិតដល់បំផុតពីគ្រូពេទ្យជំនាញ ខណៈស្ថានភាពសុខភាពរបស់លោក គឺមានភាពហ្នឹងនរ។ នេះបើតាមការចេញផ្សាយ ដោយទីភ្នាក់ងារព័ត៌មានស៊ីនហួរ នាព្រឹកថ្ងៃពុធ ទី០៨ ខែមេសា ឆ្នាំ២០២០។

លោក Johnson បានស្នាក់នៅដាច់ដោយឡែកពីគេ នៅក្នុងអគាររដ្ឋាភិបាលអង់គ្លេសតាមដងវិថី Downing Street ក្រោយលោកធ្វើតេស្ដចេញលទ្ធផលវិជ្ជមានចំពោះ COVID-19 កាលពីខែមីនាកន្លងទៅនេះ ប៉ុន្តែកាលពីថ្ងៃចន្ទដើមសប្តាហ៍នេះ អការៈរោគរបស់លោក មានសភាពកាន់តែធ្ងន់ធ្ងរ ដូច្នេះក៏ត្រូវបានក្រុមជំនាញបញ្ជូនទៅសម្រាកព្យាបាល នៅឯមន្ទីរពេទ្យនៅក្នុងទីក្រុងឡុងដ៍។ លោកបានទទួលការព្យាបាល ដោយបានបំពាក់ខ្យល់អុកស៊ីហ្សែនជំនួយការដកដង្ហើមប៉ុណ្ណោះ មិនមែនដូចការលើកឡើងមួយចំនួនថា លោកនាយករដ្ឋមន្ត្រីបានឈានដល់ការប្រើ ឧបករណ៍ជំនួយការដកដង្ហើមនោះឡើយ។ នេះបើតាមប្រភពពីមន្ត្រីរដ្ឋាភិបាលអង់គ្លេស។

ទោះជាយ៉ាងណា បើយោងតាមអ្នកនាំពាក្យដដែលខាងលើបានគូសបញ្ជាក់ថា ស្ថានភាពសុខភាពរបស់នាយករដ្ឋមន្ត្រីអង់គ្លេស បូរីស ចនសុន មានភាពហ្នឹងនរល្អណាស់ គ្រាន់តែពេលនេះលោកត្រូវការការតាមដាន និងការការព្យាបាលឲ្យបានដិតដល់ជាងមុនប៉ុណ្ណោះ។

គួរជម្រាបថា លោក Boris Johnson អាយុ ៥៥ឆ្នាំ កាលពីថ្ងៃទី២៧ ខែមីនា បានក្លាយជាមេដឹកនាំពិភពលោកដំបូងគេបំផុត ដែលបានឆ្លងជំងឺ COVID-19។ រដ្ឋមន្ត្រីសុខាភិបាលចក្រភពអង់គ្លេស លោក ម៉ាត់ ហានខក់ (Matt Hancock) ក៏បានឆ្លងជំងឺនេះដែរ ប៉ុន្តែកាលពីថ្ងៃសុក្រសប្តាហ៍មុន លោកបានត្រឡប់មកធ្វើការវិញហើយ បន្ទាប់ពីស្នាក់នៅក្នុងផ្ទះមួយសប្ដាហ៍ និងជាសះស្បើយឡើងវិញពីជំងឺ COVID-19 នោះ៕