(ហាណូយ)៖ នាថ្ងៃព្រហស្បតិ៍នេះ សេដ្ឋីក្រុមហ៊ុនភេសជ្ជៈវៀតណាមមួយរូប ត្រូវបានតុលាការផ្តន្ទាទោសដាក់ពន្ធនាគារ រយៈពេល៨ឆ្នាំ ក្នុងសំណុំរឿងឆបោកទំហំ៤០លានដុល្លារ ខណៈប្រទេសអាស៊ានមួយនេះ កំពុងបន្តដំណើរការយ៉ាងក្តៅគគុក នូវយុទ្ធនាការបោសសំអាតអំពើពុករលួយ ដែលបានមើលឃើញ មនុស្សសរុបច្រើនជាង៤,៤០០នាក់ រងការចោទប្រកាន់បទល្មើសព្រហ្មទណ្ឌ ក្នុងនោះរួមមានទាំងមន្រ្តីរដ្ឋាភិបាល និងពាណិជ្ជករជាន់ខ្ពស់។ នេះបើតាមការចេញផ្សាយដោយ ទីភ្នាក់ងារព័ត៌មាន AFP នាថ្ងៃព្រហស្បតិ៍ ទី២៥ ខែមេសា ឆ្នាំ២០២៤។
តុលាការនៅទីក្រុងហូជីមិញ បានរកឃើញថា លោក Tran Qui Thanh រួមទាំងកូនស្រី២នាក់របស់លោក ពិតជាមានកំហុសប្រាកដមែន សម្រាប់ការបោកប្រាស់វិនិយោគិន ជុំវិញការផ្តល់ប្រាក់កម្ចីកាលពីចន្លោះឆ្នាំ២០១៩ និងឆ្នាំ២០២០កន្លងទៅ។ លោក Thanh អាយុ៧១ឆ្នាំ ដែលជាប្រធានគណៈប្រឹក្សាភិបាលក្រុមហ៊ុនភេសជ្ជៈ Tan Hiep Phat ត្រូវបានតុលាការរកឃើញថា ពិតជាបានធ្វើសកម្មភាពដើម្បីបន្លំយកទ្រព្យសម្បត្តិ គិតជាប្រាក់រាប់សិបលានដុល្លារ ដែលកូនបំណុលខ្លួនបានយកទៅដាក់បញ្ចាំ ដើម្បីខ្ចីប្រាក់។ សូម្បីនៅពេលពួកគេទូទាត់បង់ប្រាក់អស់វិញ ទាំងជាមួយការប្រាក់ក៏ដោយ លោក Thanh បានបដិសេធប្រគល់ទ្រព្យសម្បតិ្តទាំងនោះឱ្យម្ចាស់ដើម ក្រោមហេតុផលផ្សេងៗ រួមមានទាំងការអះអាងថា ពួកគេបាត់បង់សិទ្ធិទិញយកទៅវិញ ដោយសារតែបំពានកិច្ចសន្យា ជាដើម។
តុលាការក៏បានផ្តទ្ទាទោសផងដែរ ចំពោះកូនស្រីអាយុ៤៣ឆ្នាំរបស់លោក Thanh ឈ្មោះ Tran Uyen Phuong ដែលជានាយកប្រតិបត្តិរង របស់ក្រុមហ៊ុន Tan Hiep Phat ឱ្យជាប់ពន្ធនាគារ៤ឆ្នាំ។ រីឯកូនស្រីលោកម្នាក់ទៀត ឈ្មោះ Tran Ngoc Bich អាយុ៤០ឆ្នាំ ត្រូវបានតុលាការផ្តន្ទាទោសដាក់ពន្ធនាគារ៣ឆ្នាំ ប៉ុន្តែទោសនោះត្រូវបានព្យួរ។ Tan Hiep Phat គឺជាក្រុមហ៊ុនភេសជ្ជៈដ៏ធំមួយប្រចាំនៅប្រទេសវៀតណាម ដែលមានឈ្មោះល្បីខាងផលិតផលតែកំប៉ុង និងភេសជ្ជៈប៉ូវកម្លាំង ជាច្រើនមុខ។
គួរបញ្ជាក់ថា សេដ្ឋីល្បីៗមួយចំនួននៅវៀតណាម បានជាប់ក្នុងសំណាញ់បង្រ្កាបអំពើពុករលួយ របស់បក្សកុម្មុយនិស្តវៀតណាម ជាបន្តបន្ទាប់។ តួយ៉ាង ក្នុងសំណុំរឿងឆបោកដ៏ធំបំផុតមួយ សេដ្ឋីនីខាងចលនទ្រព្យ លោកស្រី Truong My Lan ត្រូវបានតុលាផ្តន្ទាទោសប្រហារជីវិត ក្នុងខែមេសានេះ សម្រាប់ផែនការឆបោក ដែលមានរយៈពេលប្រមាណ ១ទសវត្សរ៍ និងបង្កការខាតបង់ទំហំរហូតដល់២៧ពាន់លានដុល្លារ។ រីឯកាលពីខែមីនា តុលាការទីក្រុងហាណូយ បានកាត់ទោសសេដ្ឋីចលនទ្រព្យប្រណិតម្នាក់ទៀត ឈ្មោះ Do Anh Dung ដាក់ពន្ធនាគារ៨ឆ្នាំ សម្រាប់ការឆបោកលុយរាប់រយលានដុល្លារ ពីវិនិយោគិនរាប់ពាន់នាក់៕
