(សេអ៊ូល)៖ កូរ៉េខាងត្បូង​នៅថ្ងៃចន្ទនេះ នឹងចាប់ផ្ដើមការធ្វើសមយុទ្ធយោធារយៈពេលពីរថ្ងៃ សំដៅបង្កើនសមត្ថភាពការពារទីប្រជុំ កោះជម្លោះដុកដូ (Dokdo ឬជប៉ុនហៅថា តាកេស៊ីម៉ា) នៃឆ្នេរភាគខាងកើតរបស់ខ្លួន ពីការឈ្លានពានជាយកថាហេតុណាមួយ ពីសំណាក់កងកម្លាំងជប៉ុន។ នេះបើ​តាម​ក្រសួងការពារជាតិ​កូរ៉េខាងត្បូង ដកស្រង់​ដោយសារព័ត៌មាន Channel News Asia នៅព្រឹកថ្ងៃចន្ទ ទី១៨ ខែមិថុនា ឆ្នាំ២០១៨។

ថ្លែងនៅក្នុងសន្និសីទ​សារព័ត៌មាន អ្នកនាំពាក្យក្រសួង​ការពារជាតិកូ​រ៉េខាងត្បូង លោក ឆយ យុនសូ (Choi Hyun-soo) បានគូសបញ្ជាក់ថា សមយុទ្ធ យោធានេះ​នឹងមានការចូលរួម​ពីនាវាចម្បាំង ០៦គ្រឿង និងយន្ដហោះ​ចម្បាំង ០៧គ្រឿង។ លោក Choi បន្ថែម​យ៉ាងដូច្នេះថា «សមយុទ្ធយោធា​ការពារទីប្រជុំ​កោះ Dokdo គឺជាសមយុទ្ធយោធាជាទម្លាប់ ដែលធ្វើឡើងក្នុងគោលបំណងពង្រឹង និងបង្កើនសមត្ថភាពការពារ ពីការឈ្លានពានណា​មួយ​ ដោយកងកម្លាំងបរទេស»

គួរបញ្ជាក់ថា កូរ៉េខាងត្បូងបាន​គ្រប់គ្រងទីប្រជុំ​កោះ Dokdo ស្ថិតនៅសមុទ្រ​ខាងកើត ឬសមុទ្រជប៉ុន ចាប់តាំងពីការដួល​រលំអាណានិគមជប៉ុន​លើឧបទ្វីបកូរ៉េ។ ចំណែកឯ ទីក្រុងកូត្យូ ក៏បានអះអាង​ផងដែរថា កោះដែលមានឈ្មោះ​ជាភាសាជប៉ុនថា តាកេស៊ីម៉ា (Takeshima) មួយនេះ គឺជាកម្មសិទ្ធិរបស់ខ្លួន និងចោទថា​កូរ៉េខាងត្បូង កំពុងគ្រប់គ្រងវាដោយខុស​ច្បាប់។

ក៏ប៉ុន្តែ​អ្វីដែលគួរឱ្យកត់សម្គាល់ គឺសមយុទ្ធយោធានេះ​ទៀតសោត ធ្វើឡើងតែមួយ​ថ្ងៃប៉ុណ្ណោះ បន្ទាប់ពីទីក្រុង​សេអ៊ូល​ត្រូវបានគេរាយការណ៍ថា នឹងប្រកាសពីការផ្អាក​ការធ្វើសមយុទ្ធ​យោធាទ្រង់ទ្រាយធំ​ ជាមួយ​សហរដ្ឋអាមេរិក នៅក្នុង​សប្ដាហ៍នេះ៕